ኢሳያሳ ቲንቢቴ

ኢሳያሳ ቲንቢቴ

ጊዶ ቆፋ

ኢሳያሳ ማጻፋይ ኪርስቶሲ ዬሌታናፔ ካሴ ኦስፑን ጼቱ ላይ ዉርሴ ሄራን ዲዛ ጊታ ናቤ ኢሳያሳ ሱንን ጼይጌቲዴስ፤ ሃይሲ ሃ ማጻፋዚ ሄ ኤሬቲዳ ኪፊሌታን ሻኬታናስ ዳንዳዬስ።

1. ሼም 1-39 ጋካናስ ዲዛ ኪፊሌዚ ዱጌሃ ባጋ ካዎቴ ዩሁዳ ዴሬ ቦላ ኣሶሬ ጌቴቲዛ ዎልቃማ ካዎይ ጋዳ ቆሆ ጊሻስ ዮቴስ፤ ዩሁዳ ዴሬ ሜቶን ዬጊዳይ ኣሶሬ ዎልቃ ጊዶንታ ዴሬዛ ናጋራኔ ኣሳይ ጾሳስ ኣዛዜቶንታ ኢጾ፤ ሄሳካ ኣሳይ ጾሳን ኣማኔቶንታ ኣጊዳይሳ ቤዪዴስ። ናቤዚ ዴሬዚኔ ዴራ ካሌዛይቲ ጺሎቴኮኔ ቱማቴ ዲዛሶ ሲማና ማላ ዮቲዴስ፤ ቃሴካ ጾሳስ ኣዛዜቶንታ ኢጾይ ፓጬኔ ይስ ኤሃናይሳ ኢስታስ ቆንጪሲዴስ፤ ሄሳካ ቡሮፔ ያና ላይታን ኣላሜ ዩሾን ሳሮቴ ኩማናይሳኔ ኩሜ ሎኤቴን ኣይሳናስ ዳዊቴ ዜሬፌ ካዎታናዴይ ያናይሳ ናቤ ኢሳያሲ ካሴቲ ዮቲዴስ።

2. ሼም 40-55 ጋካናስ ዲዛ ኪፊሌዛፔ ዳሪዛ ባጋይ ዩሁዳ ኣሳይ ዲኤቲ ባቢሎኔ ቢን ሄን ኢስታ ቦላ ካዉሻቴ ጋካናይሳኔ ሂዶታይ ኢስታስ ያናይሳ ዮቴስ። ናቤዚ ጾሲ ባ ዴሬዛ ዎዚን ኣሳይ ሎኦ ኦራ ዱስ ዳናስ ኢስታ ኢዚ ዬሩሳላሜ ዛራናስ ዎዴይ ማቲዳይሳ ዮቲዴስ። ሃይታ ሼምፖታ ጋርሳን ኬሂ ቆንጪ ቤቲዛ ኣይፌ ዮኦይ ጾሲ ሃኖ ኡባስ ኣዋ ጊዲዳይሳኔ ባ ዴራስ ኢዚ ሃልቺዳ ሃልቾይ፥ ጾሳ ኪታይ ኢስራኤሌ ኣሳ ባጋራ ዴሬ ኡባስ ጋካናይሳ ዮቴስ። «ጾሳ ኦሳንቻ ጊሻስ» ዮቲዛ ካሴ ጋልኣ ጫቆን ዲዛ ኤሬቲዳ ኪታታራ ኢሲፌ ቆዴቴቴስ።

3. ሼም 56-66 ጋካናስ ዲዛ ኪፊሌዛፔ ዳሪዛ ባጋይ ዮቲዛይ ጉዬ ባ ዴሬ ዬሩሳላሜ ሲሚ ቢዳይታ ጊሻሲኔ ጾሲ ኢስራኤሌ ኣሳስ ኢሚዳ ሂዶታ ቃላ ኡባ ፖላናኮ ጊዲ ናጌ ቦላ ዲዛ ኣሳስ ማርካ ጊዳና ማላሳ፤ ቲሺ ሂስቲ ጼላናስ ቤሲዛይቲ ጺሎቴኔ ቱማ ፒርዳ፥ ሳምባታ ቦንቾኔ ያርሾ ሺሾ፥ ቃሴካ ሚኒ ዎሶ። ሃይሳ ሃ ኪፊሌዛን ኤሬቲዳ ሼምፖይ 61፡1-2 ጊዲሺን ዬሱሲ ኮይሮ ኦሶ ኦይኪሼ ባ ጼይጌቴስ ማርካ ሺሺዳ ቃላቲ ዴቴስ።

ሃ ማጻፋይ ኦይኪዳ ኩሜ ቆፋ

ጊዶ ቆፋ

ዩሁዳ ጊሻሲኔ ኢስራኤሌ ጊሻስ ኣዳ ኪታታ

ኢሳያሳ ሃጋዞን ዲዛ ሃኖታታ

ዩሁዳ ጊሻሲኔ ኢስራኤሌ ጊሻስ ጉጄቲዳ ሃራ ኪታታ

ሃራ ዴሬታ ቦላ ጾሳ ቂጻቴ

ዋዬ ቦላ ዲዛ ጾሳ ዴሬስ ሂዶታ ኪታ

ጾሲ ማካሊዛ ባ ዴራ ቃጻያና ቃጻዮ

ጾሲ ኤዶሜ ቃጻዪዛዴኔ ዬሩሳላሜ ኣንጂዛዴ

ኣሶሬ፥ ባቢሎኔ፥ ካዎ ሂዝቂያሳኔ ኢሳያሳ

ጾሳይ ባ ዴሬ ኣሺዛዴ

ጾሳ ኦሳንቻ

ጾሳይ ባ ኢሚዳ ሂዶታ ናጊዛዴ

ዴሬይ ዉሪካ ጾሳ ባጋ ጊዳናስ ዳንዳዬስ

ዴሬ ኣይሲዛይታ ጊዲ ኡቲዲ ጾሳስ ኣዛዜቶንታይቲ ቃጻዬታና

ሲንፌ ያናስ ዲዛ ዬሩሳላሜ ቦንቾ ሂዶታ

ማላሊሲዛ ጾሳ ኦራ ሜቴታ