Lungolkop 6

Lubanga olwongo Gideon

1Ka jo Icrael dok gutimo gin manen marac inyim Rwot, ci Rwot omiyogi i cing jo Midian pi mwaka abiro. 2Jo Midian gubwoyo jo Icrael woko, ma omiyo jo Icrael guyubu kakanegi wa ikin godi, ki i boro wa ki i kabedo mogo ma kicelo matek, pi lworo jo Midian. 3Ikare ducu ma jo Icrael gicoyo iye kodi, en aye kare ma jo Midian ki jo Amalek ki jo ma tung kunyango gibino gicore kamonyogi. 4Jonu gitongo gonygi cok kwedgi, ka gibalo cam ma i potogi o kwede wa kamacok ki Gaja, kun pe giweko cam mo dong ma konyo bot jo Icrael, kadi wa ma romi nyo dyangi nyo kana gitwero camone i lobo Icrael. 5Gin gibino ki limgi makwo, wa ki kemagi; ma nongo gibino ma gucido piny woko macalo bonyo, ma kwanogi pe yot wa kikwano wel kinagagi loyo dano woko bene; ka gubino ci gibalo lobo woko liweng. 6Kitmeno jo Midian gumiyo piny orem ki bot jo Icrael woko, oweko jo Icrael gukok bot Rwot ni okonygi.

7Ikare ma jo Icrael gukok bot Rwot pi aroma pa jo Midian, 8ci Rwot ocwalo botgi lanebi, ma owaco botgi ni, “Rwot Lubanga pa Icrael owaco kit man ni, ‘Yam atelo wiwu akwanyowu ki i Ejipt ki i ot kol me bedo opii. 9Yam alarowu ki i cing jo Ejipt ki i cing jo ma gubedo kaunuwu ducu; aryemogi woko ki inyimwu kun amiyo lobogi botwu. 10Ikare ca awaco botwu ni an aye a Rwot Lubangawu, pe wubiworo lwak lubanga pa jo Amor ma kombedi wubedo i lobogini. Ento wun pe wumedo ki woro doga.’”

11Ikare meno lamalaika pa Rwot obino obedo ite kworo matye i Opra, gang pa Yoaci ma jo Abiejer. Ci wode Gideon onongo tye kadino ngano i bur biyo olok wek jo Midian pe gunene. 12Lamalaika pa Rwot onen bote, kun owaco bote ni, “Rwot tye kwedi, in twon oteka lweny.” 13Ci Gideon owaco bote ni, “Tima kica ba, ladit, ‘Ka Rwot tye kwedwa, pingo lwak jami magi maracuni ducu opoto ikomwa? Lwak tic ducu me aura mayam Rwot otiyo, ma kwariwa gutito botwa pire ni, dong tye kwene? Kiwaco ni yam Rwot aye okwanyowa ki i lobo Ejipt, ento kombedi Rwot dong obolowa woko tenge liyak, omiyowa i cing jo Midian.’” 14Ci Rwot oloke odok tung bote, kun wace ni, “Cit ki tek ma ikomini, wek icit ilar jo Icrael ki i cing jo Midian. An kikoma aye acwali.” 15Ci Gideon ogamo doge ni, “Tima kica ba, Rwot. An atwero laro jo Icrael ningning? Nen ba, kakawa tye matidi mo ikin jo Manace, dok an aye latin matidine ki i dogolawa.” 16Ci Rwot owaco bote ni, “Ento an aye abibedo kwedi; dok ibineko jo Midian ducu macalo obedo dano acel keken.” 17Gideon owaco ni, “Ka dong anongo gum ki boti, dong imiya lanyut mo ma moko ni in aye iloko kweda. 18Tim ber, pe kong ia woko ki kany nio ka abino boti kun akelo ki in mota me aketa inyimi.” Ci en ogamo doge ni, “Abibedo nio ka idwogo.”

19Gideon ocito i ode, ka otedo latin dyel mo, ki capat ma tobi pe iye ma kitedo ki moko kwon maromo debe aryo. Oketo ringo i aduku, oonyo pige i agulu, ka okelo odyero bot lamalaika pa Rwot ite kworo, kama en oketo inyime. 20Ci lamalaika pa Rwot owaco bote ni, “Kwany ringo ki capat ma tobi pe iyeni, i ketgi ikom pata got man, ka ionyo pige i wiye.” Gideon otimo kitmeno. 21Ka dong lamalaika pa Rwot ocwalo odoo matye i cinge, omiyo wiye ogudu ringo ki capat ma tobi pe iyeni. Ci mac olyel, oa ki ikom pata got, owango ringo ki capat ma tobi pe iyeni woko. Lacen lamalaika pa Rwot orwenyo woko ki i wange. 22Ma omiyo Gideon oniang ni man lamalaika pa Rwot; ci owaco ni, “Maa do, ai Rwot Lubanga! Pien nen dong aneno lamalaika pa Rwot wang ki wang.” 23Ento Rwot owaco bote ni, “Kuc obed boti. Pe ilwor; pe ibito.” 24Ci Gideon ocano keno tyer kunu pi Rwot, ocako nyinge ni, “Rwot aye Kuc.” Pud tye ocung i Opra, gang pa jo Abiejer wa onyo.

25I dyewor meno Rwot owaco bote ni, “Kwany twoni pa woru, twon me aryone myero mwaka me dite obed maromo abiro, ci i muk keno tyer pa jok Baal matye bot woru woko, itong yat ma kicomo ingete pi woro jok ma dako ma kilwongo ni Acera. 26Ci ican keno tyer pi Rwot Lubangani iwi lobo ma kitoro ma otinge malo, kun icano got kore kikore. Ka dong ikwany twon me aryone, ityer me gitum awanga; yat me awora ma ibitongo ireto woko pinyi bidoko yen me lawang gitum.” 27Kitmeno Gideon otero jo apar ki ikin lutice, otimo kit ma Rwot ocike kwede; ento pi lworo lutugi ki jo ma i taun meno pe otiyo i dyeceng, en otiyo i dyewor.

28Ka dano ma i taun meno gua malo odiko con, ci nen, keno tyer pa jok Baal kimuku woko, ki wir yat me woro jok ma dako Acera ma kangete bene kitongo woko, ki twon me aryone kityero woko iwi keno tyer ma kicanoni. 29Ci lwak gucako lok keken gi ni, “Anga mono ma otimo kuman ni?” Lacen ka dong gutyeko yenyo kore kun gipenyo dano, ci guwaco ni, “Gideon wod pa Yoaci aye otimo kuman.”

30Ci jo ma i gang meno guwaco bot Yoaci ni, “Kel wodi woko kany wek kineke, pien omuku keno tyer pa Baal woko, dok otongo wa wir yat me woro jok ma dako Acera ma kangeteni.” 31Ento Yoaci owaco bot jo ducu ma gurye cok ikome ni, “Wun aye wubilweny pi Baal bo? Wun wubicung ikome? Ngat ma bilweny pire kibineke woko i odiko. Ka en aye lubanga, wek en olweny gire kene, pien keno tyere aye dong kimuku woko.” 32Pimeno kicako nying Gideon ni Jerubaal inino meno, ma teloke ni, “Wek Baal olweny kwede,” pien omuku keno tyere woko.

33Ka dong jo Midian ducu ki jo Amalek ki jo ma tung kunyango gucoke, gungolo kulu Jordan ci gugony i nota me Jejreel. 34Ento Cwiny pa Rwot obino ikom Gideon; ka okutu tum ci jo Abiejer gucoke i kore. 35Ci ocwalo kwena oromo kin jo Manace ducu, gin bene gucoke i kore. Ka dok ocwalo kwena bot jo Acer, jo Jabulon ki jo Naputali; ci gucito karwate kwedgi.

36Ci Gideon owaco bot Lubanga ni, “Kace ibilaro jo Icrael ki i cinga kit ma iwaconi, 37ci nen, aketo yer romo piny i laro moyo en. Kace toyo opong i yer romo keken, kun i ngom ducu otwo woko, ci abingeyo ni ibilaro jo Icrael ki cinga, kit macalo iwaconi.” 38Ci obedo kitmeno. Ka oa malo odiko con, en obiyo yer romo, oliyo toyo ki i yer romo ma opongo awal kwon woko. 39Ka dok Gideon owaco bot Lubanga ni, “Pe kiniga omaki ikoma. Wek dok alok kuman tyen acel keken. Wek kong dok atem ki yer romo kicel. Alegi ni, wek yer romo keken aye obed ma otwo, ento toyo oluk ikom ngom ducu ma kenyo.” 40Ci Lubanga otimo kitmeno i dyewor meno; onongo yer romo keken aye otwo, ento ngom ducu toyo oluk iye.