ጌሻ ማጻፋ
ኢሳያሳ ቲንቢቴ 62
ጺዮኒስ ኦራ ሱን
ኢዚ ጺሎቴ ማላዶ ፖኦ ማላ ጶላናሼ ጋካናስ፥
ኢዚ ኣቶቴ ጾምፔ ማላ
ፖኣናሼ ጋካናስ
ታ ጺዮኒ ጊሻስ ጮኡ ጊኬ፤
ዬሩሳላሜ ጊሻሲካ
ሲርጲ ጊኬ።
ካዎቴቲ ኔ ጺሎቴ፥
ካዎቲካ ኔ ቦንቾ ቤኣና፤
ጎዳይ ባ ዶናን ሱንዳ
ኦራ ሱንን
ኔ ጼይጌታና።
ኔኒ ጎዳ ኩሼ
ቦንቾ ኣኪሊሌ፥
ኔ ጾሳ ኩሼን ካዎታ
ካላቻ ጊዳና።
ሃይሳፌ ጉዬ ኔኒ፥
«ኣዚናይ ዬጊ ኣጊዳሮ» ጌቴታካ።
ቃሴ ኔ ቢታያካ፥
«ዬጌታ ኣቲዳሮ» ጌቴቱኩ።
ጊዶ ኣቲን፥
«ታ ኡፋይሲ ኢዚና» ጌቴታና፤
ኔ ቢታያካ፥
«ኣዚናይ ዲዛሮ» ጌቴታና፤
ጎዳይ ኔናን ኡፋዬታና፤
ኔ ቢታያካ
ኣዚናራ ዲዛሮ ጊዳና።
ፓን ጌላኦ ኤኪዛ ማላ፥
ኔ ናይቲ ኔና ኤካና፤
ሚሺራዚ ሚሺራይን
ኡፋዬቲዛ ማላ፥
ኔ ጾሲ ኔናን ኡፋዬታና።
ሃኔ ዬሩሳላሜ!
ናጊዛይታ
ኔ ዲርሳታ ቦላ ኤሳዲስ፤
ኢስቲ ጋላሲካ
ኦማርስ ጉዬ ጌቴና፤
ኢንቴኖ ጎዳኮ ዋሲዛይቶ፥
ሙሌካ ሼምፖፍቴ፤
ኢዚ ዬሩሳላሜ ሚንና
ጋካናሲኔ
ቢታ ኡባ ቦላ ኤሬቲዳ
ካታማ ኦና ጋካናስ
ኢዛስ ሼምፖ ኢሞፍቴ።
ጎዳይ ባ ኡሻቻ ኩሼኒኔ
ባ ዎልቃማ ቄሴን፥
«ሃይሳፌ ጉዬ ታ ኢንቴ ካ
ኢንቴ ሞርኬታስ
ቁማ ጊዳና ማላ ኢሚኬ፤
ቃሴ ኢንቴ ዳቡሪ ኬሲዳ
ኦራ ኡሻ
ኣላጋቲ ኡዬቴና።
ጊዶ ኣቲን ካ ሺሺዳይቲ ማና፤
ጎዳካ ጋላታና፤
ዎይኔ ቴራ ማጺ ሺሺዳይቲ
ታ ኬ ፔንጌን ኡያና»
ጊ ጫቂዴስ።
ኣቴ! ኢዛ ፔንጌታ ባጋራ
ካን ቢቴ፤
ዴራስ ኦጌ ባሲቴ፤
ጊግሲቴ፤ ሹቻታ ዲጊቴ፤
ካዎቴታስ ማላታ ኤሲቴ።
ቤኢቴ፥ ጎዳይ
ሳኣ ጋጻ ጋካናስ፥
«ጺዮኔ ማጫ ናይስ፥
‹ሄኮ ኔና ኣሺዛዴይ ዬስ፤
ኔ ዋጋይ ኢዛ ኩሼን ዴስ፤
ኔ ቃዳይ ኢዛኮን ዴስ› ጊቴ»
ጊዲ ኣዋጂዴስ።
ኢስቲ፥ «ጎዳይ ዎዚዳ
ጌሻ ዴሬታ፤
ኔካ ዬጌታ ኣቶንታሮ
ኮዬቲዛ ካታማዮ» ጌቴታና።
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.