Lungolkop 13

Kinywalo Samson

1Jo Icrael dok gutimo gin manen marac iwang Rwot, ci Rwot omiyogi i cing jo Piliciti pi mwaka pyere angwen.

2Yam tye laco mo i Jora ma i kaka pa jo Dan, nyinge Manoa. Dakone onongo lalur, ma pe tye ki latin mo. 3Lamalaika pa Rwot onen bot dakone, ci owaco bote ni, “Nen, in lalur ma i peke ki latini mo. Ento ibiyac, ci ibinywalo latin laco. 4Pimeno myero igwoke, pe imat kongo bwino nyo gin ma mero dano, dok pe icam gin mo ma keni; 51pien, nen ibiyac, ci ibinywalo latin ma laco. Pe lyedi bigudu wiye, pien bibedo ajula pa Lubanga cake ki ikare ma kinywale, dok en bicako laro jo Icrael ki i cing jo Piliciti.” 6Dakonu ocito otito lok man bot cware ni, “Dano pa Lubanga obino bota kun wange nen calo wang lamalaika pa Lubanga; neno lik tutwal. Pe apenye kama oa iye, ki bene en pe otita nyinge. 7Ento owaco bota ni, ‘Nen, ibiyac i nywalo latin laco; pimeno pe imat kongo bwino nyo gin ma mero dano, pien latin meno bibedo ajula pa Lubanga cake ki ikare ma kinywale nio kwede wa inino me tone.’”

8Manoa olego Rwot kun waco ni, “Ai Rwot, alegi ba, wek dano pa Lubanga ma nene icwaloni odwog botwa, wek opwonywa ki gin ma myero watii ikom awobi ma koni kibinywaloni.” 9Lubanga owinyo koko pa Manoa, ci lamalaika pa Lubanga obino bot dakone doki ma en obedo katic i poto; ento cware Manoa onongo pe tye kacel kwede. 10Dako oringo oyotoyot, otito bot cware ni, “Dano ma nene onen bota ikare ca dok onen bota kombedi.” 11Ci Manoa oa cut ocito kun lubu kor dakone. Ka obino bot danoni, ci owace ni, “In aye i dano mayam iloko ki dakoni?” Ci en ogamo ni, “An.” 12Ci Manoa owaco bote kuman ni, “Ka loki dong ocobe kakare, kit kwo pa awobini bibedo ningning, dok en bitiyo kit gin ango?” 13Lamalaika pa Rwot odok iye bot Manoa ni, “Gin ducu ma dong awaco bot dakoni en ogwoki. 14Pe ocam gin mo ma oa ikom olok, pe omat kongo bwino nyo gin ma mero dano, pe ocam gin mo ma keni; wek en olub gin ducu mayam acike iye.”

15Manoa owaco bot lamalaika pa Rwot ni, “Wek kong wagali manok mo ba, pi yubu latin dyel mo piri.” 16Ento lamalaika pa Rwot owaco bot Manoa ni, “Kadi bed igala, pe abicamo camwu. Ento ka ibiyubu gitum awanga, ci dong itum bot Rwot.” Onongo Manoa pe ngeyo ni meno obedo lamalaika pa Rwot. 17Ci Manoa openyo Lamalaika pa Rwot ni, “Nyingi anga, wek ka loki ocobe kakare wamiyi deyo?” 182Lamalaika pa Rwot owace ni, “Pingo ipenyo nyinga? Nyinga obedo me aura tutwal.” 19Manoa otero latin dyel kacel ki gityer me moko kwon, ci otyero ikom pata got bot Rwot ma tiyo tice me aurani. 20Ka leb mac olyel ocito malo tung polo ki iwi keno tyer meno, ci lamalaika pa Rwot oito malo i leb mac me keno tyeri kun Manoa ki dakone gineno; ci gupoto piny aryeba ic.

21Lamalaika pa Rwot pe dok onen bot Manoa ki dakone tyen mukene, ma omiyo Manoa oniang ni en lamalaika pa Rwot. 22Ci Manoa owaco bot dakone ni, “Wan wabito ada, pien waneno Lubanga.” 23Ento dakone ogamo doge ni, “Ka onongo Rwot oyube me nekowa, kono pe ogamo gitum awangawa ki gityer me moko kwon ki i cingwa; dok kono pe onyutu botwa lok magi ducu, kadi tucu lok macalo magi.” 24Ka dako onywalo wode, ci ocako nyinge Samson. Ci awobi meno odongo kun Rwot miye gum. 25Cwiny pa Rwot ocako tic ikome wa ki i gony pa Dan ma ikin Jora ki Ecitaol kun loyo tame.