Lungolkop 2

Lok pa lamalaika pa Rwot i Bokim

1Lamalaika pa Rwot oa ki i Gilgal ocito i Bokim, ci owaco bot jo Icrael ni, “Yam akwanyowu ki i Ejipt, ci akelowu wa i lobo mayam akwongo pire ni abimiyo bot kwariwu. Ci yam bene awaco ki wun ni, ‘Pe abituru gicikena kwedwu matwal, 21wun bene pe wuket gicike mo ikinwu ki jo ma gibedo i lobo man. Ki wubimuku keno tyer pa jogigi woko.’ Ento wun pe wulubu cika ma amiyo botwu nio wa tin, wun dong wutimo nge loka keken do! 3Kombedi dong awaco botwu kuman ni, pe dong abiryemogi woko ki inyimwu; gibidoko lumonewu, ki lubangagi bibedo owic me makowu.” 4Ka lamalaika pa Rwot oloko lok meno bot jo Icrael ducu, ci jo Icrael guwoo ki koko. 5Gucako nying kabedonu ni Bokim2 ci gutumu gitum bot Rwot kunu.

To pa Yocwa

(Yoc 24:29-31)

6Ka Yocwa dong olwongo lwak me cikogi ci gin ducu guket woko kun ngat acel acel cito i lobo me gin aleyane kacamone. 7Jo Icrael gutiyo bot Rwot ikare me kwo pa Yocwa ducu ki ikare pa ludongo ducu mayam gudong ka Yocwa dong oto, gin aye jo ma guneno tic madito ducu mayam Rwot otiyo pi jone Icrael. 8Yocwa wod pa Nun ma en latic pa Rwot oto woko ma mwaka me dite onongo oromo miya acel ki apar. 93Guyike ikom dul lobone kikome, i ginaleyane mayam kimiyo bote i Timnat-kerec i lobo godi pa jo Epraim ki tung kumalo me got Gaac. 10Ci yalwak meno ducu guto woko gudok bot kwarigi, yalwak mukene ma olubugi onongo pe gingeyo Rwot, kadi wa tic mayam Rwot otiyo pi jo Icrael.

Jo Icrael guweko woro Rwot

11Ka jo Icrael gucako tiyo gin manen marac iwang Rwot pi woro jogi ma nyinggi Baal. 12Gubwoto lubu kor Rwot Lubanga pa kwarogi woko, mayam okwanyogi ki i lobo Ejipt, ci gucako lubu kor lubanga mogo mukene ki ikin lwak lubanga pa rok mapatpat ma orumugi dyereni; ci guryebe wa inyimgi bene, man omiyo kiniga omako Rwot Lubangagi matek. 13Gubwoto Rwot Lubanga woko, ka gucako woro jogi Baal mapati ki jogi ma mon gu. 14Pieno kiniga omako Rwot Lubanga ikom jo Icrael ci omiyogi woko i cing luyak jamigi, ma gubedo kayako jamigi. Dok omiyogi woko ite twero pa lumerokgi ma orumugi dyere, omiyo pe dong gitye ki kero mo me cung inyim lumerokgi. 15Ka gin gucito kalweny ikare meno, ci Rwot obedo kakelo can ikomgi, kun lubu kit ma Rwot onongo okwongo kwonge botgi; ci piny orem kwedgi woko.

Tic pa lungolkop

16Lacen Rwot obedo kamiyo bot jo Icrael kare ki kare lungolkop ma gin oita lweny wek gulargi woko ki ite twero pa jo mayam ounugi kunu bene dok giyako jamigini. 17Ento kadi bed kumeno jo Icrael pe guworo dog lungolkopgi; gubedo kaworo lubanga mogogu kun gimede ki ryebewa inyimgi. Guloke dok gubare woko oyot ki i yo mayam kwarogi gulubu. Kwarogi onongo yam gulubu Cik pa Rwot, ento gin pe gulubu cike. 18Ikare ducu ma Rwot omiyo botgi Langolkop mo, ci Rwot bedo ki langolkop meno; ci Rwot obedo kalarogi ki i cing lumerokgi pi kare pa Langolkop meno ducu. Kica yam mako Rwot ikomgi kare ki kare ka gicur ikom jo ma unugi kun bene gidiyogi ki tek. 19Ento ka langolkop meno oto woko, ci gitare, gidok woko cen katimo tim maracu makato kwarigi ducu, kun gilubu kor lubanga mogogu mukene, dok giworogi ma giryebe bene piny inyimgi; pe gibwoto timgi mo, kadi wa kit ducu ma gibedo kalubu pi nwang ngutgini. 20Ma omiyo kiniga omako Rwot ikom jo Icrael, ci owaco ni, “Jo man guturu gicikena mayam acike kwede ki kwarigi, dok gukwero wa woro doga. 21Pimeno pe dong abiryemo rok mo woko ki inyimgi ma ikin lwak rok mapatpat mayam Yocwa oto owekogini, 22wek dong atem ki cwiny jo Icrael, anen ka gibigwoke kun gilubu yo pa Rwot macalo kwarigi yam gugwoke iye, nyo pe.” 23Kitmeno Rwot dong oweko rok meno ducu gubedo, pe dok oryemogi woko ducu lawangacel, kun onongo ceng en pe omiyogi ite twero pa Yocwa.