Lungolkop 4

Debora ki Barak guloyo Cicera

1Ka Ekud dong oto woko, jo Icrael dok gutimo gin ma marac inyim Rwot. 2Man oweko Rwot omiyogi dok i cing Jabin laloc mo pa jo Kanaan mayam obedo kaloc i Kajor. Lawimonye nyinge Cicera, ma en bedo ki i Karocet-ka-goyim. 3Jo Icrael dok gukok bot Rwot ni okonygi, pien Jabin onongo obedo laloc magwa ikomgi kun en ounu jo Icrael matek pi mwaka pyere aryo kulu. En ceng tye ki gadigadi lweny me nyonyo miya abongwen.

4Ikare meno Debora, lanebi ma dako ma cware Lapidot, aye obedo langolkop pa jo Icrael. 5En nongo bedo ite otit pa Debora, matye ikin Rama ki Betel ma i lobo godi me Epraim, ci jo Icrael gibino bote wek en ongol ki gin kop. 6Inino mo acel Debora ocwalo kwena me lwongo bot Barak wod pa Abinoam ki i Kedec i lobo pa jo Naputali, kun waco bote ni, “Rwot Lubanga pa Icrael ociko in ni, ‘Cit i cok joni iwi got Tabor kun ikwanyo jo alip apar ki i kaka pa Naputali ki kaka pa Jabulon. 7Ci abiywayo Cicera, lawimony pa Jabin, akelo karomo kwedi i dog kulu Kicon kacel ki gadigadi lwenye ki buca monye ducu, ci abimiye i cingi.’” 8Barak owaco ki Debora ni, “Ka in aye ibicito kweda, ci abicito; ento ka in pe ibicito kweda, an pe abicito.” 9Debora ogamo doge ni, “An abicito kwedi ada; ento wot ma i cito iyeni deyone pe bibedo meri, pien Rwot bimiyo Cicera i cing dako.” Ci Debora oa, owoto ki Barak wa i Kedec. 10Ci Barak olwongo jo Jabulon ki jo Naputali ki i Kedec, ci jo alip apar gucito bote gulubu kore; kitmeno Debora bene ocito kacel kwedgi.

11Ikare meno onongo Keber ma jo Kenit opoke woko ki bot jo Keni mukeneni ma gin likwayo pa Kobab ma jo paoc Moses, ci onongo en oguru kemane kamabor inget yat kworo ma i Jaananim, macok ki Kedec.

12Ka kitito bot Cicera ni Barak wod pa Abinoam ocito i got Tabor, 13ci Cicera olwongo wegi gadigadi nyonyone ducu ma giromo miya abongwen, ki jo ducu ma gitye bote, ni gua ki i Karocet-ka-goyim gubin i kulu Kicon. 14Debora owaco ki Barak ni, “A malo, pien tin aye nino ma Rwot obimiyo iye Cicera i cingi. Rwot aye bitelo nyimi.” Kitmeno Barak ocako lor piny ki iwi got Tabor kacel ki dano alip apar ma gilubu kore. 15Ci Rwot obwango kom Cicera ki wegi gadigadine ducu, kacel ki monye ducu inyim Barak, ci guto ki ret me pala lucwan. Ento Cicera opye woko piny ki i gadigadine, oringo woko ki tyene. 16Barak olubu kor gadigadi ki monygi oo wa i Karocet-ka-goyim; mony pa Cicera kinekogi woko ducu ki pala lucwan, pe dano acel mo odong.

17Cicera oringo ki tyene nio wa i kema pa Yayeri, dako pa Keber ma jo Kenit; pien yam onongo kuc tye ikin Jabin laloc me Kajor ki jo me ot pa Keber ma Lakenit. 18Yayeri okati woko kajolo wiye ci owaco bote ni, “Loke idwog tung kany, ladita, pe ilwor.” Kitmeno omiyo Cicera odok bote wa i kemane, ci dakonu oume woko ki bongo. 19Cicera owaco bote ni, “Kong imiya pii mo manok me amata, pien orwo pii tye kaneka.” Dakonu oyabo dog opiru cak, omiyo en aye omato, ka dok oume woko. 20Ka Cicera dok owaco bote ni, “Cung i dogola kema. Ka ngat mo obino ce openyi ni, ‘ngati mo tye kany?’ Waci, ‘Pe.’” 21Ento Yayeri dako pa Keber okwanyo loc lagur kema, ka dok omako nyol i cinge, ci ocito bote mot, oguru loc i tur nyime tungcel, nio ka otuc pil wa i ngom, pien onongo en onino matek pi olo. Kitmeno omiyo en oto woko. 22Ci nen, ka Barak obino matye kalubu kor Cicera. Yayeri ocito woko kajolo wiye ci owaco ni, “Bin, wek anyuti dano ma itye kayenyoneni.” Odonyo i kemane, ci onongo Cicera oto woko, obutu piny kenyo kun loc ocung i tur nyime.

23Kitmeno Lubanga otayo Jabin laloc me Kanaan ki inyim jo Icrael inino meno, 24ci jo Icrael gumedo kerogi pi diyo Jabin laloc me Kanaan matek nio ka gutyekogi woko.