Lungolkop 11

Jeputa olaro jo Icrael ki i cing jo Ammon

1Ikare meno Jeputa ma Lagilead obedo twon oteka lweny. Wone nyinge Gilead, ento mine obedo dako ma lakwele. 2Dako pa Gilead ma kikwano ni dakone kikome bene onywalo awobe. Ka awobe pa dakonu gudongo, ci gin awobenu gutudu doggi wek giryem Jeputa woko, kun giwaco bote ni, “In pe ibileyo gin mo ma a i ot pa wonwa, pien in i wod pa dako mukene.” 3Ci Jeputa oringo woko ki bot omegine, ci ocito obedo gire i lobo Tob. Ki kunu lwak jo mogo ma kitgi obedo atata aye gucoke bote ci gucako tim me yak kwedgi.

4Ka kare dong okato malac, ci nen jo Ammon gucako lweny ikom jo Icrael. 5Ka meno otime, ci ludongo pa jo Gilead gucito i lobo Tob kaomo Jeputa. 6Ci guwaco bote ni, “Bin ibed latel wi monywa, wek walweny ki jo Ammon.” 7Ento Jeputa owaco botgi ni, “Yam wukwera woko, wun pe ceng oryema woko ki i ot pa wora, ka dok tin wubino bota pingo ma wutye ki can kumani?” 8Ci ludongo pa jo Gilead guwaco bot Jeputa ni, “Meno aye gin ma omiyo tin wadwogo botini, wek in icit kwedwa kalweny ikom jo Ammon, ci ibed ladit maloyo jo ducu ma gibedo i Gilead.” 9Ci Jeputa owaco botgi ni, “Ka wudwoka paco pi lweny ki jo Ammon, kace Rwot omiyogi i cinga, ci abibedo ladit maloyo wiwu.” 10Ludongo me Gilead guwaco bot Jeputa ni, “Rwot aye obedo caden ikinwa; ka dok onenwa ka pe wabitiyo kit ma iwaconi i ada.” 11Kitmeno Jeputa odok cen ki ludongo me Gilead, ci lwak guketo en me bedo lalo wigi ki latel wi monygi. Jeputa onwoyo loke ducu mayam owaconi inyim Rwot ki i Mijpa.

12Ci Jeputa ocwalo lukwena bot laloc pa jo Ammon kun waco ni, “An abalo gin ango boti, ma omiyo ibino kalweny ki lobonani?” 13Laloc pa jo Ammon ogamo dog lukwena pa Jeputa ni, “Pien ikare ma jo Icrael ceng gua ki i Ejipt gumayo lobona woko, cake wa ki i kulu Arnon o kwede wa i kulu Jabok ki i Jordan; ci ber tin wudwok lobona bota mot ki kuc.” 14Ci Jeputa dok ocwalo lukwena bot laloc pa jo Ammon, 15kun waco bote ni, “Jeputa owaco kit man ni, jo Icrael yam pe gumayo lobo pa jo Moab kadi lobo pa jo Ammon, 16ento ikare ma gua ki i Ejipt, jo Icrael guwok gubaro gigi dye tim oo wa i Nam Makwar, ka gucito i Kadec. 171Lacen jo Icrael gucwalo lukwena bot latel me Edom ma kun giwaco ni, ‘Ber iwek wawok wakat ki i loboni.’ Ento latel lobo me Edom okwero winyone. Dok gucwalo kit kwena acelu bene bot latel me Moab, ci en bene pe oye. Kitmeno omiyo jo Icrael gubedo gigi i Kadec. 182Ka dok guwoto gubaro dye tim, gurabo lobo Edom ki lobo Moab araba, ka guo kwede inget lobo Moab tung kunyango ci gugony loka kulu Arnon tungcel. Ento pe gudonyo i lobo Moab, pien kulu Arnon aye wang lobo pa jo Moab. 19Ci 3jo Icrael dok gucwalo kwena bot Cikon, laloc pa jo Amor, ma gang kale Kecbon. Ci jo Icrael guwaco bote ni, ‘Ber iwek wawok wakat ki i loboni, wacit i lobowa.’ 20Ento Cikon iye ogung ikom jo Icrael, omiyo pe oye ni guwok gukat ki i lobone omiyo Cikon ocoko jone ducu, ogurugi kacel, ci gugony i Jakaj, ci olwenyo ikom jo Icrael. 21Rwot Lubanga pa Icrael omiyo Cikon ki lwake ducu i cing jo Icrael, ci guloyogi. Kitmeno jo Icrael gucamo lobo pa jo Amor ducu mayam gibedo i lobonu, odoko meggi. 22Gucamo lobo pa jo Amor ducu cake ki i kulu Arnon o kwede wa i Jabok, ki dok cake ki i tim o wa i Jordan. 23Kitmeno Rwot Lubanga pa Icrael oryemo jo Amor woko ki i lobogi ki inyim jone Icrael, ci in dok i mito ile kakagi bo? 24Wun myero wucam lobo ma lubangawu Kemoc omiyowu me acama, ento wan wabicamo lobo ducu ma Rwot Lubangawa otyeko ryemo jo ma iye ki i nyimwa. 254In aye mono iber makato Balak wod pa Jipor, laloc me Moab? En yam otube ikom jo Icrael? Nyo en yam ocako lweny ikomgi? 26Ikare ma jo Icrael gubedo i Kecbon ki i gangi matino ma ingete, ki i Aroer ki i gangi matino ma ingete, ki i taun ducu ma i dog kulu Arnon pi mwaka miya adek kulu, pingo yam pe imayogi woko ikare ca? 27Kitmeno an gira pe atimo bal mo ikomi; in giri aye itima rac pi cako lweny ikoma. Rwot ma Langolkop aye ber dong ongol kop ma atir ikin jo Icrael ki jo Ammon tin.” 28Ento latel pa jo Ammon pe oketo cwinye ikom kwena ma Jeputa ocwalo bote.

29Ci Cwiny pa Rwot obino ikom Jeputa, omiyo obaro dye Gilead ki Manace, okato kwede wa i Mijpa ma i lobo Gilead. Ki kunu en dok okato kwede ikom jo Ammon. 30Jeputa onongo okwongo kwong bot Rwot kun waco ni, “Ka ibimiyo jo Ammon i cinga, 31ci ngat ma bikati woko ki i dogola oda ma bibino karwate kweda ma adwogo madong aloyo jo Ammon, en aye bibedo pa Rwot ci abimiye me bedo gitum awanga.” 32Kitmeno Jeputa ongolo loka kulu ikom jo Ammon kalweny kwedgi, ci Rwot omiyogi i cinge. 33Ci en onekogi cake ki i Aroer nio kwede wa i lobo macok ki Minit, taun pyere aryo madito, ki nio wa i Abel-keramim, kun ginekogi matek tutwal. Kitmeno Lubanga omiyo jo Icrael guloyo jo Ammon.

Nya pa Jeputa

34Ka Jeputa odwogo cen i pacone i Mijpa, ci nen, nyare okato woko karwate kwede ki ajaa ki myel. Nyare en acel keken, pe tye ki wode nyo nyare mo mukene. 355Ka oneno nyare, ci oyeco bongone woko pi cwercwiny kun waco ni, “Maa do, nyara! Ituru teka woko do, iketa i cwar can madwong kuman, pien onongo dong atingo doga bot Rwot ma dong pe atwero loko kwonga.” 36Ci nyare owaco boteni, “Wora, ka onongo itingo dogi bot Rwot, ci dong itima kit ma itingo ki dogini, pien Rwot dong oculu kwor ikom jo Ammon ma lumerokini.” 37Dok oloko ki wone, kun owace ni, “Kong itima man; wek abed pi dwe aryo, wek kong acit awire i kor godi, wek acit akok akum pi tidina, an kacel ki luwota, pien abito ma peya kinyoma.” 38En ogamo doge ni, “Citi.” Ci ocwalo nyare pi dwe aryo. Nyako ocito, en ki luwote, ci gukok iwi godi kun gikumu pi tidine. 39Ka dwe aryonu otum, odwogo cen bot wone, ci otime kit mayam okwongoni. Nyare yam pe obedo ki meye mo. Ci lok man dong odoko kit ki bot jo Icrael 40ni anyira Icrael yam gicito kakumu pi nya pa Jeputa ma Lagilead nino angwen i mwaka acel acel iwi godi.