Ruth 4

Boaj olako Ruth

1Ka Boaj ocito i dogcel me taun meno, ci obedo piny i iye kunu. Ci nen, lalako ma Boaj oloko pireni obino tye kawot ma mito kato akata. Ci Boaj owaco bote ni, “Bin, omera, ibed piny kany,” ci en obino obedo piny. 2Ci Boaj dok okwanyo ludongo me taun meno apar, ci owaco botgi ni, “Wubed piny kany,” ci gubedo piny. 3Lacen Boaj owaco ki dano ma en lalakoni ni, “Naomi, madong odwogo cen nia ki i lobo Moab, tye kacato but dul lobo mo mayam pa ominwa Elimelek. 4Pimeno omiyo atamo ni kong atiti, kun awaco ni, in i wil ki inyim jo man ma gibedo kany, ki inyim ludongowani. Kace ibikokone, ci koki; ento ka pe, ci tita wek ange, pien in aye lakok ma okwongo, an aye lalub kori.” Ci en ogamo ni, “An abikokone.” 5Boaj dok owace ni, “Inino ma i wilo iye dul lobo meno ki bot Naomi, nongo in i wilo wa ki Ruth ma anyira Moab bene, ma dako pa latoni, pi dwoko nying lato ikom ginaleyane.” 6Ma omiyo lalako ni owaco ni, “An pe atwero kokone pira, miyo abalo ginaleyana woko. In ikoki; dong ajalo twerona me kokone boti, pien an pe atwero kokone.” 71

Man aye kit mayam con kitimo kwede i Icrael ikare me koko dul lobo, nyo ki loko ki dul lobo mukene: ci pi moko lok moni, con dano acel lunyu ware woko, ci miyo ki ngat mukene; meno aye yam obedo lok me caden i Icrael. 8Ka lalako dok owaco ki Boaj ni, “In aye i wil,” ci olunyu ware woko, 9ci Boaj owaco ki ludongo ki bot lwak ducu matye ni, “Wun aye wucaden ma moko ni atyeko wilo jami ducu mayam pa Elimelek, ki jami ducu mayam pa Kilion, ki jami ducu mayam pa Malon nia ki i cing Naomi. 102Ki Ruth anyira Moab bene mayam dako pa Malon dong atyeko warone woko wek obed dakona, pi dwoko nying lato ikom ginaleyane, wek nying lato pe kijwa woko ki ikin utmege, nyo ki i dog taun kama kinywalo iyeni. Tin wun aye wucaden.” 113Ci jo ducu mayam onongo gitye i dog gang kacel ki ludongo guwaco ni, “Wan aye lucaden. Rwot omii dako meno ma bino i odini obed macalo Lakeri ki Lea, ma gin aryo ducu gutingo wi ot pa Icrael malo. Myero ibed matek i Eprata, nyingi bene oywek i Beterekem, 124odi bene obed rom ki ot pa Perej mayam Tamar onywalo ki Juda, pi lutino ma Rwot bimiyo ki in ma a ki i latin dakoni.”

Tekwaro pa Daudi

13Kitmeno Boaj otero Ruth, odoko dakone ci obedo kwede, ci Rwot omiyo ogamo ic, onywalo latin laco. 14Ci mon wade guwaco ki Naomi ni, “Dong kipwo Rwot ma pe oweko ibedo labongo wat macok kwedi tin. Wek nying latin man oywek i lobo Icrael. 15En biroco kwoni odoco, dok bigwoko in ka i tii; pien ciwodi ma mari, ma pire teki makato awobe abironi, en aye onywale.” 16Ci Naomi otingo latini, opyelo ikore, ci odoko lapidine. 17Mon wadine aye gucako nyinge, kun giwaco ni, “Kinywalo ki Naomi latin laco.” Ma gucako nyinge ni Obed; en aye obedo won Yece, ma won Daudi.

18Man aye likwayo pa Perej: Perej onywalo Kejeron, 19Kejeron onywalo Ram, Ram onywalo Aminadab, 20Aminadab onywalo Nakucon, Nakucon onywalo Calmon, 21Calmon onywalo Boaj, Boaj onywalo Obed, 22Obed onywalo Yece, ci Yece onywalo Daudi.