ኢሳያሳ ቲንቢቴ 63

ጾሳ ጾኖኔ ኢዚ ኣሺዛ ዎልቃ

1ኤዶሜ ቢታን ዲዛ

ቦጺራ ካታማፔ

ዞኦ ሴሎ ማይኦ ማይኢዲ

ዪዛይ ሄሲ ኢዚ ኦኔ?

ሃይሲ ቦንቾ ማይኢዲ

ባ ዎልቃ ጊታቴን ሄሜቲሼ

ዪዛይ ኢዚ ኦኔ?

«ጺሎ ሃሳይዛይኔ

ኣሻናስ ዎልቃይ ዲዛይ

ታና ጊዲኪና!» ጌስ ጎዳይ።

2ኔ ሴሎ ማይኦይ ዎይኔ ጉምኢዛ

ኣሳታ ማይኦ ማላ

ኣይስ ዞኢዴ?

3«ጉምኢዛሶሆዛን ዎይኔ

ታኒ ታርካ ዬዲስ፤

ካዎቴታፔ ኦኒካ

ታናራ ዴና፤

ታኒ ኢስታ ታ ሃንቆን ዬዲስ፤

ታ ባሻንካ

ኢስታ ዲርጼሬዲስ፤

ኢስታ ሱ ታ ሴሎ

ማይኦ ቦላ ጬቲዴስ፤

ታ ማይኦይ ኡባይ ሞሬቲዴስ።

4ታኒ ሃሎ ኬሳና

ጋላሳይ ታ ዎዚናን ዴስ፤

ታ ዎዛና ጋላሳይካ ጋኪዴስ።

5ታኒ ጼላዲስ ሺን

ማዲዛይ ቤቲቤና፤

ማዲዛዴይ ባይንዳ ጊሻስ

ታኒ ማላሌታዲስ

ታስ ኣቶቴ ኤሂዴስ፤

ታ ሃንቆይካ ታና ሚንዴስ።

6ታ ሃንቆን ካዎቴታ

ዬዲስ፤

ታ ባሻን ኢስታ ማሳዲስ፤

ኢስታ ሱካ

ቢታን ጉሳዲስ» ጋና።

ጾሳይ ኢስራኤሌስ ኦዳ ኪያቴ

7ጎዳ ኪያቴ፥

ጎዳይ ኑስ ኦዳ

ኦሶ ኡባ ጊሻስ፥

ኢዚ ጋላቴቲዛ

ኦሶዛ ጊሻስ፥

ኢዛ ሲቆዛኔ

ኢዛ ኪያቴ ኬና፥

ኢስራኤሌ ኬስ

ኢዚ ኦዳይሳ፥

ኤ ኢዚ ኦዳ

ሎኦ ኦሶታ ጊሻስ

ታ ዮታና።

8ጎዳይካ፥ «ቱሙካ፤

ኢስቲ ታ ዴሬታ፤

ኢስቲ ታስ ዎርዶቶንታ

ኣቱማ ናይታ» ጊዴስ።

ሄሳ ጊሻስ ኢዚ ኢስታ

ኣሺዛዴ ጊዲዴስ።

9ኢስታ ሜቶ ኡባን ጬጪዴስ፤

ኢዛ ዱሳ ኤሪሲዛ ኪታንቻይ

ኢስታ ኣሺዴስ፤

ኢዚ ባ ሲቆኒኔ

ባ ማሮቴን

ኢስታ ዎዚዴስ።

ካሴ ኣዳ ዎዴ ኡባን

ኢስታ ዴንዴሲኔ ቶኪዴስ።

10ኢስቲ ጊዲኮ ማካሊዳ፤

ኢዛ ጌሻ

ኣያናካ ሚሺሲዳ

ሄሳ ጊሻስ ኢዚ ሲሚዲ

ኢስታስ ሞርኬ ጊዲዴስ፤

ኢስታ ኦሊዴስ።

11ሄሳፌ ጉዬ ኣሳይ ቤኒ ዎዴዛኔ

ሙሴ ዎዴ ዩሺ ቆፒዴስ፤

ባ ዶርሳታ ሄንንቻታራ

ኡባፌ ኬሲዳይሲ

ኢዚ ኣዋን ዲዜ?

ባ ጌሻ ኣያና

ኢስታ ጊዶን ዎዳይሲ

ሃኢ ኣዋን ዲዜ?

12ቦንቼቲዳ ዎልቃማ ቄሴ፥

ሙሴስ ኡሻቻ ኩሼ

ቦላ ዎዴስ፤

ባስ ሜርናስ ሱን ኬሳናስ፥

ሃታ ኢስታ

ሲንን ሻኪዴስ።

13ፓራይ ኣይኮይ ባይንዳ ባዞ ቢታራ

ካን ቢዛ ማላ፥

ኢስታካ ጪማ ጊዶራ

ካሌ ፒንዴስ፤

ሄሳ ጊሻስ

ኢስቲ ጴቲቤቴና።

14ዱጌ ዙሌ ዎዛ

ሜሄ ዉዴ ማላ፥

ጎዳ ኣያናይ ኢስታስ

ሼምፖ ኢሚዴስ፤

ኢዚ ዴራ ሄሳ

ካሌዳይ፥ ኔ ሱን

ቦንቺሳናሳ።

ማዶ ዴማናስ ዎሲዛ ዎሳ

15ኣቤት ጎዳዉ፥

ዱማቲዳ፥ ቦንቼቲዳኔ

ቁ ጊዳ ኔ ኣራታፔ

ሳሎፔ ዱጌ ጼላ፤

ኔ ዎልቃይኔ

ኔ ሚሼቲዛ ሚሾይ ኣዋኔ?

ኔ ኣሽኬቴይኔ

ኔ ቃቴ

ኑፔ ሃኪዴስ።

16ኣብራሃሜይ ኑና ኤሮንታ ኣጊኮ፥

ኢስራኤሌይካ

ኑና ኣኬኮንታ ኣጊኮካ

ኔኒ ኑስ ኣዋ።

ኣቤት ጎዳዉ፥ ኔኒ ኑስ ኣዋ፤

ቤኒሶፌካ ዶሚዲ

ኔ ሱንይ ኑና ዎዚዛይሳ።

17ኣቤት ጎዳዉ፥

ኑኒ ኔ ኦጌፔ ኬዛና ማላ፥

ኑ ዎዚና ቱሊሳዳ

ኔስ ያዮንታ ማላ

ኣይስ ኦይ?

ኔ ኣይሌታ ጊሻስ ጋዳ፥

ኔስ ጺንጾ ጊዲዳ

ቆሞታ ጊሻስ

ጋዳ ኑኮ ሲማ።

18ጉ ዎዴስ ኔ ዴሬይ

ጌሻሶሆዛ ላቲዴስ፤

ሃኢ ጊዲኮ ኑ ሞርኬቲ

ኔ ኬ ዬዳ።

19ሄኮ ቤኒሶፌ ኑኒ ኔይታ፤

ጊዶ ኣቲን

ኢስታ ኔኒ ሃራቤካ፤

ኢስቲ ኔ ሱንንካ

ጼይጌቲቤቴና።