Lungolkop 17

Mika ki cal apayane

1Yam tye dano mo i lobo godi me Epraim ma nyinge Mika. 2En owaco bot mine ni, “Lim ryal alip apar wiye acel mayam kikwalo ki botini, mayam iceno iye danoni, kun an bene awinyo gire, nen, ryal meno tye bota, an aye yam akwanyo.” Mine ogamo ni. “Rwot omiyi gum, latina.” 3Ka ocako dwoko lim ryal alip apar wiye acel bot mine, ci mine owaco ni, “An kikoma dong adyero ryal man bot Rwot pi woda me tiyo cal apaya ki nyonyo ryal man ma kiliyo aliya wek okwany acena ki ikom woda; ci kombedi dong amiyo boti.” 4Mika dok odwoko lim bot mine, ci mine okwanyo lim ryal miya aryo, omiyo bot latet ryal, en otiyo ki cal apaya ma kimwono kome ki ryal, ki cal ryal ma kiliyo aliya, ci kiketo i ot pa Mika.

5Laco man Mika, onongo ceng tye ki ot woro Lubanga i gange, ci otiyo epod ki terapim,1 ci oketo wode acel me bedo ajwakane. 62Ikare meno onongo dano ma laloc peke i lobo Icrael; ci dano acel acel onongo gire tiyo gin ma en tamo ni tye atir.

7Ikare meno onongo tye latin laco mo ma bedo wa i Beterekem, i lobo Juda. En onongo Lalevi ci en obedo kunu macalo welo. 8En odak oa woko ki i Beterekem ma i Juda wek ecit ebed i kabedo mo ma ebinongo. Ka owoto, ci oo wa i lobo godi me Epraim, i gang pa Mika. 9Ci Mika openye ni, “In ia ki kwene?” En ogamo doge ni “An Lalevi me Beterekem ma i Juda, abibedo i kabedo mo ma koni abinongone.” 10Ci Mika owaco bote ni, “Bed dong bota, wek ibed wora ki ajwakana, ci abimini litin lim mo me ryal apar mwaka ki mwaka, ki bongi me arukani, ka dok abigwoki.” 11Lalevini oye bedo bote; ci latin laco meno ocako bedo kwede macalo ngat acel ikom lutinone. 12Mika oketo Lalevi meno obedo ajwakane, ci en obedo i gang pa Mika. 13I karenu Mika owaco ni, “Kombedi dong angeyo ni Rwot dong bitima jami mabeco, pien dong atye ki Lalevi me bedo ajwakana.”