Ruth 3

Ruth ki Boaj i laro me dino ngano

1Naomi dok owaco ki Ruth ni, “Nyara, pe myero dong ayenyi laco, wek ibed maber? 2Boaj ma onongo ceng ibedo kakayo kac ki anyiraneni en aye ladogolawa. Nen ba, en tin bipyeto cayirine i otyeno i laro moyo. 3Ber in tin ilwoke, ci iwire ki moo, ka dong iruke ki bongini mabeconi, ci icit giri bote kunu wa i laro. Ento pe kong ikwong nyute keni bote nio ka otyeko cam ki matgu. 4Lacen ka dong obutu piny, ber in inen kama en obutu iye, ci icit, iel tung katyene, ibut iye; ci en bitito ki in gin ma ibitiyone.”

5Ci Ruth ogamo dog daane ni, “Abitiyo gin ducu ma iwaco.”

6Kitmeno Ruth ocako cito wa i laro moyo, ci otiyo kit ma daane otiteni kikome. 7Ka Boaj otyeko camo cam ki matgu, ma kun cwinye yom, ci ocito obutu kanget cayiri ma kiguro kacel. Ci Ruth okwale ocito mot, oelo tung tyene, ci obutu piny. 8Ka cawa oo kine i cwiny dyewor laco ocako po; ka oloke, ci nen onongo, dako mo obutu katyene. 9Ci openye ni, “In anga?” Ci en ogamo doge ni, “An a Ruth, angecani. Yar dog bongoni, wek iuma kwede, pien in aye imyero kalako an.” 10Ci en owace ni, “Rwot omii gum, nyara; man dok inyuta beri madit makato mayam itimo ikom daa ni, pien pe icito ikor awobe matino, ma lucan nyo ma lulonyo. 11Ci tin, nyara, pe dong ilwor, pien abitimo piri gin ducu ma ilegoni, pien lutuwa ma i taun kany gingeyo kit beri. 121Me ada an kono aye a watwu macok, ento tye omegiwa ma dok cok makato an maromo lako in. 13Kong ibut i dyewor man, ci diki odiko wabiniang kace omegiwa mukene ca aye bilaki, ci wek en olaki; ento ka omegiwa mukeneni pe mito laki, macalo Rwot tye makwoni, ci an ki koma abilaki ma ka en. Dong ibut piny nio wa odiko.”

14Ci en obutu piny katyene nio wa odiko, ento oa woko con kwarpiny; pien Boaj omitoni pe ngat mo oniang ni dako man obino wa i laro moyo bote. 15Ci owace ni, “Kel bongo ma irukuni, iyar iye.” Ci en oyaro iye, ci Boaj opimo cayiri agwata moko maromo abicel, ocibo iwiye, ci en ocito kwede i taun. 16Ka Ruth oo gang, ci daane ocako penye ni, “Woti obedo ningning, nyara?” Ci Ruth otite gin ducu ma laco man Boaj otimo ikome, 17kun waco ni, “En omiya cayiri agwata moko maromo abicel kun waco ni, ‘Pe myero idok bot daa ni ki cingi nono.’” 18Ci daane odok iye ni, “Nyara, kong ikur nio ka iniang kit ma lok man tum kwede.” Pien angeyoni laco man pe biling mot, ento nio ka bityeko lok man woko tini.