1 Camuel 12

Camuel oloko ki lwak

1Camuel owaco bot jo Icrael ducu ni, “Nen, dong atyeko winyo dogwu i lok ducu ma wuwaco bota; dong amiyowu rwot me loyowu. 2Koni dong wunen, rwot tye katelo wiwu. An dong atii woko ma wiya ki lwar; dok, wunen, awobena bene gitye kwedwu. Abedo latel wiwu cake wa katinona nio kwede wa onyo. 3An atye ene, wutit lok ma mako koma inyim Rwot ki inyim laker ma mere ma kiwiro ki moo. Anga ma akwanyo twone? Anga ma akwanyo kanane? Nyo anga ma abumo jamine? Anga mayam aburu? Nyo anga mayam agamo lim me wilo loyo kop ki i cinge me laum wang? Wutit lok ma mako koma, ci abidwoko wange botwu.” 4Ci gin gugamo ni, “In yam pe ibumu jamiwa mo, kadi buruwa, nyo gamo jami mo ki i cing dano mo.” 5Ci en owaco botgi ni, “Rwot aye lacaden ikomwu, ki laker ma mere ma kiwiro ki moo bene aye lacaden tin ma moko ni, pe wunongo bal mo ikoma.” Ci gugamo ni, “En aye caden.” 61

Camuel dok owaco bot lwak ni, “Rwot aye caden mayam oyero Moses ki Aron ci okwanyo kwariwa woko ki i Ejipt. 7Ma omiyo kombedi dong wucung mot, wek apid kop ikomwu inyim Rwot ikit ducu ma Rwot olarowu kwede, mayam otimo pirwu ki pi kwariwu. 82Ka yam Yakobo ki jone gucito i Ejipt, ci jo Ejipt obwoyogi ki tek, ma omiyo kwariwu gukok bot Rwot. Ka dong Rwot ocwalo Moses ki Aron ma gukwanyo kwariwu ki i Ejipt ci gumiyogi gubedo i kabedo man. 93Ento wigi ocako wil ikom Rwot Lubangagi woko; ci omiyogi i cing Cicera ma lawimony pa Jabin, rwot me Kajor, ki i cing jo Piliciti, ki i cing rwot me Moab, ci gucako lweny ikomgi. 104Ci gukok bot Rwot kun giwaco ni, ‘Wan dong wabalo, pien wabwoto Rwot woko, waworo jogi Baal ki jogi ma mon gu. Ento dong ilarwa ki i cing lukworwa, ci wabiworo in keken.’ 115Ka dok Rwot ocwalo Jerubaal ki Barak, ki Jeputa ki an, ci olarowu ki i cing lumerokwu tungi ki tungi, ci wubedo mot ki kuc. 126Lacen ka wuneno ni Nakac rwot pa jo Ammon obino kalweny ikomwu, ci wuwaco bota ni, ‘Pe kumeno; ento rwot aye biloyowa,’ ma kun onongo Rwot Lubangawu aye rwotwu. 13Kombedi dong wunen rwotwu ma wuyeroni, mayam wupenya pireni. Nen, Rwot dong oketo rwot ma loyowu. 14Kace wubilworo Rwot ci wutiyo bote kun wuwinyo doge, ma kun pe wujemo nyo wukwero cik pa Rwot woko, dok ka wun ki rwotwu ma loyowuni ce wubilubu kor Rwot Lubangawu, ci bibedo ber. 15Ento kace pe wubiwinyo dog Rwot, nyo wujemo ma wukwero cik pa Rwot woko, ci Rwot bimiyo pwod ikomwu ki ikom rwotwu. 16Kombedi wun dong wucung mot wek wunen kit gin madit ma Rwot bitiyo inyimwu. 17Kareni kare me kayo ngano; pe kumeno? Dong an abilego Rwot wek ocwal kot ma mor kun cwer kwede, ci wubingeyo dok wubineno kit ma balwu dit kwede ma wutimo inyim Rwot pi penyo pi rwot pirwu kenwu.” 18Kitmeno Camuel olego Rwot, ci Rwot ocwalo kot ma mor kun cwer kwede inino meno; ma omiyo lwak ducu gubedo ki lworo madwong mada ikom Rwot ki ikom Camuel.

19Ci lwak ducu guwaco bot Camuel ni, “Ladit, leg pirwa bot Rwot Lubangani wek pe wato, pien wapongo wi balwa ki tim marac man me penyo pi rwot pirwa kenwa.” 20Ci Camuel owaco bot lwak ni, “Pe wulwor, wutyeko timo gin maracu magi ducu, ento pe dok wuloke wubare woko ki kalubu kor Rwot, ento dong wutii bot Rwot ki cwinywu ducu. 21Pe wuloke wubare woko wudok kalubu kor gin atata ma pe konyo, ma pe laro dano mo, pien gin atata. 22Pien Rwot pe bibolo lwake woko ata, pi nyinge maditi, pien yomcwiny oa ki i Rwot ma oketowu me bedo jone kikome. 23Dok bene ki tung bota pe myero atim bal bot Rwot me weko lega pirwu; dok abipwonyowu kit me lubu yo atir ki maber. 24Wulwor Rwot keken, dok wutii bote ki gen madwong ki cwinywu ducu; pieno wubed katamo kit gin madito mayam Rwot obedo katiyone pirwu. 25Ento ka pud wumede katimo tim maracu, ci kibijwerowu woko, wun kacel ki rwotwu.”