1 Camuel 7

11

Ci jo Kiriat-jearim gucito guomo Canduk pa Rwot, gutero i ot pa Abinadab ma iwi got. Ci gukwero wode Eleajar pi gwokone.

Camuel ongolo kop i Icrael

2Canduk pa Rwot obedo i Kiriat-jearim pi kare malac ma nongo mito romo mwaka pyere aryo, ci jo me ot pa Icrael ducu gucako dwogo bot Rwot ki kumu. 3Ci Camuel owaco bot jo Icrael ni, “Ka dong wudwogo bot Rwot ki cwinywu ducu, ci dong wubol lwak lubanga pa lurok ki cal jogi ma mon gu woko ki ikinwu, wek cwinywu okem bot Rwot atir kun wuworo en keken, ci en bilarowu ki i cing jo Piliciti.”

4Kitmeno jo Icrael gubolo lwak cal jok Baal ki cal jogi ma mon gu matye botgini woko, ci gucako woro Rwot keken.

5Camuel dok owaco ni, “Wucok jo Icrael ducu i Mijpa ci abilego pirwu bot Rwot.” 6Ma omiyo dano gucoke i Mijpa ka dok gutwomo pii ci guonyo piny inyim Rwot macalo gityer, ci gurii kec inino meno kun giwaco ni, “Watimo bal inyim Rwot.” Dok Camuel ongolo kop pa jo Icrael pirgi i Mijpa. 7Ikare meno ka jo Piliciti guwinyo ni jo Icrael gucoke i Mijpa, ci rwodi pa jo Piliciti gucito kalweny ikom jo Icrael. Ka jo Icrael guwinyo, ci gubedo ki lworo madit pi dul mony pa jo Piliciti. 8Ci jo Icrael guwaco bot Camuel ni, “Pe iwek koko pirwa bot Rwot Lubangawa wek olarwa ki i cing jo Piliciti.” 9Ci Camuel okwanyo latin romo ma pud dot, otyero bot Rwot obed gitum ma kiwango olu. Ka Camuel okok bot Rwot pi jo Icrael, ci Rwot owinyo kokone. 10Ikare ma Camuel tye katyero gitum awanga, jo Piliciti gucako bino cok kalweny ikom jo Icrael; ento Rwot omor macalo mor kot ki dwon madit inino meno ikom jo Piliciti, obango komgi woko; ci jo Icrael guryemogi woko ki inyimgi. 11Jo Icrael gumol woko ki i Mijpa, guryemo kor jo Piliciti, ci gurwadogi woko nio wa ite Bet-kar.

12Lacen Camuel okwanyo got, ocibo ocung ikin Mijpa ki Jecana, ci ocako nyinge Ebenejer2 kun waco ni, “Rwotobedo ka konyowa o wa kany.” 13Ci jo Icrael guloyo jo Piliciti kitmeno; ci pe dok gudonyo i lobo pa jo Icrael. Rwot obedo kalweny ikom jo Piliciti ikare pa Camuel ducu. 14Taun madito ducu mayam jo Piliciti gumayo woko ki bot jo Icrael kidwokogi bot jo Icrael, cake wa i Ekron nio kwede wa i Gat. Jo Icrael gularo lobogi ki i cing jo Piliciti i karenu. Kuc onongo tye ikin jo Icrael ki jo Amor bene.

15Camuel otelo jo Icrael ikare me kwone ducu. 16Yam woto kun wire ikin Betel ki Gilgal ki Mijpa mwaka ki mwaka kun ngolo kop pa jo Icrael i kabedo meno ducu. 17Ka dong en loke dok Rama, pien gange onongo tye kunu. En ngolo kop pa jo Icrael kunu bene, dok ocano keno tyer pi Rwot kunu.