ጌሻ ማጻፋ
ኢሳያሳ ቲንቢቴ 64
ኣቤት ጎዳዉ፥ ኔኒ ሳሎታ ዳካዳ ዱጌ ዎርኪ!
ዙማቲ ኔ ሲንን ኮኮሬቶ።
ቃይጻሬ ታማይ
ሃ ፔንቲሲዛ ማላ፥
ኔ ሞርኬታ ማታን ኔ ሱን
ኤሬታና ማላ ዎ፤
ካዎቴታካ
ኔ ሲንን ኮኮርሳ።
ካሴካ ኔኒ ኑ ቆፖንታ
ያሺሲዛ ሚሽ
ኔ ኦዳ ዎዴ
ኔ ዎን ዙማቲ ኮኮሪዳ።
ቤኒሶፌ ዶሚዲ ሂዶታ ኦ
ናጊዛይታስ ጋኪዛ
ማላታ ኦዳይ ኔፔ ኣቲን
ሃራ ጾስ ቤኢዳ ኣይፌይኔ
ሲዪዳ ሃይ ሙሌካ ዴና።1
ሱሬ ሚሽ ኡፋይሳን
ኦዛይታኔ
ኔ ኦጌ ቆፒዛይታ
ኔኒ ማዳሳ፤
ጊዶ ኣቲን ኑኒ ኢስታ ቦላ
ፓጬይ ባይንዳ
ናጋራ ኦዳ ጊሻስ
ሄኮ ኔኒ ኑ ቦላ
ሃንቄታዳሳ፤
ሂስቲን ኑኒ ዋኒ
ኣታና ዳንዳይዞኒ?
ኑኒ ኡባይካ
ቱና ኣሳ ማላ ጊዲዶስ፤
ኑ ጺሎቴ ኦሶ ኡባይ
ቱኒዳ ጫርቃ ማላ።
ኑኒ ኡባይካ
ቦንጮ ማላ ቆኪዶስ፤
ኑ ናጋራይ ኑና ጫርኮ ማላ
ፒቲ ኤፊዴስ።
ኦኒካ ዎሳን
ኔ ሱን ጼይጌና፤
ኔና ኦይካና
ፓጪዛይካ ዴና፤
ኔኒ ኔ ኣይፌሶ
ኑፔ ጌንዳሳ፤
ኑ ናጋራይ ኑና
ይሳና ማላ ኣጋዳሳ።
ጊዲኮካ ኣቤት ጎዳዉ፥
ኔኒ ኑስ ኣዋ፤ ኑኒ ኡርቃታ፤
ኔኒ ኑና ሜዳይሳ፤
ኑኒ ኡባይካ
ኔ ኩሼን ሜቲዳይታ።
ኣቤት ጎዳዉ፥ ኬሃ ሃንቄቶፋ፤
ኑ ናጋራካ ሜርናስ ቆፖፋ፤
ኑስ ዎሴታ፤
ኑ ኡባይ ኔ ዴሬ ጊዲዳ ጊሻስ
ኔ ኣይፌሶ ኑኮ ሃ ዛራ።
ኔ ጌሻ ካታማቲ ኣይኮይ ባይንዳ
ባዞ ጊዲዳ፤
ጺዮናካ ኣይኮይ ባይንዳ
ባዞ ቢታ ጊዳዱስ፤
ዬሩሳላሜይካ ዬጌታ ኣታዱስ።
ኑ ኣዋቲ ካሴ ኔና
ኢዛን ጋላቲዛ ጾሳ ኬይ
ታማን ጹጌቲዴስ፤
ካሴ ሎኦሶቲ ኡባቲካ ይዳ።
ኣቤት ጎዳዉ፥
ሃይሲ ኡባይ ሃኒንካ
ኔ ሲሚኪ?
ኔኒ ጮኡ ጋዳ ኑና
ዛዋይ ባይንዳ ቂጻቴ ቃጻያይ?
Source notes (1)
- Cross-reference 1ቆሮ 2፡9
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.