1 Camuel 4

1Ci lok ma Camuel obedo kaloko oker oromo lobo Icrael ducu.

Yako Canduk Cik

Ikare meno jo Piliciti gucito kalweny ki jo Icrael, ci jo Icrael gutongo gony i Ebenejer, ki jo Piliciti gutongo gonygi i Apek. 2Jo Piliciti gurye i tyeng kalweny ikom jo Icrael. Ka mony ogeto matek, ci jo Piliciti guloyo jo Icrael, guneko jo ma mito romo alip angwen ki i bar lweny. 3Ka lumony gudwogo i gony, ludongo pa jo Icrael guwaco ni, “Pingo Rwot oye ni jo Piliciti gulowa tin? Wek wacit wakel canduk me Gicike pa Rwot ki i Cilo, wek en Rwot obin obed i dyewa, olarwa ki i cing lumerokwani.” 41Ci lwak gucwalo dano i Cilo, gukelo canduk me Gicike pa Rwot me mony ki kunu, kama Rwot bedo iye iwi komkere malo ka wi lukerubini. Awobe pa Eli, Kopuni ki Finekaci, bene gubino kacel ki canduk me Gicike pa Lubanga.

5Ka Canduk me Gicike pa Rwot obino i gony, jo Icrael ducu guwoo ki dange matek, omiyo lobo bene omor. 6Ka jo Piliciti guwinyo woo ki dange, ci guwaco ni, “Woo man maditi ma a ki i gony pa jo Ibruni teloke ango?” Ka gungeyo ni Canduk pa Rwot otyeko bino i gony pa jo Icrael, 7ci jo Piliciti gubedo ki lworo, pien gubedo kawaco ni, “Lubangagi dong oo i gonygi.” Ci guwaco ni, “Oii, watum woko ba! Gin macalo man yam peya otime. 8Oii, watum woko ba! Anga ma bilarowa ki i cing lubanga magi mateki? Meno gin aye lubanga mayam gupwodo jo Ejipt ki lwak can mapol i tim. 9Wucam co, wuka lakwu matek macalo co, wun jo Piliciti, wek pe wudok opii pa jo Ibru kit ma gin gubedo kwede opiiwuni. Wuka lakwu matek macalo co, ci wulweny.”

10Kitmeno jo Piliciti gucako lweny, ci guloyo jo Icrael. Jo Icrael guringo woko, kun dano acel acel ringo laro pacone. Nek obedo dwong tutwal, pien Luicrael guto kunu maromo jo alip pyere adek ma woto ki tyen gi. 11Ki Canduk me Gicike bene kiyako woko; ki awobe pa Eli aryo, Kopuni ki Finekaci, kinekogi woko bene.

To Pa Eli

12Dano mo ma Labenjamin oringo oa ki iwang mony, obino i Cilo inino meno kikome, ma bongine oyec woko, wiye bene ojuku ki ngom. 13Ka en oo, onongo Eli obedo iwi kome inget yoo kakuru lok, pien onongo cwinye ongabe angaba pi Canduk me Gicike. Ka dano meno obino odonyo i taun, otito loke, ci taun ducu omor ki koko. 14Ka Eli owinyo dwon ma mor ki kokoni, ci openyo ni, “Man woo me ngo?” Ka dano meno orune, obino otito bot Eli. 15Eli onongo dong dite romo mwaka pyere abongwen wiye aboro, ki wange bene ocor woko, omiyo dong pe neno piny maber. 16Dano meno owaco bot Eli ni, “An aye aa ki iwang mony, aringo aa ki i mony tin.” En ogamo ni, “Ci dong obedo ningning, latina?” 17Lakel loki ogamo kun waco ni, “Jo Icrael guringo woko ki inyim jo Piliciti, dok bene kineko jo tuwa madwong tutwal, ki Canduk me Gicike bene kiyako woko.” 18Ka otucu lok ikom Canduk me Gicike, ci Eli opoto ataro ki iwi kome ma obedo kwede i dog cel me gang; ci ngute otur, oto woko, pien onongo dong otii mada, dok ocwer bene mada. Eli onongo obedo langolkop i Icrael pi mwaka pyere angwen.

19Ikare meno ciwod pa Eli ma dako pa Finekaci onongo iye odongo, macok nywal. Ka owinyo lok ni Canduk me Gicike dong kiyako woko, dok ni kwarone ki cware guto woko, oture piny, onywal, pien onongo mwoc ogoyo. 20Ikare ma en mito to woko, mon ma gucung kangete guwaco bote ni, “Pe ilwor, pien inywalo latin awobi.” Ento en pe ogamo doggi, pe oketo iye cwinye bene. 21Ci en ocako nying latin ni, Ikabod, ma te loke ni, “Deyo otyeko a woko ki i Icrael!” Pien Canduk me Gicike dong kiyako woko, ki pi kwarone ki cware ma guto wokoni. 22Dok en owaco ni, “Deyo pa Lubanga oa woko ki i Icrael, pien Canduk me Gicike dong kiyako woko.”