Lungolkop 12

Jeputa ki jo Epraim

1Jo Epraim guywayo mony, ikare ma gungolo loka, ci guwoto guo wa i Japon, ci guwaco bot Jeputa ni, “Pingo i cito kalweny ikom jo Ammon, kun bene pe imedo ki lwongowa wek wacit kwedi? Wabiwango wii woko i odi.” 2Ci Jeputa ogamo doggi ni, “An ki lwaka yam wabedo ki mone madit ki jo Ammon, ento ka alwongowu, wun pe wutwero lara ki i cinggi. 3Ka aneno ni pe wutwero lara, ci adyero koma angolo loka ca ikom jo Ammon, ci Rwot omiyogi i cinga. Pingo tin dok wubino bota kalweny ikoma?” 4Ci Jeputa ocoko jo Gilead ducu, ka en olwenyo ki jo Epraim, ci jo Gilead guloyo jo Epraim. Onongo ceng jo Epraim guwaco ni, “Wun jo Gilead ma wubedo ikin jo Epraim ki Manace, wun giwu jo Epraim aye mayam wuringo wularo komwu.” 5Ma omiyo jo Gilead gumako wang wat ducu me kulu Jordan pi gengo jo Epraim. Ka dano mo ikin jo Epraim ma oringo olaro kome owaco ni, “Wek angol akat loka ca,” ci jo Gilead giwaco bote ni, “In i jo Epraim?” Kace ogamo ni, “Pe,” 6ci guwaco bote ni, “Kong i wac Sibolet,” ci en waco ni, “Cibolet,” pien pe twero lwongone ma atir maber; ci cut kimake, kineke woko iwang wat kunu. Ci jo Epraim guto maromo alip pyere angwen wiye aryo inino meno.

7Jeputa obedo langolkop i lobo Icrael pi mwaka abicel. Ka Jeputa ma Lagilead oto woko, ci kiyike i gange ma i Gilead.

Ibijan, Elon, ki Abudon

8Dano ma olube me bedo langolkop i Icrael obedo Ibijan, dano me Beterekem. 9En yam tye ki awobene pyere adek, ki anyira pyere adek. Ci en omiyo anyirane kinyomogi i kaka mukene, dok okelo anyira ma i kaka mukene pyere adek pi awobene. Ibijan obedo kangolo kop i Icrael pi mwaka abiro. 10Ka Ibijan oto woko, ci kiyike i Beterekem.

11Ci Elon Lajabulon dok olubu kore, obedo langolkop i Icrael. En obedo kangolo kop i Icrael pi mwaka apar. 12Ka Elon Lajabulon oto, ci kiyike i Aijalon i lobo pa jo Jabulon.

13Ki i ngeye dok Abudon wod pa Ilel ma Lapiraton aye obedo langolkop i Icrael. 14Yam tye ki awobene pyere angwen ki likwaye pyere adek ma giwoto ki kanagi pyere abiro. Obedo kangolo kop i Icrael pi mwaka aboro. 15Ka dok Abudon wod pa Ilel ma Lapiraton oto, ci kiyike i Piraton ma i lobo Epraim, i lobo godi pa jo Amalek.