Lungolkop 1

Jo Juda ki jo Cimeon gumako Adoni-bejek

1Ka Yocwa dong oto, jo Icrael gucako penyo dog Rwot ni, “Anga ma bikwongo cito pirwa kalweny ikom jo Kanaan?” 2Ci Rwot ogamo ni, “Jo Juda aye gibicito, pien dong atyeko miyo lobo man ducu i cinggi.” 3Jo Juda dok guwaco bot omegigi jo Cimeon ni. “Wubin wunywak kwedwa wot i lobo ma kipoko botwa ki kwiri, wek walweny ikom jo Kanaan. Ka wanongo kabedo me yweyowa, ci wan bene wabinywako kwedwu i wot wu me cito kitmeno i lobo ma ki poko botwu wek wun bene onong kabedowu.” Ma omiyo jo Cimeon guteno kwot kwedgi. 4Ka jo Juda guoto mony ikomgi, Rwot omiyo jo Kanaan ki jo Periji i cinggi, ci guloyo dano alip apar i Bejek. 5I lweny meno jo Juda gurwate ki Adoni-bejek laloc madit me Bejek igange kunu, ka gulwenyo ikome ci gutaye woko omiyo guloyo jo Kanaan ki jo Periji malit. 6Ento ikare meno ka Adoni-bejek onongo ni lwenye odoko teke en oringo woko, ento gulubu kore, ci gumake, ka gungolo twoni cinge woko, ki twoni tyene. 7Ka man dong otime Adoni-bejek owaco lok man ni, “Yam luker pyere abiro ma kingolo twoni cinggi ki twoni tyen gi gubedo kacoko ngide cam ite mejana; kit mayam atimo ikomgini, Lubanga dong ocula kitmeno.” Ci kitere i Jerucalem, kama en oto ki iye.

Jo Juda guloyo Jerucalem ki Kebron

8Ka jo Juda dok gulwenyo ikom Jerucalem ci gumako woko. Jo Juda guneko jo matye iye ki pala lucwan, ka dok guwango taun madit meno woko ki mac. 9Ka lacen jo Juda dok gucito kalweny ikom jo Kanaan ma gibedo i lobo godi, ki i Negeb, ki i pwor got. 10Jo Juda gucito bene kalweny ikom jo Kanaan ma gibedo i Kebron, ci guloyo Cecai, Akiman ki Talmai. Taun madit ma kilwongo ni Kebron, yam nyinge obedo Kiriat-arba.

Otiniel omayo taun me Debir ci kimiye Akaca obed dakone

(Yoc 15:15-19)

11Ka gua ki kunu, gucito kalweny ikom jo ma gibedo i Debir. Nying Debir yam obedo Kiriat-ceper. 12Ci Kaleb owaco ni. “Ka ngat mo olwenyo ikom Kiriat-ceper ce omako, ci abimiye nyara Akaca wek obed dakone.” 13Otiniel wod pa Kenaj, ma omin Kaleb matidine, aye omako, ci Kaleb omiye nyare Akaca obedo dakone. 14Ka nyako ocito bot cware inino me nyome, ci cware odiye ki lok ni openy poto mo bot wone. Akaca ocito bot wone ci opye piny ki iwi kanane ci Kaleb openye ni, “Imito gin ango?” 15Nyare ogamo doge ni, “Miya mot mo do; macalo dong iketa wa i lobo Negeb, koni dok imiya wang it mo bene.” Kaleb omiye wang it matye ki malo ki wang it matye piny i kor got bene.

Kabedo ma jo Juda ki Benjamin gumayo

16Likwayo pa jo Keni, ma jo paoc Moses, gucito kacel ki jo Juda kun gia ki i taun madit me Otit, gucito wa i tim me lobo Juda matye i Negeb macok ki Arad; ci gucito gubedo kacel ki jo Amalek. 17Jo Juda gucito ilweny kacel ki omegigi jo Cimeon, ci guloyo jo Kanaan ma gibedo i Jepat. Ci gudyero taun madit meno woko i cing Rwot, ka dok gujwero woko; ma omiyo nying taun madit meno gulwongo ni Korma1. 18Juda dok omako Gaja ki lobo ma ingete, Acikelon ki lobo ma ingete ki Ekron ki lobo ma ingete. 19Rwot obedo ki kica ikom Juda, ma omiyo en otyeko camo lobo godi odoko mere; ento ryemo jo ma gibedo i bar oloye, pien onongo gitye ki gadigadi lweny me nyonyo. 20Kebron kimiyo bot Kaleb, kit mayam Moses ocikoni; ci en oryemo likwayo pa Anak adek woko ki kunu. 212Ento jo Benjamin pe guryemo jo Jebuc ma gibedo i Jerucalem, ma omiyo jo Jebuc gunywako kabedo i Jerucalem kacel ki jo Benjamin nio kwede wa onyo.

Likwayo pa Yucepu gumayo Betel

22Jo me ot pa Yucepu bene gucito kalweny ikom Betel, ci Rwot obedo kwedgi. 23Ci gin gucwalo lurotpiny i Betel, meno aye taun madit mayam kilwongo ni Luj. 24Ka lurotpiny guneno dano mo matye kabino kun oa ki i taun madit meno, ci guwaco bote ni, “Nyut botwa yoo me donyo i taun madit man ba, ci wabitimi maber.” 25Ka dong en onyutu botgi yoo me donyo i taun madit meno, ci nen gin guneko dano ducu ma gitye iye ki pala lucwan; ento guweko laco meno ki ludogolane gucito makwo. 26Dano meno ocito i lobo pa jo Kit, ci ogero iye taun madit meno, ci ocako nyinge ni Luj; meno aye obedo nyinge nio kwede wa onyo.

Kabedo ma jo Manace ki jo Epraim gumayo

273

Jo Manace pe guryemo jo ma gibedo i Bet-cean ki i taun gi matino ma ingete, kadi jo ma gibedo i Taanak, Dor, Ibleam ki Megiddo ki i taun matino ma ingetgi; ento jo Kanaan gucere ci gubedo i lobonu. 28Ka jo Icrael gudoko tek, ci gudiyo jo Kanaan ki tic muroni, ento pe guryemogi woko ducu. 294

Jo Epraim pe guryemo jo Kanaan ma gubedo i Gejer, ento jo Kanaan gubedo ikin gi i Gejer.

Kabedo ma kaka mukene gutero

30Jo Jabulon pe guryemo jo ma gibedo i Kitron, kadi jo ma gibedo i Nakalol; ento jo Kanaan gubedo ikin gi, ci guketogi i tic muroni.

31Jo Acer pe guryemo jo ma gibedo i Akko, kadi jo ma gubedo i Cidon, Aklab, Akijib, Kelba, Apik ki Rekob. 32Ento jo Acer gubedo ikin jo Kanaan ma gin wegi lobonu, pien pe guryemogi woko.

33Jo Naputali pe guryemo jo ma gibedo i Bet-cemec ki Bet-anat, ento gubedo ikin jo Kanaan ma gin wegi lobonu. Kadi bed kumeno, guketo jo Bet-cemec ki Bet-anat i tic muroni.

34Jo Amor gudiyo jo Dan, gudwokogi wa i lobo godi, pe guye ni gucit i bar. 35Jo Amor gucere gubedo i got Kerec, i Aijalon ki i Calabim. Ento jo ma i ot pa Yucepu gudiyogi matek, ka dong guketogi bene i tic muroni. 36Wang lobo pa jo Amor ocake kama kiito ki iye malo ki i Akrabim, wok ki i Cela ci cito ito kwede wa malo i godi.