Lungolkop 7

Jo pa Gideon guloyo jo Midian

1Jerubaal, ma en aye Gideon, ki jo ducu ma onongo gitye bote gua malo odiko con, ci gugony inget wang pii me Karod. Gony pa jo Midian onongo tye inyimgi tung kumalo, inget got More ki i nota.

2Rwot owaco bot Gideon ni “Jo ma gitye kwedini gipol mada ki tung bota. Ka abimiyo jo Midian i cinggi gibiwake gingwete ikoma ni meno ‘Cingwa ki komwa gire aye olarwa.’ 31Pimeno kombedi dong itit bot lwak ni, ‘ngat mo ma lworo omako, ma kome myel ber oa odok i gange.’” Kitmeno Gideon oomo cwinygi, ci dano alip pyere aryo wiye aryo gudok woko, ci dano alip apar gudong.

4Rwot dok owaco bot Gideon ni. “Itye ki lwaki pud pol mada; tergi i dog pii ci abiyekogi ki kunu ci ngat ma abiwaco ni, ‘Dano man bicito kwedi’ en aye bicito kwedi; ki ngat an abiwace ni, ‘Dano man pe bicito kwedi,’ en pe bicito kwedi.” 5Kitmeno Gideon otero dano i dog pii; ci Rwot owaco bote ni, “Dano acel acel ma bigweto pii ki cinge ka nango ki lebe macalo gwok nango kwede ibiketo en cung kene; ki ngat ma orumu conge piny kamato pii bene kitmeno.” 6Ci wel dano ma gugweto pii ki cinggi ka gunango ki lebgi macalo gwok guromo miya adek; ento lwak jo mudongi ducu gurumu conggi ka gumato pii. 7Rwot owaco bot Gideon ni, “An abilarowu ki jo miya adek ma gugweto pii ki cinggi ni ka gunango calo gwok, pi miyo jo Midian i cingwu. Dong iwek jo mukeneni ngat acel acel odok gire i pacone.” 8Gideon ogamo abino pa lwak woko ki i cinggi wa ki tumgi; ci ocwalo jo Icrael mudong i paco, kun dano acel acel cito gire i kemane. En odong ki jo miya adeki, kun gony pa jo Midian tye piny i nota.

9I dyewor meno Rwot owaco bote ni, “A malo, icit ilweny ikom gony pa jo Midian, pien dong atyeko miyone i cingi. 10Ento ka ilworo cito piny kunu keni, ci icit i gonygi kacel ki latici Pura. 11Ci ibiwinyo gin ma jonu giloko, ci lacen cwinyi bilimo tek me cito kamonyo gonygi.” En ocito piny ki latice Pura, ci guo i agiki gony kama lumony magi gubutu iye. 12Jo Midian, jo Amalek ki jo ducu ma gua tung kunyango onongo guryeyo gonygi i nota meno ma gumone macalo lwak bonyo; ki kinagagi bene welgi pe kwane, dok gipol macalo kweyo me dog nam. 13Ka Gideon oo, dano mo ocako tito leke mo bot lawote, kun waco ni, “Nen, aleko lek mo ni; mugati me cayiri ma olunge opoto i gonywa kun lor alora, obino kwede wa ikom kema, ci oreto kemawa woko piny, oloko ataro, ci kema opyele bene woko piny.” 14Ci lawote ogamo ni, “Man pala lucwan pa Gideon wod pa Yoaci, Laicrael; en enu kikome. Lubanga dong otyeko miyo jo Midian ki lwak monygi ducu woko i cinge.”

15Ka Gideon owinyo kit ma gitito kwede lek ki kit ma gigonyo kwede tere, ci en ogungo piny ka ocako miyo woro bot Lubanga. Lacen odwogo gin ki Pura latice i gony pa jo Icrael, ci owaco ni, “Wua malo, pien Rwot dong omiyo mony pa jo Midian woko i cingwu.” 16Ci Gideon opoko kin jo miya adeki i lwak buca mony adek, ka dok omiyo tum i cinggi ducu, ki abino ma igi nono, ki mac raa i abino ducu. 17Ka dok ocikogi ni, wacito wek warumu kema pa lumerokwa woko, ka dok owaco ni, “Wunena, ci wun bene wutim kit ma an abitimo kwede ka dong wao cok inget gonygi. 18Ka akutu tum, an kacel ki jo ma atye kwedgi ducu, ci wun bene wukut tum ma dong wurumu gony ducu dyere kun wudange ni, ‘Pi Rwot ki pi Gideon!’”

19Gideon ki jo miya acel ma gitye bote guo cok inget gony pa jo Midian ikine ka cawa me cwiny dyewor ma onongo pud guketo Lukurpiny aketa; ci gucako kutu tum ki tyero abino matye i cinggi ducu. 20Ci buca monygi adek ducu gukutu tumgi, gutyero abinogi woko ka gumako mac raa i cinggi ma lacam ki tum me akuta i cinggi ma lacuc, kun gidange kwede ni, “Pala lucwan pi Rwot ki pi Gideon!” 21Dano acel acel ocung mot i kabedone ma gurumu gonygi ducu, ci mony pa jo Midian guringo woko ducu; gucako dange, guringo kwede woko ata. 22Ka dano miya adek ca gitye kakutu tumgi, Rwot oloko pala lucwan pa jo Midian ikom lutugi keken gi ki ikom monygi ducu. Monygi oringo o wa i Bet-cita, ma tung Jerera, ki o kwede wa iwang lobo me Abel-mekola inget Tabat.

23Ci gulwongo jo Icrael ki i kaka pa Naputali, Acer wa ki pa Manace ducu, ci guryemo kor jo Midian. 24Gideon ocwalo kwena i lobo godi ducu me Epraim kun waco ni, “Wubin, wulweny ikom jo Midian, wukurgi iwang wat ducu o wa i Bet-bara ki i Jordan bene.” Kitmeno gulwongo jo Epraim ducu ci gumako wang wat ducu oo wa i Bet-bara ki Jordan bene. 25Ci gumako luker pa jo Midian aryo, Oreb ki Jeeb; ci guneko Oreb i pata got pa Oreb, ki Jeeb guneko i bur biyo olok pa Jeeb. Lacen gukelo wi Oreb ki Jeeb loka Jordan bot Gideon.