ጌሻ ማጻፋ
ኢሳያሳ ቲንቢቴ 61
ኣቶቴ ሚሺራቾ
ኡባ ሃሪዛ ጎዳ ኣያናይ ታ ቦላ ዴስ፤
ሂዬሳታስ ሚሺራቾ
ዮታና ማላ፥
ጎዳይ ታና ቲይዴስ።
ኢዚ ታና ዎዚናይ ሜቂዳይታ
ኮላና ማላ፥
ዲኤቲዳይታ ላኣ ኬሳና ማላ፥
ቃሼቲዳይታስ ቢርሼ
ኣዋጃና ማላ ኪቲዴስ።1
ዶሴቲዳ ጎዳ ላይ፥
ኑ ጾሳይ ሃሎ ኬሲዛ ጋላሳ
ኣዋጃና ማላኔ
ዬኪዛይታ ኡባ
ሚንና ማላ
ታና ኪቲዴስ።2
ቃሴካ ጺዮኔን ካዮቲዛይታ
ዶሺሳና ማላ፥
ቢዲን ጊሻስ
ፑላቴ ካላቻ፤
ዬሆ ጊሻስ ኡፋይሳ ዛይቴ
ኢስታ ሁኤን ታ ጉሳና ማላ፥
ጬጬ ኣያና ጊሻስ ጋላታ ሴሎ
ታ ኢስታ ቦላ ጎጳና ማላ
ታና ኪቲዴስ፤
ኢስቲካ ኢዛ ቦንቾ
ቆንጪሳና ማላ
ጎዳይ ቶኪዳ ጺሎ ሚ
ጌቴቲ ጼይጌታና።
ኢስቲ ቤኒ ላሌቲዳይታ
ዛሪ ኬጻና፤
ካሴ ዎዴ ኩንዲዳይታካ
ዛሪ ኤሳና፤
ዳሮ ዬሌታታፔ
ካሴ ኩንዲዳይታኔ
ላሌቲዳ ካታማታ
ዛሪ ኬጻና።
ኢማቲ ኢንቴ ዶርሳ
ዉዴታ ሄማና፤
ኣላጋ ቢታ ኣሳቲ
ኢንቴ ጋዴኒኔ
ኢንቴ ዎይኔ
ኣታኪልቴ ጊዶን ኦና።
ኢንቴ ቃሴ፥ «ጎዳ ቄሴታ»
ጌቴቲ ጼይጌታና፤
ኣሳይካ ኢንቴና፥
«ኑ ጾሳ ኦሳንቻታ»
ጊዲ ጼይጋና፤
ኢንቴ ካዎቴታ ኣቆታ ማና፤
ኢስታ ዱሬቴንካ
ኢንቴ ጬቄታና።
ታ ዴሬይ ዬላቲዳይሳ ቆ
ናምኡ ኩሼ ኤካና፤
ካዉዪዳይሳ ቆ
ባንታ ጺንጾን ኡፋዬታና፤
ባንታ ቢታስ
ናምኡ ኩሼ ላታና፤
ሜርና ኡፋይሲ ኢስታስ ጊዳና።
ታኒ ጎዳይ ሱሬ ፒርዳ ዶሳይስ፤
ቦንቃኔ ቆሆ ኢጻይስ።
ታ ኣማኔቴን
ኢስታስ ቤሲዛይሳ ኢማና፤
ኢስታራ ሜርና ጫቆ
ቃላ ጌላና።
ኢስታ ዛሬቲ ካዎቴታ ጊዶን፥
ኢስታ ናይቲ ዴሬ ጊዶን
ኤሬቲዳይታ ጊዳና፤
ኢስቲ ቤኢዛ ኡባይ ጎዳይ ኣንጂዳ
ዴሬ ጊዲዳይሳ ኤራና፤
ታኒ ጎዳን ኬሂፔ ኡፋዬታይስ፤
ታ ሼምፖያካ
ታ ጾሳን ሆምቦጫዉስ፤
ሚሺራይ ባ ሁኤን
ካላቻ ጎጺዛ ማላ፥
ሚሺራያካ ባና ኢንቁን
ሴሌዛ ማላ
ኣቶቴ ማይኦ ታና ማይዚዴስ፤
ጺሎቴ ሴሎካ
ታ ቦላ ጎጲዴስ።3
ቢታይ ጫሬች ጫሪሲዛ ማላ፥
ኣታኪልቴሶሆይ
ፑቴ ፑቲሲዛ ማላ፥
ኡባ ሃሪዛ ጎዳይ
ካዎቴታ ኡባ ሲንን
ጺሎቴኔ ጋላታ ጫሪሳና።
Source notes (3)
- Cross-reference ማቶ 11፡5፤ ሉቃ 7፡22
- Cross-reference ሉቃ 4፡18-19
- Cross-reference ኣጁ 21፡2
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.