Lungolkop 5

Wer pa Debora gin ki Barak

1Debora ki Barak wod pa Abinoam guwayo wer akero inino meno ni.

2“Luwimony gutelo wi Icrael,

dano gubino ma gudyero komgi keken gi; kipak Rwot!

3Wuwiny, wun luker!

Wuter itwu, wun luloc!

Abiywayo akero bot Rwot

abiwero ki dwon mamit bot Rwot Lubanga pa Icrael.

4Rwot, ikare ma ikato woko ki i Ceir,

ikare ma i coro ia ki i dye lobo Edom,

lobo ocako yenge,

polo bene ocwero pii;

i ada do, pol ocako cwer. 51

Godi guyenge ki inyim Rwot,

Cinai oyenge kuca ki inyim Rwot Lubanga pa Icrael.

6Ikare pa Camgar wod pa Anat,

ki ikare pa Yayeri,

luwot gubedo pe i yoo gudu,

jo ma giwoto me cito kamo giwire ki i yoo matino.

7Dano gutum woko ki i Icrael ikin paco,

gutum, gutum woko do, nio ka in Debora ibino,

i tuc ma in i mego me ada kikome i Icrael.

8Ikare ma guyero lubanga mogogu manyen,

ci mony oo wa i dog gang.

Kwot mo, onyo tong mo, yam onen ikin jo Icrael alip pyere angwen ni?

9Cwinya olwodo lok ikom luwimony pa Icrael

ma gudyero komgi ikin lwak.

Kipak Rwot!

10Wun lungwec ki kana ma tari,

wun lubed ikom bongi ma kideyo ma kwari,

ki wun luwot ki tyen i yoo,

wutit loke ba!

11Wuwiny dwon luwer kama gitwomo iye pii;

kunu gin pako kit ma Rwot oloyo ki mony,

ki kit ma jo Icrael guloyo ki lukworgi.

Ikarenu jo pa Rwot gucito piny wa i dog taun madito.

12Debora we, coo woko, coo woko!

Coo woko, coo woko, icak wer!

A malo, Barak, itel wi opiini ma iyako,

in wod pa Abinoam!

13Ludito ma odong gucako wot,

jo pa Rwot gucito kalweny pire ikom oteka.

14Jo Epraim gucito guo wa i nota,

i korwu wun jo Benjamin ki lutuwu;

luwimony pa jo Makir gubino piny,

lumak odoo ker gua ki i Jabulon.

15Rwodi pa jo Icakar gubino ki Debora.

Jo Icakar gucung matek ikom Barak;

ci gutware i kore wa i nota.

Ento jo me kaka pa Reuben

gubedo ki gung ic.

16Pingo ibedo i dye dwol romi,

kawinyo nyamulere ma gikutu i kor lim?

Jo me kaka pa Reuben gubedo ki gung ic.

17Gilead odong loka Jordan;

gin ango ma omiyo Dan obedo mere i mel?

Acer obedo mere mot i dog nam,

obedo kun otoyo toke iwang wate.

18Jo Jabulon aye lwak ma gudyero komgi i to;

ki jo Naputali bene iwi cere ma i dye bar.

19Luker gubino, gulwenyo.

Luker me Kanaan gulwenyo matek i karenu

i Taanak, inget pii me Megiddo,

ento pe gunongo lonyo me ayaka.

20Lakalatwe gulwenyo ki i polo,

gulwenyo ikom Cicera kun gilubu gergi.

21Kulu Kicon oterogi woko,

wi biamwonyi mageri, Kicon mageri.

Abimede kiwot anyim ki teka ducu!

22Aguragura gimoro piny ki obong tyen gi,

kun gipye, gikire kwede;

aguragurane gipye, gikire.

23Lamalaika pa Rwot owaco ni, kicen Meroj,

kicen lubedo iye matek,

pien pe guringo i oduru pa Rwot,

pi konyo Rwot ki lweny ikom oteka.

24Yayeri kimiye gum makato mon ducu,

dako pa Keber Lakenit;

ikin mon ducu ma gibedo i kema in lakome gum.

25Ka Cicera dok olege pii, ci en omiye cak,

okele cak lukulu i awal maber ma opore pi rwot.

26Omako loc kema i cinge,

cinge ma lacuc otingo nyol pa lutic;

ogoyo ki wi Cicera, otyero, ocanyo, otucu tur nyime pil.

27Okule piny, ci opoto, obutu lilwe katyene;

okule katyene, opoto;

opoto oto kama okule iyeni.

28Dako opiro wange ki iwang dirica

min Cicera okiyo ki iwang ot, kun owaco ni,

‘Pingo tin gadigadine pe tye kadwogo oyot ce?

Pingo tyen gadigadine pe mor bino oyot?’

29Ci mon ma luryeko ingete gudoke iye,

en bene ogamo doge kekene kun cuku cwinye ni,

30‘Koni gunongo lim, gitye kapokone, onyo

anyaka acel pi twon acel acel, nyo kidodo aryo;

bongo ma ngwalangwala pi Cicera, ma giyako,

bongo ma ngwalangwala ma kidero,

bongi aryo ma kidero me abola i nguta.’

31Lumeroki ducu myero gutum woko kitmeno, ai Rwot!

Ento luremi gubed macalo ceng matuc ki kerone.”

Inge meno lobo oywe pi mwaka pyere angwen.