Lungolkop 21

Kinongo mon pi jo Benjamin

1Onongo jo Icrael yam gukwongo kwong i Mijpa ni, “Pe dano mo ki ikinwa bimiyo nyare me anyoma bot jo Benjamin.” 2Ci lwak gubino i Betel, gubedo kunu inyim Lubanga o wa otyeno, ci gukok bot Rwot matek 3kun giwaco ni, “Ai Rwot Lubanga pa Icrael, pingo lok man otime i Icrael, ma tin dong wi kaka acel odong manok mo keken i Icrael?” 4Ka dok orwone lwak gua odiko con kacano keno tyer kunu, me tyero gitum awanga ki gityer me berbedo. 5Ci jo Icrael guwaco ni, “Ikin kaka me Icrael ducu jo mene mayam pe gubino ikare ma wacoke kwede bot Rwot?” Pien onongo gukwongo kwong madit ni, “Ka dano mo pe obino bot Rwot i Mijpa kibineke woko.” 6Kica omako jo Icrael ikom utmegigi jo Benjamin kun giwaco ni, “Kaka acel dong wange tye karwenyo woko tin ki ikin jo Icrael. 7Wabitimo ningning pi nongo mon pi jo gi ma gudong. Ma dong watyeko kwongo kwong i nying Rwot ni pe wabimiyo anyirawa mo botgi me anyomani?”

8Ma omiyo guwaco ni, “Jo mene ma gitye ikin kaka me Icrael mayam pe gubino bot Rwot i Mijpa?” Ci gunongo ni ikare ma dano gucoke i Mijpa pe dano mo acel obino i gony ma oa ki i Jabec Gilead. 9Pien ikare ma kikwano dano ducu, dano acel mo pe onen ma oa ki bot jo ma bedo i Jabec Gilead. 10Pieno lwak gucwalo twoni co ma lulweny alip apar wiye aryo kun gicikogi ni, “Wucit wunek jo ma bedo i Jabec Gilead ki pala lucwan, wa mon ki lutino. 11Wubitimogi kit man; co ducu ki mon ducu mayam gubutu ki co wubijwerogi woko liweng.” 12Ikin jo me Jabec Gilead gunongo anyira miya angwen ma peya gubutu ki co, ci gukelogi i gony ma i Cilo, matye i lobo Kanaan.

13Ka dong lwak ducu gucwalo lok bot jo Benjamin ma gitye i got Rimmon kun giloko botgi lok me kuc. 14Jo Benjamin ma gudwogo ikare meno kimiyo botgi anyira me Jabec Gilead ma kiwekogi makwoni; ento pe guromogi ducu. 15Kica omako lwak ikom jo Benjamin, pien onongo Rwot oketo ariya ikom kaka me Icrael ducu.

16Ka dok ludongo me lwak guwaco ni, “Wabitimo ningning pi nongo mon pi dano mudongi, ma dong kityeko mon ma ikin jo Benjamin woko ducuni?” 17Ci guwaco ni, “Luleyo myero gunonge pi jo Benjamin ma gubwot, wek kaka mo pe kijwa woko ki Icrael. 18Ento pe watwero miyo anyirawa botgi me bedo mon gi.” Pien yam jo Icrael gukwongo kwong ni, “Kicen ngat ma omiyo dako mo bot jo Benjamin.” 19Pimeno guwaco ni, “Nen, tye nino madit me woro Rwot ma bedo mwaka ki mwaka i Cilo, matye tung kumalo me Betel, i kunyango me gudu ma a ki i Betel cito Cekem, i kupiny me Lebona.” 20Ci guciko jo Benjamin ni, “Wucit wubut i poti me olok, wukur dano, 21ci wukii. Kace anyira Cilo gibino kamyel, ci wubin, wumakgi woko, kun dano acel acel mako dakone ki ikin anyira Cilo, ci wucit kwedgi wa i lobo Benjamin. 22Kace wegigi nyo omegigi gubino kalaro loke botwa, ci wabiwaco botgi ni, ‘Wutim ber omii ki gin anyira ni, pien yam pe wakelo anyira ki i mony ma romogi ducu, wun bene pe wumiyo anyirawu ikare ca botgi; kono wumiyogi botgi, kono wuroco.’” 23Ci jo Benjamin gutimo kitmeno; gutero mon gi ma oporo welgi, ma gumako ki ikin lumyel, ci gutingo yo, gucito, gudok mere wa i lobo mayam guleyoni, ka gugero taun gi odoco, gubedo iye. 24Jo Icrael guket woko ki kenyo ikare meno; kun ngat acel acel odok i kakane ki i dogolane, kun dano acel acel cito i lobo mayam oleyo. 251

Ikare meno onongo dano mo ma laloyo maber peke i Icrael; ci omiyo dano acel acel tiyo gin ma en tamo ni tye atir ki i cwinye.