ኢሳያሳ ቲንቢቴ 25

ጾሳስ ሺቂዛ ጋላታ

1ኣቤት ጎዳዉ!

ኔኒ ታ ጾሳ።

ታኒ ኔና

ቁ ቁ ሂስታና፤

ኔ ሱንካ ሳባና።

ጋሶይካ ቤኒፔ ቆፌቲዳይሳ

ማላሊሲዛ ሃኖ ኩሜ

ኣማኔቴን ኦዳሳ።

2ኔኒ ካታማዮ

ሹቻ ዶሬ ኦዳሳ፤

ጊምቤቲዳ ካታማዮካ

ላላዳሳ፤

ሃይሳፌ ሲንን ጊምቤቲዳ

ኣላጋታ ካታማቲ ዴቴና፤

ሲሚዲ ሙሌካ ኦሴቴቴና።

3ሄሳ ጊሻስ ሚኖ ዴሬቲ

ኔና ቦንቻና፤

ሜንጼ ኢታ ካዎቴቲ

ኔስ ያያና።

4ኔኒ ሂዬሳታስ ዜምፖ፤

ሜቶታንቻታስ ሜቶ ዎዴ

ኔኒ ዜምፖ፤

ጎቴ ጫርኮፌ ጌሚ ኣቲዛሶ፤

ኣዋ ሴላፔ

ኩዋቲዛሶ ጊዳዳሳ።

ጋሶይካ ሜንጼ ኢታታ ፔኖይ

ኬ ጎዳራ ኢጬቲዛ

ጎቴ ጫርኮ ማላ።

5ባዞ ቢታ ሴላ ማላ።

ኣላጋ ኦቶሬቴ ዋሶ

ጮኡ ኦሳ።

ኣዋ ሴላይ ሻራ ኩዋን

ኢርጺዛ ማላ

ሜንጼ ኢታታ

ማዛሙሬ ሲርጲ ጋና።

6ጎዳይ ኡባፌ ዎልቃማ ጾሳይ

ሃይሳ ዙማ ቦላ ዴሬ ኡባስ

ጊዲዛ ጊታ ጊቢራ፥

ሎኢ ካጺዳ ዎይኔ ኡሹ፥

ሎኦ ኣሾኔ ዶሬቲዳ

ዎይኔ ኡሹ ጊጊሳና።

7ሃይሳ ሃ ዙማን

ዴሬ ኡባ ቦላን

ዎዳ ማጋላሻ፥

ካዎቴታ ኡባ ጎዚ

ኦይኪዳ ጎሳ ኢዚ ይሳና።

8ሃይቆ ኢዚ ሜርናስ ሚታና፤

ኡባ ሃሪዛ ጎዳይ

ኣሳ ኡባ ኣይፌፔ

ኣፉን ቁጫና፤

ባ ዴራ ካዉሻቴ

ቢታ ኡባፌ ዲጋና።

ሃይሳ ጎዳይ ሃሳይዴስ።

9ሄ ጋላስ ኢስታስ፥ «ቤኢቴ

ኑ ጾሳይ ሃይሳ፤

ኑኒ ኢዛን ኣማኔቲዶስ፤

ኢዚካ ኑና ኣሺዴስ፤

ሃይሲ ጎዳ፤

ኑኒ ኢዛን ኣማኔቲዶስ፤

ኢዚ ኣሺዳይሳን ኡፋዬቶስ፤

ኡፋይሳን ሆምቦጮስ» ጋና።

ሞኣቤ ቃጻዬቴ

10ጎዳ ኩሼይ

ሃ ዙማ ቦላ ሼምፓና።

ጊዶ ኣቲን ኡቱላይ

ኡርቃን ዬቲዛ ማላ

ሞኣቤይካ ዬታና።

11ሃ ዋዛይ

ባ ኩሼ ሚጪዛ ማላ

ኢዛ ጊዶን ዲዛይቲ

ባንታ ኩሼ ሚጫና፤

ጾሲ ኢስታ ጌኔ ኦሶ ባሌቶንታ

ኢስታ ኦቶሬቴ ካዉሻና።

12ኢስቲ ቁ ሂስቲ ጊምቢዳ ጊምቤዛ

ኢዚ ዱጌ ዚቂ ሂስታና፤

ዱጌ ዎና፤

ካዉሺዲ ዱጌ

ሳኣን ዎዲ

ጉዱላ ቦላ ዬጋና።