1 Camuel 5

Canduk me Gicike ikin jo Piliciti

1Ka jo Piliciti guyako Canduk me Gicike, gutingo ki i Ebenejer, gutero Acidod. 2Ka dok jo Piliciti gukobo Canduk me Gicike, gutero i ot pa jokgi Dagon, ci gucibo ka nget cal Dagon. 3Orwone ka jo Acidod gua malo odiko con, ci nen, cal Dagon tye opoto aryeba cwiny inyim Canduk pa Rwot. Ci gutingo cal Dagon, gudwoko kakare. 4Ento orwone dok ka gua odiko con, ci nen, cal Dagon tye opoto aryeba inyim Canduk pa Rwot. Wi cal Dagon ki bade ryoryo ongun woko, opoto ikom larii dogola; cal Dagon odong ma kome adul. 5Man aye gin ma omiyo ajwaki pa Dagon ki jo ducu ma gidonyo i ot pa Dagon pe dok ginyono larii dogola me ot pa Dagon ma i Acidod wa onyo.

6Ci Rwot omiyo pwod mapek opoto ikom jo Acidod ma omiyogi lworo madwong; dok Rwot omiyogi akwota bur leba, wa ikom jo ma i lobo ma ingete ducu. 7Ka jo Acidod guneno kit ma piny tye kwede, ci guwaco ni, “Canduk me Gicike pa jo Icrael pe obed ikinwa, pien Rwot omiyo pwod mapek opoto ikomwa, ki ikom Dagon ma lubangawani.” 8Ma omiyo gucwalo kwena, ci gucoko rwodi pa jo Piliciti ducu kacel kun gin waco ni, “Wabitimo Canduk me Gicike pa jo Icrael ningning?” Ci gudok iye ni, “Wek Canduk me Gicike pa jo Icrael giter wa i Gat.” Ci gutero Canduk me Gicike pa jo Icrael kunu. 9Ento ka dong gitero kunu, ci Rwot omiyo pwod mapek opoto ikom taun madit meno, ma obango komgi woko. Ci otimo jo Gat malit, omiyo akwota bur leba ocore ikom lutino wa ki ludito. 10Dok gucwalo Canduk me Gicike i Ekron. Ka Canduk me Gicike oo i Ekron, ci jo Ekron gukok matek ni, “Pingo kikelo Canduk me Gicike pa jo Icrael kany me nekowa woko wa ki rokwa ducu?” 11Ci gin ocwalo lok, gucoko rwodi pa jo Piliciti ducu kacel kun giwaco ni, “Wucwal Canduk me Gicike pa jo Icrael woko, wek odok gire i kabedone, wek pe obed kanekowa kacel ki rokwa ducu.” Pien onongo to me nino ducu dong obango kom dano ma i taun madit meno ducu. Ci Rwot omiyo pwod mapek opoto kunu, 12kun jo ma pe guto gubedo ki akwota bur leba maracu ikomgi. Ci jo me gang meno gukok pi kony bot lubangagi.