Lungolkop 3

Rok ma gudong pi temo jo Icrael

1Magi aye rok ma Rwot oweko gudong i lobo me temo kwede cwiny jo Icrael, makato ducu jo ma i Icrael ma peya gulwenyo lweny mo keken ki i Kanaan. 2En owekogi pi lok man keken wek yalwak ma i Icrael ducu gunyebe ki lweny; wek en opwonygi ki lweny, makato ducu jo ma yam pe gungiyo kwede. 3Magi en aye rok ma Rwot Lubanga oweko gudong i lobo me ginaleya pa jo Icrael. Jo Piliciti ki rwodigi abic, jo Kanaan ducu, jo Cidon ki jo Kiv mayam gibedo i godi me Lebanon, cake ki i got Baal-kermon o kwede wa i yoo ma donyo i Kamat. 4Gin aye gubedo me temo cwiny Luicrael pi ngeyo ka gibilubu Cik pa Rwot ducu mayam en ociko bot kwarigi ki i dog Moses. 5Kitmeno jo Icrael gubedo i dye jo Kanaan, jo Kit, jo Amor, jo Periji, jo Kiv ki jo Jebuc. 6Ci gucako nyomo anyiragi, ka dok gin bene gumiyo anyiragi bot awobegi wek gunyom; ci gin gucako woro lwak lubangagini.

Otiniel olaro jo Icrael ki i cing Kucan-ricataim

7Jo Icrael gutimo gin manen marac iwang Rwot, kun wigi bene owil woko ikom Rwot Lubangagi, ci guworo jogi Baal ki Aciterotgu. 8Pieno omiyo kiniga omako Rwot ikom jo Icrael, ci omiyogi woko i cing Kucan-ricataim laloc me Mecopotamia. Jo Icrael gutiyo bot Kucan-ricataim mwaka aboro. 9Ento ka jo Icrael gukok bot Rwot, en omiyogi dano mo ma olarogi, en aye Otiniel wod pa Kenaj, ma omin Kaleb matidine. 10Cwiny pa Rwot obino ikome, ci obedo kangolo kop i Icrael. Ka en ocito kalweny, Rwot omiyo Kucan-ricataim laloc me Mecopotamia i cinge, ci en obwoyo Kucan-ricataim woko. 11Kitmeno omiyo lobo Icrael oywe pi mwaka pyere angwen, ci lacen Otiniel wod pa Kenaj oto.

Ekud olaro jo Icrael ki i cing jo Moab

12Jo Icrael dok gutimo gin manen marac iwang Rwot, ci Rwot omiyo tek bot Eglon laloc me Moab wek olweny ikom jo Icrael, pien onongo gutiyo gin manen maracu iwang Rwot. 13Eglon ocoko jo Ammon ki jo Amalek, ci ocito kwedgi kalweny wek gilo jo Icrael, ci gin gumayo Jeriko taun madit ma kilwongo taun madit me otit woko. 14Jo Icrael gutiyo bot Eglon laloc me Moab pi mwaka apar wiye aboro kulu.

15Ento ka jo Icrael gukok bot Rwot, en omiyogi dano ma olarogi, en aye Ekud wod pa Gera ma jo Benjamin, dano ma lacam. Jo Icrael gumiyo en aye otero mucorogi bot Eglon laloc me Moab. 16Ekud oteto pala lucwane ma lake bit ryoryo ma bore romo puti acel ki nucu, ci orwako ite bongone, otweyo ikom eme tung lacuc, 17ocito otero mucoro bot Eglon. Eglon onongo obedo dano ma ocwe mada. 18Ka Ekud otyeko miyo mot me mucoro bot laloc meno, ci en ogonyo dano ma gutingo mot magi me cako wot me dok cen tugi. 19Ento en kikome, ka oo i godi ma kipayo apaya macok ki Gilgal, ocuku cwiny jo ma en owoto kwedgi me wot cito anyim. Ento en mere oloke odok cen bot laloc me Moab ka owace ni, “Atye ki lok mo me mung ma kicwala kwede boti, ladit.” Ka laloci ocako ciko jone ni, “Wuling kong ka dok owaco ni gukat woko!” Ci lwak lutice ducu ma gucung inyime gukato woko. 20Ka Ekud obino bote, onongo en obedo kene i kicikane mangic matye malo iwi ot. Ci Ekud owaco ni, “Atye ki kwena ma oa ki bot Lubanga ma akelo boti,” ci laloci oa malo ki iwi kome. 21Ekud oroyo cinge ma lacam, ka omako pala lucwane, ma owoto ki i eme tung lacuc, ocobo ki i ladit laloci. 22Lak pala odonyo wa ki bole libuc i iye, ci moo iye opuyu lak pala woko. Pe dok owoto pala lucwan woko ki i i ladit laloc meno, ci wee iye okati woko. 23Ekud okato woko ki kama kidonyo kwede i otti, ci oloro dogola me kicika me wi ot kama ladit laloci tye iyeni, ka otweyo woko.

24Ka Ekud dong ocito woko, ci lutice gubino. Ka guneno ni dogola me kicika ma iwi ot dong kitweyo woko, ci gubedo katamo ni, “Laditwa tye kakonye i ot matidi ma i kicika mangici.” 25Gubedo kakurune nio ka doggi otwo woko; ento ka en pud orii kun pe oyabo dogola me kicika me wi ot, gukwanyo layab, guyabo kwede, ci nen, rwotgi obutu i dye ot ma dong oto.

26Ma pud gigale, Ekud olwi oringo woko, okato wa inge godi ma kipayo apaya ca, en oringo olaro Ceira. 27Ka dong oo kunu, okutu tum i lobo godi me Epraim pi oto mony me Icrael pi lweny; ci gucito kwede gua ki i lobo godi, kun en aye telo wigi. 28Owaco botgi ni, “Wulub kora, pien Rwot dong otyeko miyo lumerokwu, jo Moab, i cingwu.” Gucito kwede, gumako wang wat me Jordan me gengo jo Moab; pe guye dano acel mo ongolo kulu. 29Ikare meno guneko jo Moab macok romo alip apar, ma gin ducu twoni co matego; acel mo pe obwot. 30Kitmeno gutayo jo Moab woko inino meno. Gubedo ite loc pa jo Icrael ci lobogi oywe pi mwaka pyere aboro.

Camgar olaro jo Icrael ki i cing jo Piliciti

31Ngat ma olubu kor Ekud obedo Camgar wod pa Anat ma oneko jo Piliciti miya abicel ki dim lalek dyang; en bene olaro jo Icrael.