Lungolkop 19

Lalevi mo ki dako angecane

1Ikare meno onongo rwot mo pud pe maloyo lobo Icrael, dok ikare meno en aye yam onongo tye iye Lalevi mo ma obedo i lobo godi me Epraim macalo welo, ibut kabedo mo matye ki i tenge i lum kamabor. Lalevi ni ceng okwanyo nya jo Beterekem ma i Juda me bedo dako angecane. 2Ka dakone ocako butu ki co mukene ci loke okelo keco ikin gi, omiyo dako man oa woko ki bote, ci odok i ot pa wone i Beterekem ma i Juda, ci obedo kunu pi dwe maromo angwen. 3Lacen cware oa ocito kalubu kore kunu, wek elok kwede mot, ka oye wek edwog kwede gange. En owoto ki latice ki kana aryo, ci obino i ot pa won nyako. Ka won nyako onene, ci obino kajole ki yomcwiny. 4Ci won dakone odiye, omiyo en obedo kunu pi nino adek kulu; gubedo kacamo cam ki mat, kun en butu kunu. 5Inino me angwene gua malo con me cako wotgi, ci ka en dong oyube pi wot; ento won nyako dok owaco bot cwar nyare ni, “Kong igal dogi ki latin kwon mo, ka lacen dong wuwoti.” 6Jo aryonu gubedo gucamo ki mat kacel, ci won nyako owaco bot laconu ni, “Ber dok ibut kany tin, wek kong cwinyi opye mot.” 7Ka laconu oa malo me wot, won nyako dok ojuke, omiyo en dok obutu kunu. 8Ka nino me abice oromo en dok oa malo odiko con me cako wote; ci won nyako dok owaco ni, “Kong igal dogi ki gin mo; dong kong ibed nio ka piny okwe.” Kitmeno gin aryonu ducu gubedo dok gucamo cam. 9Lacen laconu ki dakone ki latice gua malo me cako wot. Ento won dakone dok owaco bote ni, “Nen, piny dong oyutu woko ayuta, bedo ber ka wubutu kany do. Nen piny dong oyutu woko, wubut kany wek kong cwinyi opye mot, ci diki wubia con i odiko, wek wucak wot me cito paco.”

10Ento laconu pe dok oye butu kunu. Ci en oa woko, ocako wote me cito wa i taun madit me Jebuc, ma en aye Jerucalem. Laconu onongo tye ki kana aryo ma dong kitweyo kom me bedo iwigi, ci en obedo kacel ki dakone. 11Ka dong gitye cok ki Jebuc, onongo piny cok yutu woko, ci latice owaco bote ni, “Wek wangak i taun man madit pa jo Jebuc, ci wacit wabut kunu tin.” 12Ento rwode ogamo doge ni, “Pe wabitwero dok wire me cito bot lurok ma pe gin jo Icrael; ento wabikato akata ki i taun madit meno wek wacit i Gibea.” 13Ci en owaco bot latice ni, “Bin wek wacit i kabedo mo mukene, wabut i Gibea nyo i Rama.” 14Ci gukato gucito gigi, ci ceng opoto woko ma gitye cok ki Gibea, ma taun madit pa jo Benjamin. 15Ci gungak kunu pi butu i Gibea. Ka gudonyo iye, Lalevi ocito obedo piny i dye taun madit kamaleng; ento dano mo pe oterogi i ode wek gubut bote.

16Ka lacen dano mo ma otii obino kun oa ki katic i potone. Danoni tuggi tye i lobo godi me Epraim; onongo en labedo i Gibea, ento wegi taun madit meno kikome gin jo Benjamin. 17Otingo wange ci oneno dano ca ma lawoti ma obedo i dye gang kamaleng, ci openye ni, “Icito kwene? Ia ki kwene?” 18Lalevi ogamo ni, “Waa ki i Beterekem ma i Juda, wadok i lobo godi me Epraim i kabedo mo i gang matye kamabor en aye gang kama wabedo iye. Onongo acito i Beterekem ma i Judani, kombedi abidok i gang; ento ngat mo pe oterowa i ode. 19Watye ki reng kal ki cam pa kanawa, wa ki mugati ki kongo bwino ma romowa, an ki angecana ki awobini ma konyowa; gin mo ma orem peke.” 20Ci dano ma otiini ogamo doge ni, “Kuc obed ikomi; abicobo gin ma wumitoni ducu; ento pe wubut woko i dye taun madit man aye.” 21Kitmeno ocako tero en i ot, ci omiyo cam ki kana. Ci gin gulwoko tyen gi, ka gucamo, ka gumato bene. 221

Ka gitye kayomo cwinygi, ci nen, jo ma i taun madit meno ma lutim aranyi gurumu ot woko, gugoyo dogola kun giwaco bot ladit ma won ot meno ni, “Keliwa dano ma obino i odini woko, wek wabut kwede.” 23Won ot okato woko, ocito botgi, kun waco botgi ni, “Pe kumeno, utmega, pe wutim tim marac kitmeno; pien laco man dong odonyo i oda, pe wutim tim man me aranyi. 24Nen ba, nyara tye ene ma peya ongeyo laco, ki angeca pa laconi bene tye. Wek akelgi woko botwu kombedi, ci wuronygi kun wutimogi kit ma wumito; ento ikom laco man aye pe wutim aranyi mo.” 25Ento jonu pe gumedo ki winyone, ma omiyo Lalevi omako dakone ci ocwale woko i cinggi. Gubutu kwede tektek, kit ma igi mito i dyewor benebene nio wa odiko, ci guweke ka piny dong mito ruu. 26Ka te piny dong oyabe, dakonu obino opoto piny i dogola ot pa laco ma rwode tye boteni, nio ka piny odoko leng.

27Ci rwode oa malo ki i odiko, oyabo dogola, okato woko pi mede ki wote. Ci nen, dako tye obutu i dogola me ot, kun cinge tye i dogola. 28Laconu owaco bot dakone ni, “A malo wek waciti,” ento pe ogamo doge. Ci otingo kom dakone ma oto oketo iwi kanane; lacen oa ocito kwede wa i gange. 292Ka dong odonyo i ode, okwanyo pala, omako kom dakone ma otoni, ci ongido woko i dul maromo apar wiye aryo, ka dok ocwalo i lobo pa jo Icrael ducu. 30Jo ducu ma guneno guwaco ni, “Gin macalo man yam peya otime, bene peya yam onen, cake ikare mayam jo Icrael gua ki i Ejipt, nio wa onyo; kong wutam, wupor loke, ci wulok i iye.”