ጌሻ ማጻፋ
ኢሳያሳ ቲንቢቴ 56
ኣዛዜቲዛ ኡባስ ኢሜቲዳ ኣቶቴ
ጎዳይ፥ «ቱሙ ፒርዳ ናጊቴ፤
ሎኦ ኦቴ፤
ጋሶይካ ታ ኣቶቴይ
ማታን ዴስ፤
ታ ጺሎቴይካ
ኤሶን ቆንጫና።
ሳምባታ ቱኒሶንታ ቦንቺዛይ፥
ኢታ ኦሶፔ ባ ኩሼ
ሺሺዛይኔ ናጊዛይ፥
ሃይታንታ ፖሊዛይ
ኣንጄቲዳዴ» ጌስ።
ጎዳኮ ሺቂዳ ቤቴይ፥
«ጎዳይ ታና ባ ኣሳፔ
ቱሙ ሻካና» ጎፖ።
ጉንዱላይካ፥
«ታኒ ሜሊዳ ሚ» ጎፖ።
ጎዳይ፥ «ታ ሳምባታታ
ቦንቺዛ ጉንዱላታስ፥
ታና ኡፋይሲዛ ሚሽ ዶሪዛይታስ፥
ታ ጫቆ ቃላ ናጊዛይታስ፥
ታ ኬኒኔ
ታ ጊምቤታ ጊዶን
ኣቱማ ናይታፔኔ
ማጫ ናይታፔ ኣዛ
ሃሳኢሲዛ ሚሺኔ
ሱን ኢስታስ ኢማና፤
ሜርናስ ዮንታ ሱን
ታ ኢስታስ ኢማና።
ጎዳስ ሃጋዛናስ፥
ባና ጎዳራ ጋ
ዋጺዳ ቤቴ ኣሳታ
ጎዳ ሱን ሲቂዛይታኔ
ኢዛስ ጎይኒዛይታ፥
ሳምባታ ቱኒሶንታ
ቦንቺዛ ኡባታኔ
ጫቆ ቃላ ናጊዛይታ፥
ታኒ ታ ጌሻ ዙማ ቦላ
ኢስታ ኤሃና፤
ታ ዎሳ ኬ ጊዶን
ታ ኢስታ ኡፋይሳና።
ታስ ያርሾ ያርሺዛሶዛ ቦላን
ኢስቲ ሺሺዛ
ጹጌቲዛ ያርሾኔ
ሃራ ያርሾታ ታ ኤካና፤
ጋሶይካ ታ ኬይ
ኡባ ኣሳ
ዎሳ ኬ ጌቴታና» ጌስ።1
ላሌቲዳ ኢስራኤሌ ሺሺዛ፥
ኡባ ሃሪዛ ጎዳይ፥
«ሺቂዳይታ ቦላ ጉጃ፥
ታኒ ሃራታካ ዛራ ሺሻና» ጌስ።
ኢታታ ቦላ ጾሳ ዋላሴ
ኢንቴኖ ዶኣቶ፥
ኢንቴኖ ዎራ ዶኣቶ
ኡባይካ ሃ ዪቴ፤
ኢንቴ ኣቻራካ
ፑዜሬቴ።
ኢስራኤሌ ኣሳ ናጊዛይቲ ቆቄ፤
ኢስታስ ኤራቴ ዴና
ኢስቲ ኡባይ ቦጮንታ ካና ማላ፤
ቦጫናስ ዳንዳዬቴና፤
ኢስቲ ኢቺዲ ኣጉሜቴቴስ፤
ኢስቲ ስካንቻ።
ኢስቲ ጋንጃማ ካና ማላ፤
ሚዲ ካሊ ኤሬቴና።
ኢስቲ ኣኬካይ ባይንዳ
ሄንንቻታ፤
ኢስቲ ኡባይ
ባንታ ኦጌ ኦጌ ቤቴስ፤
ኢሶይ ኢሶይ ባ ጎኣ ጻላ ጼሌስ።
ኢስቲ ኢሶይ ኢሳራ፥
«ሃ ዪቴ፤
ዎይኔ ኡሹ ኣኔ ኡዮስ።
ኣኔ ማታና
ጋካናስ ኡዮስ!
ዎንቶይካ ሃቻ ማላ ጊዳና፤
ዎይኮ ሃቺፌካ ኣ
ሎኦ ጊዳና» ጌቴታና።
Source notes (1)
- Cross-reference ማቶ 21፡13፤ ማር 11፡17፤ ሉቃ 19፡46
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.