Lungolkop 8

Guloyo jo Midian matwal

1Jo Epraim guwaco bot Gideon ni, “Itime ikomwa kuman pingo? Nen pe ilwongowa ikare ma onongo icito kalweny ikom jo Midian.” Ci gugere ikome matek. 2Ento en owaco botgi ni, “Gin ango ma tin atimo ma kiporo ki gin ma wun wutimo? Pe gwero kor olok pa Epraim ber makato olok ducu ma Abiejer opwono? 31Lubanga omiyo luker pa jo Midian i cingwu, Oreb ki Jeeb, ci gin ango ma an abedo katimo ma pore ki wun?” Ka oloko kitmeno, ci kinigagi ocako dok cen ikome.

4Ka Gideon obino i Jordan, okato loka ca, en kacel ki dano miya adek ma gitye boteni. Komgi ducu oloc woko, ento onongo pud giryemo kor jo Midian. 5Piman omiyo en owaco bot jo me Cukot ni. “Alegowu wumii mugati bot dano ma gilubu kora ni, pien komgi dong oloc woko, dok atye karyemo kor Jeba ki Jalmuna ma luker pa jo Midian.” 6Ento rwodi ma i Cukot gugamo doge ni, “En Jeba ki Jalmuna mono dong gitye i cingi bo, ma weko wan wamiyo mugati bot joni?” 7Ci Gideon ogamo doggi ni, “Ber yo, ka Rwot omiyo Jeba ki Jalmuna i cinga, ci abipwodo komwu ki okutu me tim ki okutu lango.” 8Ka oa woko ki kunu, ci ocito wa i Penuel, ci dok oloko kwedgi lakite acelu. Jo me Penuel bene guwace lok marom ki kit ma jo Cukot gudok iye bote. 9Ci Gideon owaco bot jo ma i Penuel ni, “Ka adwogo kany ki kuc, ci abimuku ot man ma ocudu maloni woko.”

10Ikare meno onongo Jeba ki Jalmuna gitye i Karkor, kacel kimonygi maromo jo alip apar wiye abic, gin jo ducu mayam gubwot ki ikom mony ducu pa jo me tung kunyango. Onongo dong kineko lumonygi maromo alip miya acel ki pyere aryo ma gin lwenyo ki pala lucwan. 11Gideon olubu yoo ma jo ma gibedo i kema gimaro wok ki iye ma wok ki inget Noba ki Jogbea tung kunyango, ci olwenyo ki monygi ma gutoyo tokgi ata. 12Ci Jeba ki Jalmuna guringo woko ci en oryemo korgi, omako gin luker pa jo Midian aryonu ducu, ci lok man okelo lworo ki atiba ikom monygi ducu.

13Lacen Gideon wod pa Yoaci odwogo ki i lweny kun lubu yoo ma giito iye i Kerec. 14Ki kunu en omako awobi mo ma Lacukot, openye, ci awobini ocoyo nying rwodi ki ludongo me Cukot ducu, ma giromo dano pyere abiro wiye abiro. 15Gideon obino bot ludongo me Cukot, ci owaco botgi ni, “Dong wunen Jeba ki Jalmuna mayam wungala pirgi kun wuwaco ni, ‘Jeba ki Jalmuna dong gitye i cingi bo, ma weko wamiyo mugati bot joni ma komgi oloc woko ni?’ ” 16Ci omako ludongo ma i taun madit meno, ka okwanyo okutu me tim ki okutu lango, opwodo kwede jo Cukot. 17Ka dok omuku ot ma ocudu malo ma i Penuel, ka oneko co ma i taun madit meno woko liweng.

18Ka dok owaco bot Jeba ki Jalmuna ni, “Jo mayam wunekogi i Tabor onongo gubedo kit dano ango?” Gudoke iye ni. “Kit ma itye kwedeni, gin bene onongo gitye kitmeno; ngat acel acel ikin gi onongo nen calo awobi pa ladit latela maber.” 19Gideon ogamo ni, “Gin omegina kikome, awobe pa maa. Macalo Rwot tye makwoni, kono yam pe wunekogi, kono pe anekowu bene.” 20Ka dok owaco bot wode Jeter ma latin kayone ni, “A malo, inekgi woko.” Ento latin awobi pe owoto pala lucwane, pien lworo omake woko; en onongo pud tidi mo. 21Ci Jeba ki Jalmuna guwace ni, “In aye ia malo kikomi, wek i nekwa; pien kit ma laco tye kwede, tek kome bene tye kitmeno.” Ma omiyo Gideon oa malo oneko Jeba ki Jalmuna woko, ci okwanyo mola cal dwe mayam guruku i ngut kinagagi.

22Inge meno jo Icrael guwaco bot Gideon ni, “Dong ibed lalocwa, in kikomi, ki wodi ki likwayi bene, pien ityeko larowa ki i cing jo Midian.” 23Ento Gideon owaco botgi ni, “An pe abiloyowu, ki woda bene pe biloyowu; Rwot aye biloyowu gire.” 24Ka dok Gideon owaco botgi ni, “Wek alegwu gin mo acel. Ber ngat acel acel omiya mola it me jabu ma oyako.” (Onongo lumerokgi gitye ki jabu me aruka i it, pien onongo gin jo Icmael.) 25Gugamo ni, “Wabimiyo ki yomcwiny.” Gupeto ginaruka piny, ci dano acel acel obolo iye jabu me it ma guyako. 26Pek me jabu me aruka i it ma en olegoni oromo cekel alip acel ki miya abiro, ma pe kiribo iye mola cal dwe, ki mola aruka maryeny aryenya, ki bongi aruka ma lamarlamar ma luker me Midian aye giruku, dok ma pe giribo iye mola ma gitweyo i ngut kinagagi. 27Gideon otimo ki epod, ka dok ocibo i gange matye i Opra, ci jo Icrael ducu guworo cal ateta meno ma ka woro Lubanga, ma omiyo oloke odoko owic me ciko Gideon ki jo me ode. 28Kitmeno jo Icrael guloyo jo Midian, ma pe dong guilo wigi malo me kelo ayela ikomgi matwal. Ikare pa Gideon lobo oywe woko ki i aroma ki lweny pi mwaka pyere angwen.

To pa Gideon

29Jerubaal, ma en aye Gideon wod pa Yoaci, ocito obedo i ode. 30Onongo Gideon ceng tye ki awobene pyere abiro ma gin nyodone kikome, pien en onongo tye ki mon mapol. 31Gideon obedo bene ki dakone ma angeca ma bedo i Cekem. Dakonu bene onywalo kwede latin laco ci Gideon ocako nyinge Abimelek.

32Gideon wod pa Yoaci oto madong otii woko likong kong, ci kiyike i lyel pa wone Yoaci i lobo Opra ma en taun pa jo Abiejer.

33Ka Gideon dong oto woko, cutcut jo Icrael guloke dok gucako woro jogi Baal mapatpat ma ka woro Lubangagi, ci guketo Baal-berit2 me bedo lubangagi. 34Jo Icrael pe dong gupo ikom Rwot Lubangagi, mayam olarogi ki i cing lumerokgi tungi ki tungi; 35dok pe gubedo ki cwiny maber bot lutino pa Jerubaal, ma en aye Gideon, pi gin ducu maber mayam en otimo pi jo Icrael.