1 Camuel 6

Jo Piliciti gudwoko Canduk me Gicike kakare

1Canduk pa Rwot obedo i lobo pa jo Piliciti pi dwe abiro. 2Lacen jo Piliciti gulwongo ajwaki ki lutyet ci guwaco ni, “Wabitimo Canduk pa Rwot ningning? Wutit botwa kit gin ma myero wamii ma wabidwoko kwede canduk i kabedone.” 3Ci guwaco ni, “Ka wucwalo Canduk me Gicike pa jo Icrael; pe wucwal nono, ento atikane wudwok ki gitum me tingo alii. Ci dong wubicang ci weko wubiniang gin ma omiyo Rwot pe okwanyo cinge woko ki ikomwu.” 4Ci gugamo ni, “Kit mot me gitum ango ma wabimiyo me gitum me tingo alii?” Gudok iye ni, “Cal jabu abic ma oporo kit akwota bur leba, ki cal oyo adeng abic muporo wel rwodi pa Lupiliciti; pien kit two gemo acelu onongo omakowu ducu, ki rwodiwu bene. 5Pieno myero wutet cal akwota bur leba ki cal oyo adeng ma gitye katyeko lobowu wokoni ki bene wuket deyo ikom Lubanga pa jo Icrael; ci gwok nyo en bikwanyo cinge woko ki ikomwu, ki ikom lubangawu ki lobowu. 6Pe wumii cwinywu obed tek kit macalo yam jo Ejipt ki Parao cwinygi obedo tek kwede. 7Kombedi dong wukwany gadigadi manyen, ki megi dyangi aryo ma kinyetogi ma peya kitiyo kwedgi me pur, ci wutwe dyangi meno inyim gadigadi me ywayone, ento wuter lutino dyangi paco, pe gubed kacel ki megigi. 8Ci wukel Canduk pa Rwot wuket iwi gadigadi, ci wuket cal jabu ma wutetoni i canduk mukene kangete, ma wubidwoko bote macalo tyer me tingo alii. Ka dong wucwal, ociti. 9Ci dong wunen kore; kace cito kemo yoo macito wa i Bet-cemec, ci Lubanga pa jo Icrael aye okelo can man madit ikomwa; ento ka pe kitmeno ci miyo wangeyo ni pe cinge aye ma obedo ka pwodowa; can meno otime ikomwa pi keckom.”

10Jonu gutimo kitmeno; gukwanyo megi dyangi aryo ma kinyetogi, ci gutweyogi inyim gadigadi. Ka dong guloro wi lutino dyangi woko i akul. 11Gucibo Canduk pa Rwot iwi gadigadi, kacel ki canduk mukene ki cal oyo adeng ma giteto ki jabu, ki cal akwota bur leba. 12Dyangi gucito gukemo yoo atir ma dok tung Bet-cemec, kun lubu yoo ger madit. Guwoto kun gikok, pe gumedo ki dok tung acuc nyo tung acam, kun rwodi pa jo Piliciti gilubu korgi, nio ka guo kwede wa iwang lobo me Bet-cemec. 13Onongo jo Bet-cemec gitye kakayo nganogi i nota. Ka gutingo wanggi ci guneno Canduk pa Rwot, ci cwinygi obedo yom pi nenone. 14Gadigadi obino wa i poto pa Yocwa ma Labet-cemec, ci ocung kenyo. Onongo kidi madit tye kenyo; ci gubaro gadigadi woko me yen, gutyero dyangi macalo gitum awanga bot Rwot. 15Ka dok Lulevi gutero Canduk pa Rwot ki canduk mukene ma onongo tye kangeteni, ma onongo tye iye cal jabu, ka guketogi iwi kidi maditi. Ci jo Bet-cemec gutyero gitum awanga ki gitum mukene mogo bot Rwot inino meno. 16Ka rwodi pa jo Piliciti abici guneno jami ducu, ci gudok cen i Ekron inino meno.

17Cal akwota bur leba me jabu ma jo Piliciti gudwoko bot Rwot me gityer me tingo alii obedo kit man; acel pa jo Acidod, acel pa jo Gaja, ki acel pa jo Acikelon, acel pa jo Gat, acel pa jo Ekron. 18Gucwalo cal oyo adeng me jabu muporo wel taun ducu pa jo Piliciti ma rwodigi abic giloyo. Taun magi kicelogi ki cel matego, wa ki gangi matinotino ma pe kirumugi ki cel. Kidi madit mayam kiketo Canduk pa Rwot kangeteni, matye i poto pa Yocwa Labet-cemec pud tye wa onyo macalo caden.

19Rwot oneko jo Bet-cemec mogo, pien gungiyo i Canduk pa Rwot. En oneko jo pyere abiro ki ikin gi, ci dano gukumu, pien Rwot oneko jo mapol ikin gi.

Kitero Canduk pa Rwot Kiriat-jearim

20Ka dok jo Bet-cemec guwaco ni, “Anga matwero cung inyim Rwot ma Lubanga malengi? Dok ka bia ki botwa, ci bicito bot jo mene?” 21Pimeno gucwalo lukwena bot jo ma gibedo i Kiriat-jearim, kun giwaco ni, “Jo Piliciti dong gudwoko Canduk pa Rwot. Wubin, wuter botwu kunu.”