1 Camuel 1

Nywalo Camuel

1Yam tye dano mo i Ramataim ma i lobo godi me Epraim ma nyinge Elkana wod pa Jerokam, ma wod pa Eliu wod pa Toku, ma en aye wod pa Jupi ma jo Epraim. 2Onongo tye ki mon aryo; nying ngat acel Anna, ki nying dako mukene Penina. Penina onongo tye ki lutino, ento Anna onongo lutinone peke.

3Dano man yam a ki i taun me Ramataim mwaka ki mwaka ci cito ka woro Rwot me mony ki ka tyero gitum i Cilo, kama onongo tye iye awobe pa Eli aryo, Kopuni ki Finekaci, ma gin ajwaki pa Rwot. 4Inino ma Elkana tyero iye gitume, en miyo dul ringo bot dakone Penina ki bot awobene ki anyirane ducu. 5Ento kadi bed en maro Anna mada en obedo kamiyo bote dul acel keken, pien Rwot onongo otweyo iye woko, ma pe nywal. 6Nyeke obedo ka ngeto iye marac ki cwero cwinye, pien Rwot otweyo iye woko, ma pe nywal. 7Kit tim meno obedo ka time mwaka ki mwaka; ikare ducu ma Anna cito kunu i Ot pa Rwot, nyeke bedo ka ngeto iye. Man omiyo Anna bedo kakoko, ma pe camo. 8Inino mo acel cware Elkana openye ni, “Anna, ikok pingo? Pingo pe icamo? Cwinyi cwer pingo? An pe ayomo cwinyi makato awobe apar?”

9Ka dong gutyeko camo cam ki mat i Cilo, ci Anna oa malo. Ikare meno onongo ajwaka Eli obedo iwi kome inget okar dogola me Ot pa Rwot. 10Anna onongo cwinye cwer matek, ci ocako lego Rwot kun kok matek tutwal. 111Okwongo kwong kun waco ni, “Ai Rwot me mony, kace ibineno aroma ma an angecani atye kwede, kun ipoo pira, ma wii pe wil ikoma, ce imiya latin laco ci abidyero en i cingi Rwot pi kare me kwone ducu, en pe bimato kongo bwino nyo gin mo ma kec, dok lyedi mo bene pe bigudo wiye.”

12Ka Anna pud omede ki lega inyim Rwot, ci Eli obedo kaneno del doge. 13Anna obedo kalega ki i cwinye, kun del doge aye yenge, ento dwone pe winye; ma omiyo Eli otamo ni en obedo dako ma lamero. 14Ci Eli owaco bote ni, “Ibimer pi kare marom mene? Juk mero ki kongo bwinoni ni woko.”

15Ento Anna odok iye ni, “Pe kumeno, rwoda. An a dako ma cwercwiny aye obwoyo koma woko. Pe amato kongo bwino nyo gin ma mero dano, ento abedo kayako pekona woko inyim Rwot. 16Pe iloka abed dako ma kite tye atata. Pien gin ma abedo ka lokone ni ducu dwonge para ki cwercwinya.” 17Ci Eli odok iye ni, “Wot ki kuc. Lubanga pa Icrael omyero oye legani ma ikelo boteni.” 18Anna ogamo ni, “Wek gum okaya inyimi, ladit.” Ka okato ocito woko, ocako cam, ci cwercwinye ogik.

19Gupuk odiko con, gucito ka woro Rwot; ka lacen gudok paco tugi i Rama. Elkana obutu ki dakone Anna, ci Rwot ogamo lega pa Anna. 20Anna ogamo iye. Ka kare oromo, onywalo latin laco. Anna ocako nyinge Camuel, pien owaco ni, “Alego alega ki bot Rwot.”

21Elkana ki jo ma i ode ducu dok gucito ka tyero gitum me mwaka bot Rwot, ki pi cobo kwonge. 22Ento Anna pe ocito. Owaco bot cware ni, “Ka latin dong obwoto doto cak, ci abitere, wek en obed inyim Rwot, dong kunu matwal.” 23Cware Elkana ogamo ni, “Tim gin ma ineno ni ber; kong dong ikur wang ma obwoto dot. Ento Rwot aye myero okonyi wek i ocob loki kakare.” Ci Anna odong ka doto latine, nio ka latin oweko doto cak.

24Ka dong wode obwoto dot ci otere, kacel ki twon ma dite romo mwaka adek, ki moko kwon maromo debe aryo, ki opiru kongo bwino, ci okele i Ot pa Rwot ma i Cilo, kun onongo latin pud tidi. 25Guneko twon, ka gutero latin bot Eli. 26Ci Anna owaco bote ni, “A rwoda, tika ipo ikoma? An aye a dako mayam ocung inyimi kany kun alego Rwoti. 27Yam alego pi latin man, ci Rwot oye legana ma akok kwede bote. 28Ma omiyo an dong adyero en woko i cing Rwot me bedo latice pi kare me kwone ducu.”

Ci guworo Rwot kunu.