ኢሳያሳ ቲንቢቴ 55

ጾሳፌ ቤቲዛ ማሮቴ

1ጎዳይ፥ «ኢንቴኖ ሳሜቲዳይቶ

ኡባይካ ሃ ዪቴ!

ሃኮ ሃ ዪቴ፤

ኢንቴኖ ሚሺ ባይንዳይቶ

ሻሚቴ፤ ሚቴ።

ሃ ዪቴ፤ ሚሺ ባይንዳኔ

ቃንጾንታ ዎይኔ ኡሺኔ

ማ ሻሚቴ።1

2ጎኦንታ ካስ

ኣይስ ኢንቴ ሚሽ ይሴቲ?

ኢንቴና ካልሶንታ ሚሻስ

ኣይ ኤካናስ

ኢንቴ ዎልቃ ዉርሴቲ?

ሲዪቴ፤ ታ ጊዳዝ ሲዪቴ፤

ሎኦ ጊዲዳዝ ሚቴ፤

ሎኦ ቁማን ኢንቴና ኡፋይሲቴ።

3ኢንቴ ሃይ ዶይዲ

ሃ ታኮ ሺቂቴ፤

ኢንቴ ሼምፖራ ፓጻ ዳና ማላ

ታ ጊዛ ኤዝጊ ሲዪቴ፤

ካሴ ታ ዳዊቴራ ጫቂዳ

ሚኖ ሲቆን ኢንቴናራካ

ሜርና ጫቆ ጫቄታና።2

4ቤኢቴ፥ ታኒ ኢዛ ዴራስ ማርካ፥

ካሌዛዴኔ

ኦላ ጋዳዋ ኦዲስ።

5ቤኣ፥ ኔኒ ኤሮንታ

ካዎቴታ ጼይጋና፤

ኔና ኤሮንታ ካዎቴቲ

ኔኮ ኤሶን ያና።

ጋሶይካ ጎዳ ኔ ጾሳይ

ኢስራኤሌ ጌሻይ ባ ቦንቾን

ኔና ቁ ቁ

ሂስቲዴስ» ጌስ።

6ጎዳይ ቤቲዛ ዎዴ

ኢዛ ኮዪቴ፤

ማታን ዲዛ ዎዴ

ኢዛ ጼይጊቴ።

7ኢታ ኣሲ ባ ኦጌ፥

ቆሂዛይካ ባ ቆፋ ኣጎ፤

ጎዳኮ ሲሞ።

ኢዚካ ኢዛ ማራና፤

ኢዛ ማሮቴይ

ዳሮ ጊዲዳ ጊሻስ

ኢዚ ኑ ጾሳኮ ሲሞ።

8ጎዳይ፥ «ታ ቆፋይ

ኢንቴ ቆፋ ማላ፥

ኢንቴ ኦጌይካ

ታ ኦጌ ማላ ጊዴና።

9ሳሎቲ ሳኣፔ ቂዳ ማላ፥

ታ ኦጌይ ኢንቴ ኦጌፔ፥

ታ ቆፋይካ

ኢንቴ ቆፋፔ ቄስ።

10ኢራይኔ ሻቺ

ሳሎፔ ዎዲ

ቢታ ካልሲዲ፥

ቢታይ ሞኪሳና ማላኔ

ኣይፌ ኢማና ማላ፥

ዜሪዛዴስ ዜሬ፥ ሚዛዴስ ካ

ኢሞንታ ዲሼ

ጉዬ ሲሞንታይሳ ማላ፥3

11ታ ዶናፔ ኬዚዛ ቃላይካ

ጮ ሃዳ ሃ ታኮ ሲሜና፤

ጊዶ ኣቲን ኢዚ

ታኒ ኮዪዳይሳ ኦስ፤

ባ ኪቴቲዳ ዋና

ቆፋካ ፖሌስ።

12ኢንቴ ኡፋይሳን ኬዛና፤

ሳሮን ሞይዜታና።

ዙማቲኔ ዙምቡላቲ

ኢንቴ ሲንን

ኢሊሊሳራ ዬጻና፤

ዴምባን ዲዛ ሚቲ ኡባይካ

ባንታ ኩሼ ባቃና።

13ኣጉን ጊሻስ ጺዳይ፥

ኪንዲቾ ጊሻስ ባርሲኔቴ

ጌቴቲዛ ሚ ሞካና፤

ሄሲካ ጎዳ ሃሳኢሲዛ

ሚሺ ዮንታ ማላ

ሜርናስ ማላታ ጊዳና» ጌስ።