Lungolkop 10

Tola ki Jair

1Ki inge Abimelek dano ma dok olaro jo Icrael en aye Tola wod pa Puwa, wod pa Dodo, ma jo Icakar. En yam bedo i Camir ma i lobo godi me Epraim. 2En obedo kangolo kop i Icrael pi mwaka pyere aryo wiye adek. Ka en oto woko, ci kiyike i Camir.

3Dano ma olubu kore en aye Jair ma Lagilead. En obedo langolkop i Icrael pi mwaka pyere aryo wiye aryo. 4En yam tye ki awobene pyere adek ma giwoto ki kanagi pyere adek. Dok gubedo ki gangigi pyere adek bene ma pud kilwongo ni Kavot-jair nio wa onyo, ma gitye i lobo Gilead. 5Ka Jair oto, ci kiyike i Kamon.

Jo Ammon guunu jo Icrael

6Jo Icrael dok gutimo gin manen marac inyim Rwot kun giworo jogi Baal mapatpat ki Acitarte, ki lubanga pa jo Ciria, jo Cidon, jo Moab, jo Ammon ki jo Piliciti; gubwoto lubu kor Rwot woko, ma pe dok bene guwore. 7Pimeno omiyo kiniga omako Rwot ikom jo Icrael, ci Rwot omiyogi woko i cing jo Piliciti ki jo Ammon. 8Jonu gunginyo jo Icrael kun bene giunugi matek ikare me locgi ducu. Ci gubedo kaunu jo Icrael ducu ma gibedo loka Jordan i lobo pa jo Amor matye i lobo Gilead pi mwaka apar wiye aboro kulu. 9Jo Ammon gungolo kulu Jordan kalweny wa ikom jo Juda bene, ki jo Benjamin ki jo me dogola pa Epraim, ma omiyo piny orem bot jo Icrael woko atikatika.

10Lacen jo Icrael gukok bot Rwot kun giwaco ni, “Dong wabalo ikomi, pien wabwoto in Lubangawa woko, kun waworo jogi Baal mapatpat.” 11Ci Rwot owaco bot jo Icrael ni, “Yam pe an aye alarowu ki bot jo Ejipt, jo Amor, jo Ammon ki jo Piliciti? 12Jo Cidon bene ki jo Amalek ki jo Maon yam guunuwu, ento ikare mayam wukok bota, ci alarowu ki i cinggi. 13Kadi bed kumeno, ci pud dok wubwota woko aye, kun wuworo lwak lubanga mukene. Pieno an pe dok abimede ki larowu. 14Wucit wukok bot lwak lubanga mayam wuyeroni. Wek gin aye gularwu ki ikare manongo piny orem kwedwu.” 15Ento jo Icrael guwaco bot Rwot ni, “Wan dong wapoto i bal adada, ci in dong i tim ikomwa kit ma i mito, ento walegi ni ilarwa tin.” 16Ci gucako bolo lwak lubanga pa lurok ma ikin gi ni woko; ka guworo Rwot; ci Rwot cwinye oton matek pi atwom ma jo Icrael gubedo kwede.

17Ikare meno jo Ammon guywayo mony, gugony i Gilead, ci jo Icrael gucoke kacel, gugony i Mijpa. 18Ludito pa jo Gilead gucako lok keken gi ni, “Dano mene ma bicako ki wan lweny ikom jo Ammon? Ci en bibedo lalo wi jo ma gibedo i Gilead ducu.”