Lungolkop 20

Lweny ikom jo Benjamin

1Ci jo Icrael ducu gukati woko, cake wa i Dan o kwede i Beer-ceba, medo ki lobo Gilead bene, ci lwak gucoke gubino inyim Rwot i Mijpa ki cwiny acel. 2Rwodi pa lwak ducu ma i kaka pa jo Icrael gubino ci gucung i dye lwak pa Lubanga ma gucoke, co alip miya angwen ma gilwenyo ki pala lucwan, ki ma giwoto ki tyen gi. 3Ci jo Benjamin bene guwinyo ni jo Icrael mukeneni gucito i Mijpa, ento jo Benjamin aye pe gubedo tye kunu. Ci jo Icrael guwaco bot lalevi ma cwar dakonu ni, “Tit ki wan kit ma tim aranyi man otime kwede.” 4Ci lalevi ma cwar dako ma kinekoni owaco ni, “Inino mo acito i Gibea pa jo Benjamin, ma an aa ki dakona, ci ka piny tye kayutu watamo ni katwere wek abut iye. 5Ci co me Gibea gubino ikoma, gurumu ot ma atye iyeni i dyewor meno kun gimito neka woko; ci gubutu tektek ki dakona dyewor benebene nio ka omedo ki to woko. 6Atero dakona ma otoni wa i pacona ka angido kome woko, wek acwal dul kome orom lobo ducu ma jo Icrael guleyo odoko meggi; pien kitimo tim kipyeda ki me aranyi i Icrael. 7Nenu ba, wun jo Icrael, wun ducu kong wupor loke ki kany, ka dong wumii tamwu.”

8Ci lwak ducu gutware malo lawangacel lijur kun giwaco ni, “Wan ducu pe ngat acel mo bidok i kemane, kadi dano acel mo pe bidok bene i ode. 9Ento kombedi wabitimo jo Gibea kit man: wabicito ikomgi ki mony magwar kun kikwanyo lwak dano ki kwir me ero lweny. 10Dok bene wabikwanyo dano apar ikom jo miya ki ikom kaka ducu ma i Icrael, ki dano miya acel ikom jo alip, ki dano alip ikom jo alip apar, wek gukel cam pi lwak, wek gubin gucul kwor ikom Gibea pa jo Benjamin pi bal aranyi ma gutimo i Icrael.” 11Kitmeno jo Icrael ducu gucoke kalweny ikom taun meno, ma guribe ki cwiny acel.

12Ci kaka ducu ma i Icrael gucwalo jo mogo i dye kaka pa Benjamin ducu kun giwaco ni, “Kit tim aranyi ango ma otime ikinwuni? 13Kombedi dong wumii jo meno i cingwa, lutim aranyi ma i Gibea, wek wanekgi woko, wajwergi ki pala lucwan gin jo maracuni woko ki Icrael.” Ento jo Benjamin pe gumedo ki winyo dog utmegigi jo Icrael. 14Ci jo Benjamin gua ki i taun gi, gucoke i Gibea me cito kalweny ikom jo Icrael. 15Inino meno ka jo Benjamin gukwano jo ma oa ki i taun gi, guromo jo alip pyere aryo wiye abicel ma gilwenyo ki pala lucwan. 16Ikin jo meno ducu onongo tye co miya abiro ma kiyerogi ma gin cinggi lacam; ngat acel acel ikin gi bayo lagweng celo yer wic cut, ma pe bayo piny. 17Jo Icrael ducu ma pe kikwano iye jo Benjamin guromo co alip miya angwen ma gilwenyo ki pala lucwan; gin gubedo jo ma onongo gin jo ma gupwonye ki diro me lweny.

18Jo Icrael gua gucito i Betel, ci gupenyo dog Lubanga ni, “Anga ki ikinwa ma bikwongo cito kalweny ikom jo Benjamin?” Ci Rwot owaco ni, “Jo Juda aye gibikwongo cito.”

19Ci jo Icrael gua odiko con me cito kunu, ci gugony cok ma kun gikemo Gibea. 20Gucito kalweny ikom jo Benjamin, kun guryeyo jo gi ki tyeng inyim Gibea me lweny ikomgi. 21Jo Benjamin gukati woko ki i Gibea, ci guneko jo Icrael maromo jo alip pyere aryo wiye aryo inino meno. 22-23Ci jo Icrael gucito, gukok matek inyim Rwot nio wa otyeno. Ka dok gupenyo dog Rwot ni, “Wan dok wacit kalweny ikom utmegiwa, jo Benjamin?” Ci Rwot owaco ni, “Wun wucit, wek wulweny ikomgi.” Man omiyo jo Icrael gucamo co, ci dok guryeyo jo gi ki tyeng i kabedo ma onongo guryeyo iye inino mukwongoni.

24Kitmeno jo Icrael gurwayo cok ikom jo Benjamin inino me aryone. 25Jo Benjamin dok gukati woko ki i Gibea inino me aryone, ci guneko jo alip apar wiye aboro ki ikin jo Icrael; gin ducu gubedo jo ma lulweny ki pala lucwan. 26Ci jo Icrael dok gua gucito wa i Betel ki monygi ducu, ka guo kunu gukok matek; ci gubedo piny lirim inyim Rwot, kun bene gurii kec inino meno oo wa otyeno. Gutumu bene gitum awanga ki gityer me nywako inyim Rwot. 27Ka meno otum dok jo Icrael gupenyo dog Rwot, pien Canduk Me Gicike pa Lubanga onongo tye kunu ikare meno, 28kun Finekaci wod pa Eleajar ma wod pa Aron aye tiyo inyime ikare meno. Gupenyo dog Rwot ni, “Pud dok wacit kalweny ikom utmegiwa jo Benjamin aye, nyo wawek lweny dong ogik woko?” Ci Rwot owaco ni, “Wucit, pien diki abimiyogi i cingwu.”

29Kitmeno jo Icrael guketo dano ma obutu gurumu Gibea woko. 30Ci jo Icrael gucito kalweny ikom jo Benjamin inino me adeke, Ci guywayo mony ikom jo Gibea kit mayam ca. 31Ci jo Benjamin gukati woko ikom jo Icrael, ci gumol gucito woko wa inge gang. Gucako neko jo Icrael kit mayam ca ki i gudu, i yoo me cito Betel ki i yoo mukene bene ma cito Gibea, wa ki i bar bene, dano mamito romo ka pyere adek. 32Ma omiyo jo Benjamin guwaco ni, “Gutware guringo woko ki i nyimwa kit mayam ca.” Ento jo Icrael onongo guwaco ni, “Wek kong waring woko, wek waywagi woko ki i gang o wa i gudu.” 33Ci jo Icrael ducu dong gutware woko ki i kabedogi, gurye i yoo pi lweny wa i Baal-tamar; ki jo Icrael mayam gubutu gukane kakurugi inget Gibea tung kupotoceng gutware woko ducu ki i kabedogi. 34Jo alip apar ma kiyerogi ki ikin jo Icrael ducu gubino ikom Gibea, ci lwenye odoko tek; ento jo Benjamin pe gungeyo ni to pacogi dong onyiko botgi cok. 35Ci Rwot omiyo jo Icrael guloyo jo Benjamin; ci jo Icrael gujwero jo Benjamin maromo alip pyere aryo wiye abic ki miya acel inino meno, gin ducu jo ma lulweny ki pala lucwan. 36Pieno jo Benjamin guneno ni dong guloyogi.

Jo Icrael gujer, guweko kabedo ki jo Benjamin, pien gigeno jo ma kiketo gubutu inget Gibeani. 37Ci jo ma gubutu kakurugini gurune ci gucore o ikom Gibea, guneko jo ducu ma i taun madit meno woko ki pala lucwan. 38Onongo jo Icrael ki jo ma obutu gurumu taun madit guyubu lanyut ni, ka dong kimiyo yito mac oduny ocito malo ki i taun madit, 39ci jo Icrael myero gudwog cen kalweny ikom lubenjamin. Jo Benjamin onongo gucako lweny ci kineko jo Icrael pyere adek kun giwaco ni, “Ada, watye kaloyogi macalo i lweny mukwongo ca.” 40Ento ka lanyut ocako duny ki i taun madit, yito mac ma ocung macalo wir, jo Benjamin guneno yo ngegi; ci nen, taun madit dong ducu tye kawang duny malo o wa i polo. 41Ci jo Icrael guloke, gudwogo cen kalweny ikom jo Benjamin, omiyo kom jo Benjamin obange woko, pien guneno ni to pacogi dong onyiko cok. 42Pimeno guloko ngegi guringo woko ki bot jo Icrael kun gidok i yo tung tim ata. Ento lweny ongukogi woko, ka dok jo Icrael gumol gukati woko ki i taun madit ci gutyeko jo Benjamin woko ki pala lucwan.

43Gujwero jo Benjamin woko, kun guryemo korgi ci guradogi woko piny labongo yweyo o kwede wa tung kama okemo Gibea tung kunyangone. 44Ci jo Benjamin maromo alip apar wiye aboro guto woko, gin ducu oteka lweny. 45Ka dong odoko rac, ci jo mukene ikin gi guloke guringo tung i tim ata o wa i got Rimmon; dok kineko jo alip abic ki ikomgi ma kitongogi kireto woko piny i gudu. Ci guryemo korgi matek nio wa Gidom, ci guneko jo alip aryo mukene ki kunu bene. 46Jo Benjamin ducu ma kineko ma orade piny inino meno guromo alip pyere aryo wiye abic ma lulweny ki pala lucwan; gin ducu oteka lweny. 47Ento jo miya abicel guloko ngegi ci guringo gularo yoo ma cito tung tim wa i got Rimmon, gubedo i got kunu i Rimmon pi dwe angwen. 48Jo Icrael dok gudwogo cen kalweny ikom jo Benjamin, gunekogi ki pala lucwan, dano ki lee ki gin ducu ma gunongo. Ci guwango taun ducu ma gunongo.