Ruth 1

Elimelek ki jo ma i ode gudak i lobo Moab

1Ikare ca ma lungolkop aye giloyo lobo Icrael, kec opoto i lobo malit. Ci laco mo me Beterekem ma i Juda ocito i lobo Moab wek ebed kunu pi tutunu, en ki dakone ki awobegi aryo. 2Nying laconu Elimelek, ki nying dakone Naomi; nying awobegi aryoni en aye Malon ki Kilion. Yam gin jo Eprata me Beterekem ma i Juda. Gucito i lobo Moab kama, gugony iye. 3Ka Elimelek ma cwar Naomi oto woko, ci nen en odong ki awobene aryonu. 4Gin ducu gunyomo anyira Moab; nying ngat acel kilwongo ni Orupa ki nying mukene ca Ruth. Gubedo kunu pi kine maromo mwaka apar; 5ka lacen Malon ki Kilion bene guto woko, gin aryo ducu, ci man omiyo dako odong kene labongo cware ki awobene aryonu.

Naomi odwogo cen i Beterekem gin ki Ruth

6Ka Naomi owinyo ki i lobo Moab ni Rwot dong otyeko limo jone kun omiyogi cam, ci en ocako a woko ki kunu me dok cen ki mon pa awobene aryonu ducu. 7Kitmeno gin gua woko ki i kabedo ma onongo gitye iyeni ki mon pa awobene, gucako wot me dok i lobo Juda. 8Ento Naomi owaco bot mon wote ni, “Wun wudok woko cen, ngat acel acel odok gire i ot pa mine. Rwot otimwu maber, kit ma wun bene wutimo an kacel ki jona ma wanggi dong orwenyo woko ki botani. 9Rwot omiwu wunong gang ger, wek ngat acel acel ikinwu obed gire i ot pa cware.” Ci Naomi onoto lemgi me cikogi, ci gucako kok matek.

10Ci guwace ni, “Pe kumeno; wan wabidok kwedi wa bot jowu.” 11Ento Naomi owaco botgi ni, “Bedo ber pirwu me dok cen anyirana, wubicito kweda pingo? Pud dok atwero nywalo lutino bo ma myero gudok cogwu? 12Wudok cen, anyirana, citu giwu, pien an dong atii woko, pe dok aromo bedo ki cwara mo, dok kono awaco ni, pud ageno ni atwero nywalo lutino, kadi abed ki cwara mo i dyewor man, kadi anywalo awobe, 13ci wun wuye kurugi nio ka gudongo mono? Wun kono wubikwero gero co? Pe kumeno, anyirana, pien arem cwiny ma atye kwede dwong mada makato mewu, pi kipwola ma Rwot omiyo opoto ikomani.”

14Dok gucako kok matek ki dwon gi malongo; lacen Orupa onoto lem daane me cike kwede, ento Ruth ocere ikore matwal.

15Ci Naomi dok owaco bote ni, “Nen, nyeki otyeko dok cen bot lutugi ki bot lubangane; in bene idok cen ikor nyeki.” 16Ento Ruth odok i iye ni, “Pe ibed ka lega ni aweki, nyo ni adok cen awek lubu kori; pien kama in icito iye, an bene abicito iye; kama ibutu iye, an bene abibutu iye; jo tuwu gibibedo jo tuwa bene, dok Lubangani bibedo Lubangana. 17Kama ibito iye, an bene abito iye, ci kibiyika kunu. Myero Rwot oket can ikoma kitmeno ki makato bene, kace pe to kikome aye bipoko an kwedi.” 18Ka Naomi oneno ni en otyeko moko tame me cito kwede, ci pe dong oloko gin mo.

19Kitmeno mon aryonu gucako wot nio ka guo wa i Beterekem. Ka guo i Beterekem, ci mon ducu ma i taun gupong ki yomcwiny pirgi kun gipenye ni, “Man ada en aye Naomi?” 20Ci en owaco botgi ni. “Pe dok wulwongani Naomi, wulwonga ni Mara,1 pien Won Twer Ducu okelo kipwola ikoma.” 21Yam acito ma abup, Rwot dong omiyo adwogo cen ma alam. Pingo wulwonga ni Naomi ma Rwot ouna kuman, ma Won Twer Ducu oketa i can mapek kuman?

22Kitmeno aye Naomi odwogo kwede cen kacel ki Ruth ma ciwode, nia ki i lobo Moab. Guo i Beterekem ikare ma kicako kayo cayiri.