Lungolkop 9

Loc pa Abimelek

1Ikare meno Abimelek wod pa Jerubaal ocito i Cekem bot jo paneyone ci otito botgi, ki bot jo ma i dogola pa minegi ducu ni, 2“Wuwac lok man bot jo ma i taun me Cekem ducu wek guwiny ni, ‘Mene maber ki botwu? Myero awobe pa Jerubaal ma giromo pyere abiro ni ducu gubed lulowu, nyo myero ngat acel aye olowu?’ Ento wiwu wupo ni, an a cogowu, dok a ringo komwu.” 3Jo paneyone guloko lok meno ducu pire, kun gin omiyo jo Cekem ducu guwinyo; ci cwinygi oloke kalubu kor Abimelek, pien guwaco ni, “En aye ominwa.” 4Gumiyo bote lim ryal pyere abiro ma kikwanyo ki i ot pa Baal-berit. En aye Abimelek obedo kaculu kwede jo ma kitgi atata ma lubwami ma guribe ikome. 5En ocito i gang pa wone i Opra, ci oneko omegine awobe pa Jerubaal, jo pyere abiro, ki ikom pata got mo acel. Ento Yocam wod pa Gideon matidine aye odong, pien onongo okane woko. 6Lacen jo Cekem ducu gubino gucoke kacel, gin kacel ki jo Bet-millo ducu, ci gucito guketo Abimelek me bedo laloc inget kworo ma i Cekem kama wir jok ocung i ngeteni.

Carolok ikom yadi

7Ka kitito loke bot Yocam, ci en ocito ocung malo iwi got Gerijim, ka odange matek kun waco botgi ni. “Kong wuwiny loka, wun jo Cekem, wek Lubanga bene owiny dogwu. 8Inino mo acel lwak yadi gucito kawiro moo ker ikom lalocgi. Ci guwaco bot yat jeituni ni, ‘In aye ilowa.’ 9Ento yat jeituni ogamo doggi ni, ‘Abiweko moona mabupi ma kimiyo kwede deyo bot lubangagu ki bot dano, wek acit alyere iwi yadi bo?’ 10Yadi dok guwaco bot oduru ni, ‘In aye ibin ilowa.’ 11Ento oduru ogamo doggi ni, ‘Abiweko nyiga mamiti ki mabeconi, wek acit alyere iwi yadi bo?’ 12Ka yadi guwaco bot olok ni, ‘In aye ibin ilowa.’ 13Ento olok ogamo doggi ni, ‘Abiweko kongo bwinona ma yomo cwiny lubangagu ki danoni, wek acit alyere iwi yadi bo?’ 14Ka dok yadi ducu guwaco bot abelwinyo ni, ‘In aye ibin ilowa.’ 15Ci abelwinyo owaco bot yadi ni, ‘Ka wutye kawira ki moo me bedo lalocwu ki cwiny me ada, ci dong wubin, wunong kalare ite tipuna; ento ka pe kumeno, ci wek mac oa ki bot abelwinyo owang yadi cedar me Lebanon woko.’”

16“Dong apenyo wun ba, ikare ma wuketo Abimelek me bedo laloci, yam wutiyo ki cwiny me ada, kun iwu leng? Yam wutimo Jerubaal maber mono, kacel ki jo me ode ducu, ma rwate ki tic ma mere macon ca? 17Pien i ada, wora olwenyo pirwu kun odyero kwone, en olarowu ki i cing jo Midian, 18ci tini wutware lijur kalweny ikom ot pa wora, ma wuneko awobene woko ma giromo pyere abiro ki ikom pata got acelu, ka dok wuketo Abimelek ma wod pa angecane aye me bedo laloc maloyo Cekem pi bedo watwu. 19Pimeno, ka wutiyo ki Jerubaal ki jo me ode ki cwiny me ada tini kun iwu leng, ci wubed ki yomcwiny ikom Abimelek, en bene cwinye obed yom ikomwu. 20Ento ka pe kumeno, wek mac obin oa ki bot jo Cekem ki Bet-millo, owang Abimelek woko.” 21Ka Yocam otyeko loko loke man en oringo gire woko kun laro kome, ci ocito wa i Beer, pi lworo omine Abimelek.

Kit ma Abimelek opoto kwede ki i loc i Icrael

22Abimelek oloyo jo Icrael pi mwaka adek. 23Lacen Lubanga ocwalo cwiny marac ikin Abimelek ki jo Cekem, ci jo Cekem gucako tim me robo dog ikom Abimelek. 24Kitmeno tim bwami mayam kitimo ikom awobe pa Jerubaal maromo pyere abiro ca obino ci opoto ikom Abimelek ma omingini mayam onekogi, jami man ducu otiine wek alii me remogi obed ikome ki ikom jo Cekem mayam gumiye tekcwiny me neko omegine. 25Jo Cekem guketo dano gubutu kakure i yoo matye iwi godi. Jonu gubedo kayako jo ducu ma giwoto gikato ki ingetgi i yoo kunu; ci Abimelek owinyo loke.

26Ikare meno Gaal wod pa Ebed odak kacel ki lutugi, gubino i Cekem, ci jo Cekem gugene. 27Gucito i potogi, ci gupwono nyig olok, ka gunyono, ci gubiyo pige, ikare ma guyubu nino madit, ci gucito gudonyo kwede i ot pa lubangagi, ka gucamo kun gumato ci guyeto Abimelek. 28Gaal wod pa Ebed owaco ni, “Abimelek kono anga? Wan jo Cekem wan angagi ka? Lok ango kono mamiyo waworo en? Wod pa Jerubaal ki Jebul latice yam pe guworo jo pa Kamor ma won Cekem? Pingo dok myero wabed kaworo en kono? 29Kono jo kany tye ite loca, kono akwanyo Abimelek woko. Kono awaco bot Abimelek ni, ‘Med monyi ci ikati woko kalweny kweda!’”

30Ka Jebul ma lalo taun madit meno owinyo lok pa Gaal wod pa Ebed, ci kiniga omake cut. 31Ci ocwalo kwena bot Abimelek i Aruma kun waco bote ni, “Nen, Gaal wod pa Ebed ki lutugi gubino i Cekem, gitye karubu taun maditi woko pi lweny ikomi. 32Pimeno wua woko, in kacel ki dul mony matye boti, ibin ibut ikurgi i poto. 33Odiko ka ceng pud tuc atucani, a woko con, ipot ikom taun madit meno. Ka en ki jo matye boteni gubino kalweny ikomi, ci in dong itimgi kitmeno ka komgi owec.”

34Abimelek ki jo ma gitye kwede ducu gua i dyewor, gucito gubutu pi lweny ikom Cekem kun onongo en opoko buca monye i dul angwen. 35I odiko me ninonu Gaal wod pa Ebed okato woko, ka ocung kama kidonyo kwede i dog gang; ci Abimelek ki dano ma gitye bote gua ki kama gubutu iye kakurugini. 36Ka Gaal oneno jonu tye katware bino abina ci en, owaco bot Jebul ni, “Nen dano ca ma gibino gilor piny ki iwi godi!” Ento Jebul owace ni, “In ibineno meri tipu godi macalo danoni.” 37Gaal dok owaco ni, “Nen, dano gitye kalor piny ki i dye lobo malo ca, kun buca acel bino a ki i tung te kworo wang ayweya ca.” 38Ci Jebul dok owaco bote ni, “Dogi dok tye kwene tin, in mayam iwaco ni, ‘Abimelek kono anga, wek wawore?’ Meno pe gin jo ma in icayogini? Kong ikat woko kombedi, wek icit ilweny kwedgi.” 39Ci Gaal ocako cito kun telo wi mony pa jo Cekem, ocako lweny ikom Abimelek. 40Abimelek ocako ryeme, ci en oringo olaro kome. Jo mapol gupoto ma ret omakogi, oo wa i dog taun madit meno. 41Abimelek odok obedo Aruma; ci Jebul oryemo Gaal ki lutugi woko, pe dok gubedo i Cekem.

42Orwone dok dano ma gibedo Cekem gua me cito i potigi, ci man bene kitito pire bot Abimelek. 43Cut en ocito ki jone, ma opokogi i buca mony adek, ci gubutu gukuru yoo poto. Ka guneno dano gibino gia ki i taun madit meno, ci gua gupoto ikomgi, gunekogi woko. 44Abimelek ki dul dano ma gitye bote gucore guringo anyim, gucung i dog taun madit meno kakuru kama gidonyo ki iyeni, kun buca mony aryo mukeneni gicore ikom jo ducu ma gitye i poto, ci gunekogi woko. 45Abimelek olwenyo ikom taun madit meno dyeceng benebene, ka omako woko, ci oneko jo ma gitye iye, omuku odigi woko liweng, ci opworo kado bene ikom ngom.

46Ka jo ducu ma gibedo Migdal-cekem guwinyo loke, ci gudonyo gucito wapiny i kicika ma kigolo matye i ot pa jokgi El-berit. 47Ci kitito bot Abimelek ni, nen ludongo ma i gangi ducu me Migdal-cekem gucoke kacel. 48Ci Abimelek ocito iwi got Jalmon, en kacel ki dul monye ducu ma gitye bote, ci Abimelek omako latong gaji i cinge, ocito otongo kwede rido yen, ka otingo iwi gwoke ci owaco bot dul monye ma gitye kwede ni, “Kit ma wuneno atimoni, wun bene wutim oyotoyot kumeno.” 49Kitmeno dano acel acel otongo rido yen, olubu ki kor Abimelek. Ci guketo iwi kabedo matek ma kigolo pinyi, ka gucwinyo mac ikom jonu, ma omiyo dano ducu ma gibedo i kabedo man me Migdal-cekem guto woko, i wel ma mito romo ka alip acel kulu, co wa ki mon.

50Abimelek dok ocito Tebej, ka oguru woko dyere, ci omako. 51Kunu yam tye iye ot matek ma ocudu malo i dye taun madit meno, ci lwak dano ma i gang ducu guringo gularo iye, co ducu wa ki mon, ci gucego wigi woko iye, gucito malo wa i dan ot ma ocudu maloni. 52Ento Abimelek ocito wa i ka ot ma ocudu maloni, en ocako lweny ikom kabedo meno matek, ci onyiko cok ki dogolane wek ecwiny woko ki mac. 531Ci dako mo obayo lakidi rego madit, ocelo ki wi Abimelek, otyero, obaro cogo wiye woko. 54Ci en olwongo awobi matingo jami lwenye oyotoyot, ka ocako waco bote ni. “A i wot pala lucwani ineka woko, wek pe dano guwac ni: ‘Dako mamwani aye oneke.’” Awobinu ocobo kome pil, ci oneke woko. 55Ka jo Icrael guneno ni Abimelek oto woko, ci guket, kun dano acel acel odok i gange. 56Kitmeno Lubanga oculu wang bal ma Abimelek otimo ikom wone pi neko omegine pyere abiro. 57Dok Lubanga bene odwoko tim pa jo Cekem maracenu ducu iwigi, omiyo lok pa Yocam wod pa Jerubaal ma ocenogi kwede ni ocobe ikomgi kakare.