Lungolkop 18

Mika ki jo Dan

1Ikare meno onongo dano ma laloc maber mo peke i Icrael. Dok ikare meno jo ma i kaka pa Dan gin gubedo kayenyo kabedo mo me bedo ginaleyagi, wek gibed iye, pien onongo peya gin gunongo dul lobo mo me aleya ikin kaka me Icrael. 2Kitmeno jo Dan gucwalo dano abic makwiri ki ikin ludogolagi ducu, ci gua ki i Jora ki Ecitaol pi roto lobo ki ngiyone maber, kun kiwaco botgi ni, “Wucit wungi lobone maber.” Ci gubino wa i lobo godi me Epraim, i gang pa Mika, ci gubutu kunu. 3Ka pud onongo gitye i gang pa Mika, ci gungeyo dwon Lalevi matidini, ci gungak gucito wa bote, gupenye ni, “Anga mono ma okeli wa kany? Itye katimo ango i kabedo man? Ibedo kany pingo mono?” 4Ci en owaco botgi ni, “Mika aye obedo katima kuman, pien wayubu lok kwede; dok en aye bene cula gire, ci dong adoko ajwakane.” 5Ci gulege ni, “Kong ipeny dog Lubanga i yo wotwa man, wek wange ka wotwa ma wacito iyeni bibedo maber.” 6Ci Ajwaka owaco botgi ni, “Wucit ki kuc. Rwot Lubanga aye obigwokowu i wotwu man ma wucito iyeni pien wang Lubanga tye oketo ikomwu pi timowu maber.”

7Ci jo abici gucito guo wa i Laic, ci guneno jo ma gitye kenyu, ki kit ma gibedo kwede mot ikit marom ki bedo pa jo Cidon, ma gibedo mot kun nongo gutoyo tokgi ata, dok ni pe gin mo orem ki botgi iwi lobo, ento gitye gigi ki lonyo madwong. Dok onongo gitye kamabor ki bot jo Cidon, dok pe bene gimer ki ngat mo. 8Ka gudwogo bot omegigi i Jora ki Ecitaol, omegigi gupenyogi ni, “Wukelo ki wan kit lok ango?” 9Gugamo doggi ni, “Wua, wek wacitu ikomgi, pien waneno lobo ca, lobone ber tutwal. Pe wumito timo iye gin mo? Pe wugale kacito kunu kadonyo iye, ki kacamo lobone woko. 10Ka wubicito kunu, ci wubituc ikom jo ma gutoyo tokgi ata. Lobone lac; ada Lubanga otyeko miyone woko i cingwu, kabedone tye iye gin ducu mamite iwi lobo.”

11Ci jo miya abicel ma i kaka pa Dan gukwanyo jami lwenygi, gua ki i Jora ki Ecitaol, 12gukato, gugony i Kiriat-jearim i Juda. Pi lok meno omiyo kabedonu kilwongo ni Gony pa Dan o wa onyo. Nen, tye inget Kiriat-jearim, tung kupotoceng. 13Lacen gukato gucito wa i lobo godi me Epraim, ci gubino wa i gang pa Mika.

14Ka dong jo abic meno mayam onongo gucito karoto lobo Laic guwaco bot omegigi ni, “Wungeyo mono ni i odi kany tye iye epod, terapim, cal apaya ki cal me ryal ma kiliyo aliya? Kombedi dong wutam gin ma wubitimo.” 15Ci gungak gucito kunu, guwoto guo i ot pa latin Lalevi ma i paco pa Mika, ci gupenye ka en tye maber. 16Jo Dan miya abicel ma gumako jami lwenygi i cinggi, gucung kwede i dog gang kama kidonyo ki iyeni, 17ci jo abic ca mayam gucito karoto loboni gucito gudonyo wa i ot, ka gucako kwanyo cal apaya ki epod, terapim, ki cal me ryal ma kiliyo aliya, ma kun nongo ajwaka ocung i dog gang kacel ki jo miya abicel ma gumako jami lwenygi i cinggi. 18Ka jonu gudonyo i ot pa Mika, gukwanyo cal apaya, ki epod, ki terapim, ki cal me ryal ma kiliyo aliya, ci ajwaka openyogi ni, “Wutimo gin ango mono?” 19Gin gugamo doge ni, “Ling litik mot, mii dogi woko ki cingi, ci ia ibin kacel kwedwa, wek icit ibed wonwa ki ajwakawa. Itamo ni bedo ber ka ibedo ajwaka i ot pa dano acel, nyo ibedo ajwaka i dogola nyo i kaka kulu ma i Icrael?” 20Cwiny ajwaka obedo yom ka owinyo man ci otero epod ki terapim, ki cal apaya, ci owoto kwedgi i dye lwak.

21Kitmeno guloke gucako wot, kun gicwalo lutino ki lim makwo ki jamigi ducu inyimgi. 22Ka dong gucito ma onongo gukato mabor ki i dog paco pa Mika, ci nen jo ma gibedo i gang macok ki gang pa Mika guringo gubino pi oduru pa Mika me oto lweny ikom jo Dan, ci gumako jo Dan i yo ma pud gitye bor kwedgi. 23Ka dok gudange bot jo Dan, ci gin guloke, guwaco bot Mika ni, “Ango ma otimi ma omiyo ibino ki lwaki macalo man?” 24En ogamo doggi ni, “Wukwanyo lubangana ma apayo, ki ajwakana, wucito kwede woko, dong adong ki gin ango? Ka dok wupenya akaka ni, ‘Ango ma otimi?’” 25Ento jo Dan gugamo ni, “Pe iwek dwoni owinye ikinwa, miyo kiniga mako jowa ci gipoto ikomwu, gineki ki jo ma i paconi ducu.” 26Ci jo Dan gucito gigi woko. Ka Mika oneno ni gitek ma pe eromo loyogi, en bene owire odok i pacone.

27Ka jo Dan gutero jami mayam Mika opayo; ki ajwakane mayam tiyo bote, guo kwede wa i Laic, bot jo ma gubedo mot ma gutoyo tokgi ata, guwayo wer akero ikom jo Laic ka gunekogi ki pala lucwan, guwango taun gi woko ki mac. 28Dano mo pe ma oringo oduru kalarogi, pien onongo gitye bor ki Cidon, dok yam pe gimer ki ngat mo. Onongo gitye i nota macok ki Bet Rekob. Jo Dan gugero taun meno odoco, ci gubedo iye. 29Ci gucako nying taun meno ni, Dan, macalo nying Dan ma kwarogi, mayam Icrael onywalo. Ento yam con nying taun meno kilwongo ni Laic. 30Jo Dan gucibo cal ma guteroni me aworagi. Ci Yonacan lakwar Gercom ma wod pa Moses, ki likwaye, gubedo ajwaki i kaka pa Dan o wa ikare ma kitero jo Icrael i opii. 31Cal mayam Mika opayo obedo kunu pi kare ducu ma Ot pa Lubanga obedo i Cilo.