1 Camuel 9

Caulo orwate ki Camuel

1Yam tye dano mo ma Labenjamin ma nyinge Kic, wod pa Abiel, ma wod pa Jeror, wod pa Bekorat, wod pa Apia, ma Labenjamin, dano ma lalonyo. 2Onongo tye ki wode ma nyinge Caulo, awobi ma opute ma mwonya, ma pe tye dano mo ma ikin jo Icrael ducu ma mwonya makato en. Caulo odongo mabor makato dano ducu cake ki iwi gwoke dok kwede malo.

3Ikare mo megi kana pa Kic won Caulo gurwenyo, ci Kic owaco bot wode Caulo ni, “Kwany latic mo acel, ci wua wucit kayenyo kana.” 4Ka gukato guwok i lobo godi me Epraim, ci gubaro dye lobo Calica, pe gunongo komgi. Ka dok gukato guwok i lobo Caalim, ento pe gunongo kana kunu. Ka dok gukato gubaro dye lobo me Benjamin, ento pe gunongo kana kunu.

5Ka guo i lobo Jup, Caulo owaco bot latic ma onongo gitye kwedeni ni, “Bin wadok cen, wek wora pe ocak paro pirwa, kun weko paro pi kana.” 6Ento en odok iye ni, “Nen, dano pa Lubanga tye i gang man, en dano ma kiworo; gin ducu ma en waco bedo me ada. Wek kong wacit kunu; gwok en bitito botwa lok mo ikom kana kama waromo nongogi iye.” 7Ento Caulo owaco bot latice ni, “Ka wacito bote, wabitere gin ango? Pien mugati dong otum woko ki i kicaawa, dok mot mo pe ma wabitero bot dano pa Lubanga ca.” 8Latice dok ogamo doge ni, “Nen kany, atye ki cekel me ryal mo manok; abimiyo bot dano pa Lubanga wek onyut botwa kama waromo nongogi iye.”

9(Ikare pa jo Icrael macon, ka dano mo yam cito kapenyo dog Lubanga ci waco ni, “Bin, wek wacit bot lanenpiny;” pien dano ma kilwongo ni lanebi ikare man, yam con kilwongo ni lanenpiny.) 10Ci Caulo owaco bot latice ni, “Iwaco maber, bin wek waciti.” Kitmeno gucako cito i gang kama dano pa Lubanga bedo iyeni.

11Ikare ma giito kor got pi donyo i taun ci gurwate ki anyira ma gicito katwomo pii, ci gupenyogi ni, “Lanenpiny tye kany?” 12Gugamo ni, “En tye. Nen, tye inyimwa ca. Wurune oyot; pud obino i taun man kombedi, pien tin dano tye katyero gityer i kabedo me woro Lubanga matye iwi got. 13Ka wucito, wudonyo i taun, ci wubinongo kome cut, ma nongo peya ocito ka cam iwi got. Pien dano peya gibicam ka en peya obino, nio ka en olego gum ikom gitum; ka dong jo ma kilwongogi gicako cam. Wun dong wuciti, ci wubirwate kwede oyotoyot.” 14Kitmeno gumede ki ito malo wa i taun. Ka gitye ka donyo i taun, ci guneno Camuel tye kabino tung botgi kun onongo obicito ikabedo ma kiworo Rwot iye iwi got.

15Onongo Rwot onyutu lok bot Camuel ma pud onongo Caulo odong ki nino acel me bino bote kun waco ni, 16“Diki ikine me cawa ma kit man abicwalo boti dano mo ma oa ki i lobo pa jo Benjamin, ci ibiwiro en ki moo wek obed laker maloyo jona jo Icrael. En bilaro jona ki i cing jo Piliciti; pien atyeko neno aroma pa jona, ki kokogi dong oo bota.” 17Ka Camuel oneno Caulo, ci Rwot Lubanga otito bote ni, “Man aye dano ma onongo atiti pireni. En aye biloyo lwaka.” 18Ka Caulo dong oo cok bot Camuel i dog cel me taun, ci openye ni, “Tita ba, ot pa lanenpiny tye kwene?” 19Ci Camuel ogamo ni, “An aye lanenpiny. Cit itel nyima nio i kabedo me woro Lubanga ma iwi got, pien ibicam kweda kacel tin, ka diki odiko abiweki icito, dok abimiyi lagam ducu ikom lapeny ma itye kwede i cwinyi. 20Lok ikom kana ma gurwenyo okato nino adeki, pe cwinyi obed kaparo pirgi, pien dong kityeko nongogi. Ento anga ma jo Icrael ducu dong gutyeko keto gen gi ikome? Pe ikom in ki i ot pa woru aye?” 21Ci Caulo ogamo ni, “An gira Labenjamin, ma kakawa tidi tutwal ikin jo Icrael. Dogolawa onyongo anyonga ki ikin dogola ducu pa jo Benjamin. Ci pingo iloka lok marom meno?”

22Camuel otero Caulo ki latice, okelogi i kicika, ka omiyogi kabedo me dito makato jo ma kilwongogi ducu, ma giromo jo pyere adek. 23Ci Camuel owaco bot latedo ni, “Kel wang pok ma nakanen amiyo botini, kun aciki ni iket pat.” 24Ci latedo okwanyo em ki bam, ocibo inyim Caulo, ci Camuel owaco bot Caulo ni, “Nen, gin ma kikano piri gityeko cibone inyimi. Cam, pien onongo kikano piri nio wa ikare ma kiciko, wek icam kacel ki welo.”

Kitmeno Caulo ocamo kacel ki Camuel i ninonu. 25Ka dong gulor gudwogo piny ki i kabedo ma iwi got, ci gucito i taun. Kipeto kabutu pa Caulo malo iwi ot, ci obutu piny, onino woko. 26Ka piny dong oyabe, Camuel olwongo Caulo ma onongo pud tye malo iwi ot kun waco ni, “A malo, wek dong alwoki, iciti.” Caulo oa malo, ci en ki Camuel gucito i yoo gin aryo.

Camuel owiro Caulo me bedo rwot

27Ka onongo gitye kalor piny, ma dong guo i agiki taun, Camuel owaco bot Caulo ni, “Wac ki latici okat ocit inyimwa. Ka latice dong okato anyim, ci Camuel owaco ki Caulo ni, in kong icung kany manok, wek amiyi i nge lok pa Lubanga.”