Lungolkop 16

Samson ocito Gaja

1Inino mo acel Samson ocito Gaja, ci oneno lakwele mo, ocito odonyo bote. 2Ci kitito pire bot jo Gaja ni, “Samson obino kany,” ci gurumu kabedonu woko, gubutu gukure i dogcel me taun meno i dyewor benebene. Guling woko litik i dyewor meno, kun gikwilo lok ni, “Wek wakure nio wa kwar piny, ka dong wabineke.” 3Ento ka Samson obutu kunu oo wa i cwiny dyewor kikome, ci en oa malo i cwiny dyewor, ka omako dogcel me taun madit meno, ki pagi wire aryo ducu, ci oputugi woko liwuc, ka otingogi ki pal gwoke, ki rii me cegone ki jamine ducu, kun en woto kwede, ka oterogi wa iwi got ma inyim Kebron.

Samson ki Delila

4Lacen Samson dok omaro dako mo ma i nota me Corek, ma nyinge Delila. 5Ci rwodi pa jo Piliciti gubino bot dakonu, ci guwaco bote ni, “Bit en mot, wek inong kama tek kome madwongi ocung iye, ki dong wabiloye ikit yo ango, wek watweye, wabwoye; ci wan ki acel acel wabimini lim ryal alip acel ki miya acel.” 6Ci Delila ocako waco bot Samson ni, “In pwoyo itita kama tek komi madwongi ocung iye do, ki kit ma myero kitweyi kwede, wek kibwoyi?” 7Samson owaco bote ni, “Kace kitweya ki tol atum abiro, manyene, ma pe otwo, ci abidoko goro macalo dano mukene ducu.” 8Rwodi pa Lupiliciti gukelo tol atum manyen abiro ma peya otwone, ci Delila otweyo ki Samson woko. 9Dakonu onongo tye ki co ma gukane i kicika matye i tyelo. Ci owaco bot Samson ni, “Samson, Lupiliciti gubino ikomi!” Ento en ocodo tol atum woko ducu, macalo tol tworo ma ogudu mac. Kitmeno kama tek kome ocung iye pe omedo ki ngene.

10Ci Delila owaco bot Samson ni, “Nen ka ibwola ba, ci iloka giri adoko lalok goba. In pwoyo itita kit ma myero kitweyi kwede.” 11Ci dok owaco bote ni, “Kace kitweya ki tol ma peya kitiyo kwedgi, ci abidoko goro macalo dano mukene ducu.” 12Delila okwanyo tol manyen, otweye kwede, ci owace ni “Samson, Lupiliciti gibino ikomi!” Delila onongo bene omiyo dano mukene gukane i kicika ma i tyelo. Ento Samson ocodo tol woko ki i cinge macalo uci me kwoyo bongo.

13Ka Delila dok owaco bot Samson ni “Pud ibwola aye oo wa onyo, kun iloka lok goba. Tita kit ma myero kitweyi kwede mono.” Ci owace ni, “Kace imako dog yer wiya abiro, ma icweyo ci irwako i bongo ma itye kacweyoni, ci irido ki yat lacwe bongo dok ka irido ikin uci ma irwako wek omok matek, ci abidoko goro macalo dano mukene ducu.” 14Kitmeno ka dong Samson onino, ci Delila omako dog yer wiye abiro, ocweyo kun orwako i bongo ma en tye kacweyoni, ci orido ki yat wek omok iye matek. Ci owace ni, “Samson, Lupiliciti gubino ikomi!” Ento en oco ki iwang nino owoto yat, oputu kwede yat me cweyo bongo, ki bongo ma ikome ma kitye kacweyoneni.

15Lacen dako owaco bote ni, “Itwero waco ningning ni imara kun nongo pe igena ki cwinyi ducu? Man dong ibwola tyen me adeke, kun pe itita kama tek komi madwongi ocung iye.” 16Ka dako obedo kadide matek ki lok nino ki nino, kun loko bote ki tek, omiyo cwinye obale woko mamito ni etoo woko. 17Ci dong otito bot dakone gin ducu matye i cwinye, kun wace bene ni, “Lyedi peya ogudu yer wiya, pien abedo ajula pa Rwot cake wa ki ikare ma kinywala iye. Kace kilyelo yer wiya, ci tek koma biweka woko, abidoko goro, abibedo macalo dano mukene ducu.”

18Ka Delila oneno ni dong en otyeko tite lok ducu ma i cwinye, ci ocwalo kwena olwongo rwodi pa jo Piliciti kun waco ni, “Wubin kong dong wunu tyen aceli keken, pien dong otita lok ma i cwinye ducu.” Rwodi pa jo Piliciti gubino kun gikele ki lim bene i cinggi. 19Ci Delila omiyo Samson onino woko i eme, ka olwongo laco mo wek obin olyel tutunu me yer wiye abironi woko. Ci dakonu ocako time malitlit, ci teko kome oa woko ki ikome. 20Ka dako owaco ni, “Samson, Lupiliciti gubino ikomi!” Ci Samson oco woko ki iwang nino kun tamo ni, “Abikato woko kit macon ca, ci atengogi woko ki ikoma.” Onongo en pe ongeyo ni tek pa Rwot dong otyeko a woko ki ikome. 21Ka Lupiliciti gumake, ci gukolo wange woko, gutere wa i Gaja. Ci gutweye ki atego mola, kama obedo karego bel iye ki i buc. 22Ento yer wiye ocako lot ki inge lyelone.

To pa Samson

23Ka kare okato malac inge mako Samson, rwodi pa Lupiliciti gucoke katyero gitum madwong bot Dagon ma lubangagi ma cwinygi yom adada, pien gubedo kawaco ni, “Lubangawa dong omiyo lamerokwa Samson i cingwa.” 24Ka lwak gunene, gupako lubangagini kun giwaco ni, “lubangawa dong omiyo lamerokwa i cingwa ma lanek pinywa, ma ceng otyeko lwak jowa mapol.” 25Ka cwinygi dong yom, ci guwaco ni. “Kong kilwong Samson wek kong ogal wangwa.” Kitmeno kilwongo Samson ki i ot buc, ci obedo kagalo wanggi. Ci kiweko en obino ocung ikin wir ot aryo. 26Samson owaco bot awobi ma peyeni ni, “Wek kong abong kom wir ma ot man ocung iyeni, wek kong ajenge ikomgi.” 27Ot meno onongo opong ki co ki mon, ki rwodi abic ducu pa Lupiliciti onongo gitye kunu. Malo iwi ot bene onongo tye co ki mon alip adek ma gubedo kaneno Samson ka tye kagalo wanggi.

28Ka dong Samson okok bot Rwot kun waco ni. “Ai Rwot Lubanga, po pira, alegi doki, imiya tek koma tin kiceli keken. Ai Lubanga alegi dong iwek acul kwor ikom jo Piliciti pi wanga aryoni lawangacel.” 29Ci Samson omako wir ot aryo ma idyere ma otti ocung ikomgini, otyele ki teke ducu, ojenge ikomgi, kun cinge ma lacuc omako wir acel, ki cinge ma lacam omako mukene. 30Ka dong Samson owaco ni, “Wek dong ato kacel ki jo Piliciti.” Ci en okule ki teke ducu, omiyo ot opoto ikom rwodi ki ikom lwak ma gitye iyeni. Kitmeno, jo ma en onekogi ikare me tone obedo pol makato jo mayam onekogi ma pud en kwo. 31Omegine ki lukakagi ducu gubino, gutingo kome, gukelo lyele ci guyike ikin Jora ki Ecitaol, i lyel pa wone Manoa. Samson obedo langolkop i Icrael pi mwaka pyere aryo.