1 Camuel 2

Lega pa Anna

11

Anna olego bene kun waco ni,

“Aum ki yomcwiny pi Rwot; teka omede woko pi Rwot.

Doga nyedo lok ikom lumeroka,

cwinya yom pien in Rwot ilara.

2Pe tye ngati mo maleng macalo Rwot,

ngat mo peke, kono in keken;

lagwok mo peke marom ki Lubangawa.

3Pe wumede kalok ki wake tutwal,

pe lok me nyate okati ki i dogwu;

pien Rwot aye Lubanga won ngec,

en pimo gin ducu ma dano timo.

4Atum pa twoni dong kituru woko,

ento jo magoro gudoko lutekkom.

5Jo mayam giyeng gudoko lutic me nongo cam,

ento kec dong peke bot jo mayam kec nekogi.

Lalur onywalo lutino abiro,

ento megi awobe mapol dong odoko goro.

6Rwot neko dano dok cero woko bene,

tero i lyel dok dwoko makwo.

7Rwot miyo can, dok miyo lonyo;

en lanyo dano, dok pilo wiye.

8En ilo lucan woko ki i apwa,

dok tingo jo ma piny obwoyogi

kwanyogi woko ki iwi odur,

wek gubed kacel ki rwodi,

gunong kabedo me woro.

Rwot aye won wir ma teno lobo,

ma ocibo lobo ocung iwigi.

9Rwot bigwoko tyen jone ma gene;

ento lutim aranyi gibirido wigi woko i piny macol;

pien dano pe loyo lweny pi tek kome.

10Lulweny ikom Rwot kibinginyogi woko;

en bimor ikomgi ki i polo macalo mor kot.

Rwot bingolo kop wa i agiki lobo ducu;

en bimiyo kero bot rwote,

dok miyo tek bot lakere ma ki wiro ki moo.”

11Ka Elkana odok i gange i Rama, latin odong katic bot Rwot ite loc pa ajwaka Eli.

Awobe pa Eli

12Onongo awobe pa Eli kitgi racu; pe giparo pi Rwot wa ki acel 13kadi wa pi tic mayam ajwaki gitiyo kwede ikom lwak. Ikare meno onongo tye kit man, ka dano mo otyero gitum, ci latic pa ajwaka bino ma pud gitye katedo ringo, ma omako lacob ringo ma lake okare adek. 14Ci rwako i otako, nyo i atabo, nyo i cupuriya, nyo i agulu. Ringo ducu ma lacob ringo ocobo okelo woko bedo pa ajwaka. Yam gubedo katimo kitmeno i Cilo ikom jo Icrael ducu ma gibino iye. 15Dok bene latic pa ajwaka pa Lubanga yam bino ma moo dwolo peya kiwango, ci waco bot dano ma tyero gitume ni, “Mii ringo bot ajwaka me abula, pien en pe ye gamo ringo ma dong kitedo, kono ma numone keken.” 16Kace dano meno owace ni, “Kong iwek kiwang dwolo, ka dong ikwany madit kit ma imitoni,” ci latic gamo ni, “Pe kumeno; myero imii kombedi. Ka pe, ci abikwanyo ki tek.” 17Kitmeno bal pa awobe meno obedo dit tutwal inyim Rwot, pien jo meno gubedo kacayo gityer pa Rwot acaya.

18Camuel obedo katic inyim Rwot ma onongo pud tidi, kun tweyo epod bongo camanini i pyere. 19Mine kwoyo kanyi matidi mwaka ki mwaka ci tero bote ka en cito kacel ki cware katyero gitum me mwaka. 20Ci Eli lego gum ikom Elkana ki dakone kun waco ni, “Lubanga omii inong lutino ki ikom dako man ma ka latin ma en odyero bot Rwoti”; ka lacen gidok paco tugi.

21Rwot omiyo gum ikom Anna ci Anna, onywalo lutino awobe adek ki anyira aryo. Ci latin man Camuel odongo i tic pa Rwot.

22Ikare meno onongo Eli dong otii mada. Obedo kawinyo kit ma awobene tiyo kwede ikom jo Icrael ducu, ki kit ma gibutu ki mon ma gitiyo i dogola Kema me Rwate. 23Eli owaco botgi ni, “Pingo wutimo gin macalo meno? Pien abedo kawinyo ki bot lwak ducu pi gin maracu ma wutimo. 24Pe kumeno, lutinona; lok ma awinyo ikomwu ma lwak pa Rwot gunyayo oromo pinyi pe ber. 25Ka dano mo obalo ikom dano wadi, ci Lubanga biteko kin gi. Ento ka dano obalo ikom Rwot, anga matwero bako doge pire?” Ento gin yam pe guworo dog won gi, pien onongo Rwot mito ni enekgi woko. 262

Ci latin man Camuel omede ki dongo, kun yomo cwiny Rwot ki cwiny dano bene.

27Dano pa Lubanga mo obino bot Eli, owaco bote ni, “Rwot owaco kit man ni, ‘Yam anyute kekena bot kwaru Aron ikare ma gitye i Ejipt, ma gubedo opii i ot pa Parao. 283Yam ayero en ki ikin kakawu ducu ma i Icrael wek obed ajwakana, dok ocit cok ki keno tyera, obed kawango odok eceta, ki ruku epod inyima. Ci yam amiyo bot jo me ot pa kwaru gityer ducu pa jo Icrael ma kiwango ki mac. 29Pingo dok wucayo gituma ki gityera mayam aciko? Dok pingo iworo lutinoni makato an, pi weko gicwe ki dul mabeco tutwal ki ikom gityer ducu ma jona, jo Icrael gityero.’ 30Pimeno Rwot Lubanga pa Icrael otucu atyer ni, ‘Yam aciko ni, jo me odi ki jo me ot pa kwaru gin bimede katiyo ticgi inyima matwal’; ento kombedi Rwot otucu atyer ni lok me cike meno pire oboti woko ki bota, pien jo ma giketo deyo ikoma an bene abiketo deyo ikomgi, ento jo ma gicaya pe abiketo cwinya ikomgi. 31Nen, kare bibino ma abituru iye teki woko ki tek me ot pa kwaru, wek dano mo ma otii pe obed i odi. 32Ka can dong opoto ikomi, nyeko bimaki ikom jo Icrael pi lonyo ducu ma gibinongo, kun dano mo ma otii pe bibedo i odi matwal. 33Danoni mo ma abiweko dong inget keno tyera, wange bicor woko ki koko, kun cwinye ton; likwayowu ducu dano binekogi woko ki pala lucwan. 344Gin ma bipoto ikom awobeni aryoni, Kopuni ki Finekaci, en aye bibedo lanyut boti; gin aryo ducu gibito inino acel. 35Dok abiketo ajwaka ma lagen pira kena ma tice birwate ki lok matye i cwinya ki i tama. Abigero ki en ot matek atika, ci en birii i dog tice nakanaka inyim danona ma kiwiro ki moo. 36Dok ka dano mo odong ki i odi, bibino kabako doge bote pi nucu lim mo, nyo kwon mo kun waco ni, ‘Tim ber, iketa i kabedo mo pa ajwaka, wek acam latin kwon mo.’”