Lungolkop 15

1Ka kare okato manok, ikare ma kikayo iye ngano, Samson ocito kalimo dakone ki latin dyel mo i cinge, ci owaco bot jo gang pa dakonegi ni, “Abidonyo bot dakona i kicikane.” Ento won dako pe oye en odonyo. 2Ci won dakone owaco bote ni, “Onongo atamo mera i ada ni ityeko kwere woko, ma omiyo dong amiye woko bot lawoti. Lamine matidini dok ber kato en. Ber ibed kwede me kakare.” 3Ento Samson owaco botgi ni, “Tin dong pe abibedo labal ka atimo gin marac ikom jo Piliciti.” 4Ci Samson ocito omako lwak too miya adek, ci oriyo raa. Oloko too omiyo yibgi okeme ki wadi, ci otweyo raa ikin yibgi ki aryo aryo. 5Ka en ocwinyo mac ikom raa, ci oweko too gucito kwede i poto ngano pa Lupiliciti ma peya kikayogi. Mac owango wic larita ma kigurugi woko kacel, ki ngano ma peya kikayo, wa ki poti jeituni bene. 6Ka Lupiliciti gupenyo ni, “Man anga ma otimo?” Ci guwaco ni, “Samson ma cwar dako me Latimna aye otimo, pien gukwanyo dakone, gumiyo woko bot lawote.” Ma omiyo jo Piliciti gubino, guwango anyaka ki wone woko ki mac. 7Ci Samson owaco botgi ni, “Kace wutimo kitmeno, ci akwongo akwonga botwu ni abiculu kwor ikomwu, ka dong abiweko lobo bedo mot.” 8Ci Samson ocako datogi ki tong, onekogi matek; lacen ocito obedo i boro got ma i Etam.

Samson oloyo jo Piliciti i Leki

9Jo Piliciti gubino, gugony i Juda, ci gumonyo Leki. 10Jo Juda guwaco botgi ni, “Pingo wun wubino kamonyowa?” Ci gugamo doggi ni, “Wabino katweyo Samson, wek watim en kit ma en otimowa kwedeni.” 11Jo Juda alip adek gucito i boro got ma i Etam, ka guwaco bot Samson ni, “In pe i ngeyoni jo Piliciti aye gitye kaloyowa ce? Ci itimowa kuman mono pi gin ango?” Ci Samson ogamo doggi ni, “Kit ma gutimo ikomani, an bene atimogi kumeno.” 12Ka dok guwace ni, “Wan wabino katweyo in, wek wamii in i cing jo Piliciti.” Ci Samson owaco botgi ni, “Kong wukwonge bota ki kwong ni pe wun aye wubineka wun kikomwu.” 13Ci gugamo ni, “Pe gire; wan wabitweyi atweya keken, ci wabimiyo in i cinggi.” Ci gutweye ki tol aryo manyen, gukele woko ki i boro got ma i Etam.

14Ka guo o i Leki, Lupiliciti gubino karomo kwede kun gidange ki yomcwiny me loc, ci Cwiny pa Rwot obino opoto ikome ki tek, ka ocodo tol ma kitweyo ki cinge. Tol ocod calo tol obira ma mac owango. 15Samson ocob ikom cogo cwak kana mo manyen, ikare ma owoto cinge, ka okwanyo cogo meno, ci oneko kwede dano alip acel kulu. 16Ci Samson owaco ni,

“Pi cogo cwak kana

dano odure kom wadi lipimpim;

ki cogo cwak kana

aneko kwede co alip.”

17Ka otyeko loko loke ducu, obolo cogo cwak kana ma i cingeni piny, ci kicako nying kabedonu ni, Ramat-leki.1

18Lacen orwo pii oneko Samson matek, ci okok bot Rwot kun waco ni, “ityeko larowa matek kit man ki cinga, Rwot, ci dok iweko ato woko kombedi ki orwo pii? Dong apot i cing jo ma pe kilirogi bo?” 19Ci Lubanga obaro wang got matwolo mayam tye i Leki, ci pii onyete ki iye.

Ka omato, ci kerone ki cwinye odwogo, olimo tek doki. Pieno nying kabedonu kilwongo ni, En-akore; pud tye i Leki wa onyo.

20Samson obedo langolkop i Icrael ikare me ayelayela pa jo Piliciti pi mwaka maromo pyere aryo.