Lungolkop 14

Samson ki dako mo me Timna

1Samson ocito Timna, ci ki kunu en oneno nyako mo ma anyira jo Piliciti. 2Ka en dong odwogo cen i ganggi, ci en otito bot wone ki mine ni, “Aneno nyako mo ikin anyira jo Piliciti i Timna; ber wunyoma nyakonu wek obed dakona.” 3Ento wone ki mine guwaco bote ni, “Nyako mo pe ikin lwak anyira ma tuwu ce, nyo ikin rokwa ducu, en aye ma omiyo i cito kakelo dako ki ikin jo Piliciti ma pe gulireni?” Ento Samson ogamo dog woneni, “Ber wunyoma nyanu, pien mwonya tutwal.”

4Wone ki mine onongo pe gungeyo ni loki oa ki bot Rwot; pien onongo en obiyenyo tyen alii mo ikom jo Piliciti. Ikare meno onongo jo Piliciti aye giloyo jo Icrael.

5Ci Samson ocito Timna gin ki wone ki mine. Ka guwoto guo cok ki poti olok matye i Timna, ci nen latin labwor mo omor ikome. 6Cut Cwiny Rwot obino opoto ikome ki tek, ci oyeco kom labwor ma obaro iye woko macalo yeco latin dyel, kun en pe tye ki gin mo i cinge. Ento pe otito gin ma en otimoni bot wone nyo mine. 7Ka ocito kunu, en oloko ki nyako ca, ci oyomo cwinye matek. 8Ka kare okato manok, ci en odok kunu kaomo dakone, ci en ongak ocito kaneno kom labwor ma enekoni. Ci nen, lwak kic odonyo ikom labwor, moo kic bene tye iye. 9Samson ototo kic, yaka opyelo padane i dye cinge kun camo woto kwede. Ka oo kwede bot wone ki mine, ci omiyogi mogo, gin bene gucamo. Ento pe otito botgi ni etoto kic ki ikom labwor ma enekoni.

10Lacen wone ocito bot dakonu, ci Samson otedo karama kunu, pien latin awobi yam timo kitmeno. 11Ka jo kunu gunene, gukelo bote jo pyere adek wek gubed kwede. 12Samson owaco botgi ni, “Wek kong awac ki wun koc lit ba, ka wubigonyo tere ikin nino abironi me karama man, ma wunongo tyen loke, ci an abimiyo ki wun bongi camanini pyere adek, ki bongi mabeco pyere adek bene me aruka pi nino madito. 13Ento ka waco tyen loke oloyowu, ci wun aye wubimina bongi camanini pyere adek, ki bongi mabeco pyere adek bene me aruka pi nino madito.” Ci guwace ni, “Wac koc litini, wek kong wawiny mono.” 14Ci owaco botgi ni,

“Ii lacam dano oa iye cam,

Ii latekkom oa iye gin ma lim.”

Ento gin gutyeko nino adek ma pe gitwero gonyo tyen koc lit meno.

15Inino me angwene guwaco bot dako pa Samson ni, “Bit cwari, wek otit botwa tyen koc lite. Ka pe, ci wawangi woko ki mac wa ki jo me ot pa woru bene. Wun wulwongowa kany pi yako jamiwa woko bo?” 16Ci dako pa Samson ocako kok inyime kun waco bote ni, “In idaga giri, pe imara. Iwaco koc lit bot lutuwa kun bene pe itita te loke.” Ci Samson Ogamo doge ni, “Nen, yam pe atito bot wora wa maa bene, ci in aye dong abititi bo?” 17Dako obedo kakok bote pi nino abiro, kit ma karama obedo kwede; ci ikom nino me abirone otito bot dakone, pien onongo dong odiye matek. Dako ocito otito koc lit bot lutugi, 18ma omiyo jo me gang meno guwace tyen koc lite ma peya ceng opoto ikom nino me abirone, kun giwaco ni,

“Gin ango ma lim makato moo kic?

Gin ango matek makato labwor?”

En owaco botgi ni,

“Kono yam pe wubedo kapur ki royana,

kono pe wugonyo tyen koc lita.”

19Ci Cwiny pa Rwot obino opoto ikome ki tek. Ci ocito i Acikelon, oneko dano pyere adek ma i gang meno, oyako jamigi, omiyo bongigi mabeco me aruka pi nino madito bot jo ma gugonyo koc liti, ci en odok i paco pa wone ki twon akemo madwong. 20Ci kimiyo dako pa Samson woko bot lawote ma onongo obedo kangeteni ikare me nyom.