Ruth 2

Ruth obeko cam i poto pa Boaj

1Naomi con tye ki wat ma ladogola pa cware, en dano ma lalonyo matye i dogola pa Elimelek, ma nyinge Boaj. 21Ruth ma anyira Moab owaco ki Naomi ni, “Wek acit i poto abek wit cayiri ki i kor dano mo ma biparo pira.” Ci en owaco ni, “Cit, nyara.” 3Ci Ruth ocito i poto kabeko kor lukac, ci ocob ikom poto pa Boaj ma ladogola pa Elimelek. 4Ci nen, Boaj oa ki i Beterekem, obino owaco ki lukac ni, “Rwot obed kwedwu.” Ci gudoke iye ni, “Rwot omii ki in gum.” 5Boaj dok openyo latic maloyo lukac ni, “Man nya pa anga?” 6Ci latic maloyo lukac ogame ni, “Man nya jo Moab, mayam odwogo gin ki Naomi ki i lobo Moab. 7Ci en olega ni awek ebek korgi, kun ebeko ki ikin larita ma ikor lukac. Kitmeno en obino kun tiyo mede kwede nia wa odiko con nio wa onyo, kun pud peya oywe kadi matidi mo.”

8Ci Boaj owaco ki Ruth ni, “Kong iwinya, nyara, pe dong icit ibek i poto mukene, nyo pe iwek poto man, ento bed katic kacel ki anyira ma gin lutic ma mera. 9Ket wangi ikom poto ma kitye ka kayoneni, wek ibed kalubu korgi. Dong atyeko ciko awobena ni pe gugud komi. Dok ka orwo pii neki, ci icit kama agulu pii tye iye, wek imat pii ma awobena gutwomoni.” 10Ci Ruth ogungo oryebe piny, kun wace ni, “Pingo luguma okaya inyimi, omiyo iparo pira ma an larok atani?” 11Ento Boaj ogamo doge ni, “Gin ducu ma ibedo katiyone pi daa ni nia ma cwari oto ca, kibedo katita woko ducu kikore, ki kit ma iweko kwede woru ki meni ki lobo tinoni pi bino i rok mayam pe ingeyo. 12Rwot aye myero ocul in pi gin madong itiyo maberi. Rwot ma en aye Lubanga pa jo Icrael kama iringo ilaro ite bwomeni, omiyi mot ma oromo maber!” 13Ci Ruth ogamo ni, “Rwoda, in aye kica omaki ikoma, pien dong ityeko kweyo cwinya woko pi lok ki angecani lok me kica, kadi bed an pe a ngat acel ikom lwak angecani.”

14Ka kare me cam oromo ci Boaj dok owaco bote ni, “Bin kany, wek i cam kwon mo, i gwe ki dek.” Kitmeno Ruth ocako nywako bedo ki lukac, ci Boaj omiye cayiri ma kicelo acela. En ocamo nio ka oyeng, ci oweko mogo odong. 15Ka en oa malo kabeko cam, Boaj ociko awobene kun waco ni, “Wuwek en obek wa ikin larita, pe wule wiye. 16Dok bene wuwot wite mogo woko ki ikom larita, ci wuwek en obek, pe wucoke.”

17Kitmeno en obeko cam i poto nio wa otyeno, ci odino cayiri ma obekoni woko; omito romo debe aryo. 18Ci otingo ocito kwede i taun, onyutu bot daane; ka dok okelo cam ma odong ma onongo en dong oyeng, omiyo ki daane. 19Ci daane openye ni. “Tin ibeko ki kwene? Itiyo kwene? Gum obed ikom ngat ma oparo pirini.” Ci Ruth otito ki daane ngat ma etiyo boteni kun waco ni, “Nying dano ma tin atiyo boteni aye Boaj.” 202Ci Naomi owaco ki ciwode ni, “Myero Rwot omiye gum, Rwot ma kicane peya otenyo jo makwo ki jo ma otoni.” Dok Naomi owace ni, “Dano meno aye omegiwa dok en watwa macok tutwal.” 21Ci Ruth ma anyira Moab owaco ni, “Medo ikom meno, dok en owaca bene ni, ‘In ibinywako bedo ki lutica nio ka gutyeko kayo kaca ducu.’” 22Ci Naomi owaco ki ciwode Ruth ni, “Man ber nyara, ka ibicito kacel ki anyirane, wek pe dano gubed kagudu komi i poto mukene.” 23Kitmeno en obedo ki anyira pa Boaj kun beko cam nio ka kayo cayiri ki ngano otum, kun en obedo kacel ki daane.