1 Camuel 11

Caulo oloyo mony pa jo Ammon

1Ka dwe acel dong okato, Nakac ma jo Ammon ocito orumu taun me Jabec-gilead ki monye; ci jo ducu ma i Jabec guwaco bot Nakac ni, “Ber icike kwedwa, ci wabidoko lutici.” 2Ento Nakac ogamo doggi ni, “Abicike kwedwu kit man, abikolo wangwu tung acuc woko ducu, wek aket lewic ikom jo Icrael ducu.” 3Ci ludongo ma i Jabec gugamo doge kun gin waco ni, “Kong imiwa nino abiro wek wacwal lukwena i lobo Icrael ducu. Ka ngat mo pe onen ma larowa, ci wabimine kenwa boti.” 4Ka lukwena gubino i Gibea i gang pa Caulo, gutito loke bot lwak; ci lwak ducu guwoo ki koko matek.

5Ikare meno onongo Caulo oa ka pur i poto, ci en obedo kalubu nge twoni pur ikare ma odwogo ki i poto, ci owaco ni, “Ango mutime? Pingo dano tye kakoko?” Ci kitite lok kom jo Jabec. 6Ka Caulo owinyo loke, ci Cwiny pa Lubanga obino ki tek ikome, kun kiniga omake madwong. 7Ci okwanyo twoni pur aryo, otongogi, ongido matinotino, ci ocwalo komgi ki i cing lukwena ma guwoto orumu kwede i lobo Icrael ducu kun giwaco ni, “Dano mo ma pe obino olubu kor Caulo ki Camuel, kibitimo twoni pure kit man!” Lworo omako dano matek pi Rwot, ma omiyo dano gumol gubino ki cwiny acel. 8Ka Caulo oryeyo lwak i Bejek, okwanogi, ci jo Icrael guromo alip miya adek, ki jo Juda guromo alip pyere adek. 9Ci guwaco bot lukwena ma gubino botgi ni, “Wuwac bot jo Jabec-gilead ni, ‘Diki ka ceng odoko lyet kibilarowu.’ ” Ka lukwena gucito gutito bot jo Jabec, cwinygi obedo yom matek. 10En aye omiyo jo Jabec guwaco bot jo Ammon ni, “Wabimine kenwa diki i cingwu, ci wubitimowa kit ma wumito ducu.” 11Orwone Caulo opoko mony i buca adek; ci gucoro i dye gony pa jo Ammon kwarpiny, ci gucako nekogi nio wa i dyeceng. Jo ma gubwote guket woko ata, ma pe inongo co aryo mo gudong kacel.

12Ka man otum, lwak dok owaco bot Camuel ni, “Angagi mayam guwaco ni, ‘Caulo aye biloyowa bo?’ Kikel jonu wek wanekgi woko.” 13Ento Caulo ogamo ni, “Pe tin kineko iye dano mo, pien tin aye Rwot olaro jo Icrael.” 14Ka Camuel dok owaco bot lwak ni, “Wubin, wacit i Gilgal, wek wacit wakweru ker odoco kunu.” 15Ma omiyo lwak ducu gucito i Gilgal, ci guketo Caulo me bedo rwot ki i kabedo Maleng. Gutyero gityer me berbedo kunu inyim Rwot, ci Caulo ki jo Icrael ducu cwinygi obedo yom mada.