1 Camuel 8

Jo Icrael gulego pi rwot

1Ikare ma Camuel dong otii woko, en oketo awobene gubedo lungolkop pa jo Icrael. 2Nying wode me kayone Joel, ki nying wode me aryone Abija; yam gubedo lungolkop ki i Beer-ceba. 3Ento awobe pa Camuel pe gulubu kit pa won gi, gubwoto woko, gudok kayenyo lim. Gubedo kagamo lim me wilo loyo kop ki ikot, kun gibalo te pido pa dano woko.

4Ci ludongo pa jo Icrael ducu gucoke kacel bot Camuel i Rama, 51guwaco bote ni, “Nen ba, in dong i tii woko, dok awobeni pe gilubu kiti. In iket rwot pirwa wek en aye olowa, macalo tye i rok mukene ducu.” 6Ento lok meno pe oyomo i Camuel ma guwaco ni, “Mii ki wan rwot wek en aye olowa.” Ka Camuel olego Rwot, 7ci Rwot owaco bot Camuel ni, “Winy dog lwak i gin ducu ma guwaco boti. Pien gin pe gukwero in, ento gukwero an, ni an pe abed rwot ma loyogi. 8Kit tim ducu ma gubedo katimone ikoma cake inino mayam akwanyogi iye ki i Ejipt o kwede wa tin, ma gubwoto an ci gudok ka woro lubanga mukene, gitye katimone ikomi bene kitmeno. 9Koni dong kong iwiny doggi; lok acel keken, ber ilok kwedgi kun inyutu botgi atyer kit ma rwot ma biloyogi biterogi kwede.”

10Kitmeno Camuel otito lok pa Rwot ducu bot lwak ma gulego rwot ki bote. 11Ci Camuel owaco ni, “Man aye bibedo kit ma rwot biloyowu kwede; en bitero awobewu ci ketogi i gadigadine me lweny, ki me bedo wegi aguragurane, ki jo ma ringo inyim gadigadine. 12Dok en biketo ludito wi monye maloyo dano alip, ki maloyo dano pyere abic, ki jo mukene pi puru potone ki pi kayo kace, ki pi teto jami lwenye ki jami kom gadigadine. 13En bitero anyirawu karubu moo ma ngwece kur, ki pi tedo cam ki pi tedo mugati. 14En bimayo potiwu mabecone woko, ki poto olokwu ki poto jeituni, ci bitingo miyo bot lutice. 15Bikwanyo dul acel me apar me kalwu ki me olokwu, ci tingo miyo bot ludito tice ki bot lutice mukene. 16Bitero opiiwu ki angecawu, ki dyangiwu ki kanawu mabecone, ci biketogi katiyo tice. 17En bitero dul acel me apar me romiwu ki dyegiwu, ci dong wubibedo opiine. 18Ikare meno wubikok giwu ikom rwotwu, ma wun aye wuyero pirwu kenwu; ento Rwot pe bidok iye botwu inino meno.”

19Ento dano gukwero winyo dog Camuel, ci guwaco bote ni, “Pe; wan wabibedo ki rwot ma loyowa, 20wek wan bene wabed macalo rok mukene ducu, wek rwotwa aye olowa, ci en okat anyim pi telo wiwa ki kalweny pirwa i mony.” 21Ka Camuel otyeko winyo lok pa lwak ducu, ci odwoko loke bot Rwot. 22Ka Rwot dok owaco bot Camuel ni, “Winy doggi, i mii ki gin rwot,” Camuel dok owaco bot jo Icrael ni; “Dong wuciti, ngat acel acel odok cen i gange.”