ኢሳያሳ ቲንቢቴ 57

ጺሎታ ጋኪዛ ሜቶ

1ጺሎ ኣሲ ሃይቄስ፤

ሄሳ ኦኒካ ዎዚናን ዎና፤

ጾሳስ ኣቂዛ ኣሳታ

ሼምፖይ ኤኬቴስ፤

ጺሎቲ ኢታፔ ኣታና ማላ

ኤኬቲዳይሳ ኦኒካ ኣኬኬና።

2ሱሬቴን ቢዛይቲ ሳሮን ጌላና፤

ሃይቂዲካ ባ ሂን

ሳሮን ሼምፓና።

ኢታታ ቦላ ያና ፒርዳ

3ጎዳይ፥ «ኢንቴኖ ማሮ ናይቶ፥

ኢንቴኖ ላጌዛይሳኔ

ላይማቲዛሪ ዜሬቶ፥

ኢንቴ ሃ ዪቴ።

4ኢንቴ ኦና ቦላ ቂልጬቲ?

ኢንቴ ኢንጻርሲ ኦና ቦላ ኬሴቲ?

ኢንቴ ማካላንቻታ ናይታኔ

ዎርዳንቻታ ዛሬ ጊዴኬቲ?

5ኢንቴ ዎላ ጋርሳኒኔ

ዳሻ ሚታ ጋርሳን

ዚታን ጹጌቲዛይታ ጊዴኬቲ?

ዙሌታኒኔ ዛላ ዛኣታ ጋርሳን

ኢንቴ ናይታ

ያርሺዛይታ ጊዴኬቲ?

6ሃኔ ዙሌን ዲዛ ሊቆ ሹቻቲ

ኔስ ኤቃ ጾሳታ፤

ኢስቲካ ኔ ቃዳታ፤

ቱሙካ ኔ ኢስታ ቦላ

ኡሻ ያርሾ ጉሳዳሳ፤

ካ ያርሾካ ሺሻዳሳ፤

ሂስቲን ሃ ዮኦታ ጊሻስ

ታ ጮኡ ጋኔ?

7ኔ ሂጻ ቁ ጊዳ

ኣዱሳ ዙምቡላ

ሁኤን ሂጻዳሳ፤

ሄን ኔ ያርሾ

ሺሻና ኬዛዳሳ።

8ኔ ፔንጌፌኔ ቆሲላፌ

ሶ ባጋራ ኤቃ ሚስሌታ ኤሳዳሳ።

ታና ኣጋዳ ኔ ሂጻ ቃራዳሳ፤

ኢዛ ቦላ ኬዛዳ ኬሃ ቃራዳሳ፤

ኔ ዶሲዳይታራ ቃላ ጊጋዳሳ፤

ኢስታ ካሎካ ቤኣዳሳ።

9ዎጋራ ዛይቴ ኤካዳ፥

ሺቶ ኢዛ ቦላ ጉጃዳ

ሞሎኬ ጌቴቲዛ

ኤቃ ጾሳኮ ባዳሳ፤

ኔስ ኪቴቲዛይታ

ሃኮ ዴሬ ኪታዳሳ፤

ዱጌ ሲኦሌ ጋካናስ

ካንዳሳ።

10ኔ ኦጌ ዳሮፔ

ዴንዲዳይሳን ዳቡራዳሳ፤

ጊዶ ኣቲን፥

‹ሂዶታይ ባዋ› ጋቤካ።

ኔ ዎልቃይ ሃ ኦራጺዴስ፤

ሄሳ ጊሻስ ኣርጋጫቤካ።

11«ኔኒ ታስ ዎርዶቲዳይ፥

ኦናስ ያያዳ?

ኦናስ ሂርጋዳ?

ኔ ታና ቆፖንታ ኣጊዳይ፥

ሃይሳካ ኔ ዎዚናን

ቁምኦንታ ኣጊዳይ፥

ታስ ኔ ያዮንታ ኢጺዳይ፥

ታኒ ጮኡ ጊዳ ጊሻስ ጊዴኔ?

12ታኒ ኔ ጺሎቴኔ

ኔ ኦሶ ቆንጪሳና፤

ኢስቲካ ኔና ጎኤቴና።

13ኔኒ ማዶ ዴማናስ

ዋሲዛ ዎዴ፥

ኣኔ ኔ ሺሺዳ ኤቃ ጾሳቲ

ኔና ኣሼቶ!

ኢስታ ኡባካ

ጫርኮይ ኤኪ ኤፋና፤

ጉ ፔኖይ

ኢስታ ላሊ ይሳና፤

ጊዶ ኣቲን ታና ባስ

ባቃታሶ ኦዳ ኣሲ

ቢታዮ ላታና፤

ታ ጌሻ ዙማዮ

ባስ ሚሽ ኦና» ጌስ።

ዎዚናይ ሜቂዳይታስ ኢሜቲዳ ሚን

14ጎዳይ፥ «ባሲቴ፥ ባሲቴ!

ኦጌ ጊግሲቴ፤

ታ ዴራ ኦጋፔ ጲዛ ሚሽ

ኡባ ዲጊቴ» ጌስ።

15ቁ ጊዳይሲ፥

ኡባ ሃሪዛይሲ፥

ኢዛስ ሱንይካ

ጌሽ ጌቴቲዳይሲ፥

ሜርናስ ዴኢዛይሲ፥

«ካዉዪዳይታ ኣያና

ዴንናስ፥

ዎዚናይ ሜቂዳይታ

ሚንናስ፥

ቁ ጊዳ ጌሻሶሆን

ታ ዴኣይስ፤

ቃሴካ ዎዚናይ

ሜቂዳይታራኔ

ኣያናን ኣሽኬ ጊዲዳይታራ

ታኒ ዴኣና።

16ኣሳ ኣያናይ ታ ሲንን

ዳቡሮንታ ማላ

ታ ሜዳ ኣሳስ

ፔኖይ ኤቆንታ ማላ

ታ ሜርናስ ዋላሲኬ፤

ታ ኡባቶ ሃንቄቲኬ።

17ኢዛ ናጋራ ጊሻሲኔ

ኢዛ ዪቄቴ ጊሻስ

ታ ሃንቄታዲስ፤

ታ ኢዛ ቃጻያዲስ፤

ታ ሲንካ ሃንቆን

ኢዛፔ ጌንዲስ፤

ጊዶ ኣቲን ሃኢካ ሲሚዲ

ኢዚ ባ ኦጌን ቢዴስ።

18ታኒ ኢዛ ኦጌታ ቤኣዲስ፤

ጊዲኮካ ታ ኢዛ

ፓናኔ ካሌና፤

ኢዛሲኔ ኢዛ ጊሻስ

ዬኪዛ ጌሻታ ታ ሚንና።

19ኢስራኤሌ ቢታን

ዬኪዛይታ ዶናን

ታ ጋላታ ዎና።

ማታኒኔ ሃሆን ዲዛይታስ

ሳሮይኔ ዎፓይ ጊዶ።

ታኒ ኢስታ ፓና» ጌስ።

20ጊዶ ኣቲን ኢታቲ ዳምባላይ

ኡርቃኔ ቡራ ኬሲዛ ማላ

ጮኡ ጋናስ

ዳንዳዮንታይሳ ማላ

ቡላኬቲዛ ኣባ ማላ።

21ታ ጾሳይ፥

«ኢታታስ ሳሮይ ባዋ» ጌስ።