1 Camuel 10

1Ci Camuel okwanyo adomo me moo, oonyo iwi Caulo, ka onoto leme ci owaco ni, “Rwot dong oonyo moo ikomi wek ibed laker maloyo lwake jo Icrael. In ibiloyo lwak pa Rwot, ci ibilarogi ki i cing lumerokgi ma gurumugini. Man aye bibedo gin ma nyutu boti ni Rwot dong owiri me bedo laker maloyo gipinye: 2Ka ibia woko ki bota tin, ci ibirwate ki co aryo inget lyel pa Lakeri ma i Jelja, i lobo Benjamin. Ci gibiwaco boti ni, ‘Kana ma ibedo kayenyogini dong kinongogi, dok kombedi cwiny woru dong oa woko ki ikom kana, dong tye kaparo pirwu aye kun bako doge ni, atim gin ango pi wodani?’ 3Dong ibimede ki wot anyim, ci ibio ite kworo me Tabor; ci co adek ma gicito i Betel bot Lubanga gibirwate kwedi kunu, kun ngat acel otingo lutino dyegi adek, ngat acel otingo mugati adek, ngat acel otingo opiru kongo bwino. 4Gin bimoti, ci gibimini mugati aryo, ci in ibigamo, ki i cinggi. 5Ka lacen ibio i Gibea-eloim, kama cel gogo mony pa jo Piliciti tye iyeni. Ka ibidonyo i taun kunu, ibirwate ki lwak lunebi ma gibino gilor piny kun gia ki ikabedo me woro Lubanga ma iwi got, ma gitye ki dano ma gigoyo nanga ki ajaa ki nyamulere ki opuk ma gitelo kwede nyimgi, kun lunebi giwoto ki tito lok pa Lubanga. 6Ci Cwiny pa Rwot bibino ikomi ki tek, ci ibicako tito lok pa Lubanga kacel kwedgi, ci ibiloke idoko dano ma pat. 7Ka lanyut meno ducu dong otime ikomi ci dong i tim gin ma Lubanga bitelo in iye ducu, pien nongo en tye kwedi. 8In icit ikwong nyima i Gilgal; nen, abibino boti katyero gitum awanga ki gityer me berbedo. Ibikuru an nino abiro nio ka abio boti kanyutu boti gin ma myero i tii.”

9Ka Caulo oloko ngeye pi weko Camuel, Lubanga omine kit cwiny ma pat; ci lanyut meno gutime ducu inino meno. 10Ka guo i Gibea, ci nen, lwak lunebi gurwate kwede; ci Cwiny pa Lubanga obino ikome ki tek, ci ocako tito lok pa Lubanga ikin gi. 11Ka jo mayam gingeye guneno kit ma en tito kwede lok pa Lubanga kacel ki lunebi, ci dano gucako lok keken gi ni, “Gin ango ma opoto ikom wod pa Kic? Caulo bene dong tye ikin lunebi?” 121Ci dano mo ma bedo kunu ogamo ni, “Lunebi ni kono con, onongo wegigi kono anga?” Ma omiyo odoko carolok abola ni, “Caulo bene dong tye ikin lunebi?” 13Ka dong otyeko tito lok pa Lubanga ci ocito ikabedo me woro Lubanga ma iwi got.

14Omin won Caulo onene, ci openyo en ki latice ni, “Onongo wucito wa kwene?” Ci ogamo ni, “Wacito kayenyo kana; ka waneno ni pe gibinonge, ci wacito wa bot Camuel.” 15Ci omin won Caulo dok owaco ni, “Kong itit bota gin ma Camuel owaco boti mono.” 16Ci Caulo owaco bot omin wone ni, “Otito botwa atir ni kana dong kinongo.” Ento Caulo pe otito lok me camo ker ma onongo Camuel oloko boteni.

Kwir okwanyo Caulo me bedo rwot

17Ikare meno Camuel olwongo lwak ocoke kacel bot Rwot i Mijpa. 18Ka owaco bot jo Icrael ni, “Rwot Lubanga pa Icrael owaco kit man ni, ‘Yam akwanyo jo Icrael ki i Ejipt, alarowu ki i cing jo Ejipt ki i cing Luker ducu ma gubedo kaunuwu.’ 19Ento tin wutyeko kwero Lubangawu woko ma bedo kalarowu ki i can ki i ayelawu ducu, ci dong wuwaco ni, ‘Pe kumeno; ento imiwa rwot ma biloyowa.’ Dong wubin wucung inyim Rwot kun wurye kaka ki kaka ki dogola ki dogola.”

20Camuel okelo kaka ma i Icrael ducu cok, ci kwir okwanyo kaka pa Benjamin. 21Okelo kaka pa Benjamin cok dogola ki dogola, ci kwir okwanyo dogola pa jo Matri. Ka lacen dong okelo dogola pa jo Matri cok ki acel acel, ci kwir okwanyo Caulo wod pa Kic. Ento ka gubedo kayenye, ci pe kinongo kome. 22Ma omiyo gucito, gupenyo dog Rwot dok ni, “Danonu tika obino kany?” Ci Rwot ogamo ni, “Nen, en tye okane ikin jami.” 23Ci guringo gucito, guomo en ki kunu. Ka ocung i dye lwak, nen, odongo mabor makato dano ducu, cake ki iwi gwoke dok kwede malo. 24Ci Camuel owaco bot lwak ducu ni, “Dong wuneno ngat ma Rwot oyeroni? Pe tye ngat mo ikin wun lwak ducu ma cal kwede.” Ci lwak ducu gudange ki woo ni, “Rwot ma kiyeroni obed kwo nakanaka!”

25Camuel dok otito bot lwak twero ki tic pa rwot, ka dong ocoyogi i buk, ci opyelo ikabedo maleng. Lacen Camuel ocwalo lwak ipacigi, ci ngat acel acel odok i pacone. 26Caulo bene odok i pacone i Gibea. Ci jo mogo ma twoni oteka bene gucito ki Caulo, gin aye jo ma Lubanga ogudu cwinygi. 27Ento jo mogo ma kitgi obedo atata guwaco ni, “Danoni bilarowa ningning?” Gubedo kacayo en, ci pe gumedo ki tero mot mo bote. Ento Caulo oling mere mot.