1 Camuel 3

Rwot olwongo Camuel

1Ikare meno onongo Camuel tye katic pi Rwot ite loc pa Eli. Onongo lok pa Rwot bino kicelkicel keken, ginanyuta ma Rwot cwalo macalo lek pe onongo nen teretere.

2Ikare meno Eli ma wange onongo dong cok ka to wokoni, ma dong pe neno piny maberi, obutu i ot butu ma mere, 3kun mac tara pa Lubanga pud lyel, ki Camuel obutu piny i Ot pa Rwot kama Canduk me Gicike bedo iye. 4Ci Rwot olwongo Camuel ni, “Camuel! Camuel!” Camuel ogamo ni, “An atye ene!” 5Ci oringo bot Eli owaco ni, “An atye ene, ibedo kalwonga.” Ento Eli ogamo ni, “An pe alwongi, dok ibut piny.” Camuel odok obutu piny. 6Ci Rwot dok olwongo ni, “Camuel! Camuel!” Ci Camuel oa ocito bot Eli, owaco ni, “An atye ene, ibedo kalwonga.” Eli ogamo ni, “An pe alwongi, latina, dok ibut piny.” 7Ikare meno onongo Camuel peya ngeyo Rwot, onongo Rwot peya oyabo loke bote. 8Ci Rwot dok olwongo Camuel tyen me adeke, ci Camuel dok oa ocito bot Eli kun waco ni, “An atye ene, ibedo kalwonga.” Ci Eli oniang ni Rwot aye obedo kalwongo awobini, 9ma omiyo Eli owaco bot Camuel ni, “Cit ibut piny. Kace dok olwongi, ci ibiwaco ni, ‘Rwot, wac loki. An latici, atye kawinyone.’” Kitmeno Camuel odok obutu piny i kabutune.

10Rwot obino ci ocung cok kun lwongo kit ma olwongo ikare ca ni, “Camuel! Camuel!” Ci Camuel ogamo ni, “Rwot, wac loki. An latici, atye kawinyone.” 11Dok Rwot owaco bot Camuel ni, “Nen ba, an dong atye cok katiyo gin mo i Icrael ma bimiyo dano ducu ma winyo komgi bito lirut. 12Inino meno abicobo gin ducu mayam aloko ikom ot pa Eli, cake i acakine nio wa i agiki. 13An dong atito bote ni abiketo can ikom jo me ot pa Eli matwal pi gin ma guroco ma en ngeyo wa con, pien lutinone gubedo kayeto Lubanga kun en pe jukugi. 14Ma omiyo akwongo kwong bot jo me ot pa Eli ni, pe tye gitum mo nyo gityer mo ma bikwanyo bal ki ikom jo me ot pa Eli matwal.”

15Camuel obutu nio wa odiko, ci ocako yabo dogola me Ot pa Rwot. Onongo en lworo tito bot Eli lok ma Lubanga onyutu bote. 16Ento Eli olwonge kun waco ni “Camuel, latina.” Camuel ogamo ni, “An atye ene.” 17Ci Eli openye ni, “Rwot otiti lok ango? Pe imunga loke. Lubanga myero oket can ikomi kitmeno ki makato bene, kace imunga lok mo ikom lok ducu ma en otito boti.” 18Kitmeno Camuel otite lok ducu, kun pe omungo lok mo bote. Ci Eli ogamo ni, “En aye Rwot; wek otim gin ma oneno ni ber.”

19Camuel omede ki dongo kun onongo Rwot tye kwede, Rwot pe oweko lok mo ma Camuel owaco obut opoto piny i ngom ma pe ocobe kakare. 20Ci jo Icrael ducu cake ki i Dan nio wa i Beer-ceba gungeyo ni, Camuel dong kimoko me bedo lanebi pa Rwot. 21Ci Rwot omede ki nen bot Camuel dok i Cilo, kama yam onyute iye boteni, kun tito loke bote. Ka Camuel oloko ci lwak ducu winyo loke.