ጌሻ ማጻፋ
ኢሳያሳ ቲንቢቴ 50
ኢስራኤሌ ናጋራኔ ጾሳ ኣይሌ ኣዛዜቴ
ጎዳይ፥ «ታኒ ኢንቴ ኣዮ
ኣንጃ ዬዲዳ ዋራቃታይ
ኣዋን ዲዜ?
ዎይኮ ታ ኢንቴና
ኣይ ታልኣ ኤኪዳዴስ ባይዛዲና?
ቤኢቴ ኢንቴ ኢንቴ
ናጋራ ጊሻስ ባይዜቲዴታ፤
ኢንቴ ሞሮ ጊሻስ
ኢንቴ ኣያ ኣንጄታ ባዱስ።
ታኒ ዪዛ ዎዴ ሄን
ኣሲ ኣይስ ይዴ?
ታ ጼይጊዛ ዎዴ
ዛሮ ኢሚዛ ኣሲ
ሄን ዋኒ ይዴ?
ኢንቴና ዎዛና ሚሽ ጪጋናስ
ታ ኩሼይ ቃማዴ?
ዎይኮ ኢንቴና ኣሻናስ
ታስ ዎልቃይ ጉ?
ቤኢቴ ታ ሃንቆን
ኣባ ሜሊሳይስ፤
ሻፋታካ ባዞ ኬሳይስ
ኢስታን ዲዛ ሞሌቲ
ሳሞን ሃይቂዲ ዜቄቴስ።
ታኒ ሳሎ ሚሳና፤
ታኒ ኢዛ ማቃ ማይዛና» ጌስ።
ኡባ ሃሪዛ ጎዳይ ታስ
ኢንጻርሳ ኤራቴ ኢሚዴስ፤
ሄሳ ጊሻስ ዳቡራንቻታስ
ታ ኣይ ጋና ቤሲዛኮ ታ ኤራይስ፤
ማላዶ ማላዶ
ታና ቤጎስ፤
ታማርሼ ዲዛ ታማሬ ማላ
ሲያናስ ታ ሃይ ዶዬስ።
ኡባ ሃሪዛ ጎዳይ
ታ ሃይ ዶይዴስ፤
ታኒ ማካላንቻ ዲኬ፤
ጉዬካ ባቃታቤኬ።
ታ ዞኮ ሾጪዛይታስ፥
ታ ቡቻ ሾዲዛይታስ
ኣ ኢማዲስ፤
ታ ኣይፌሶ ጩቻፌ
ጌንቤኬ።1
ኡባ ሃሪዛ ጎዳይ
ታና ማዲዛ ጊሻስ
ታኒ ካዉይኬ፤
ሄሳ ጊሻስ ታ ኣይፌሶ
ዳልዳቻ ሹቻ ማላ
ኦዲስ፤
ታኒ ዬላቶንታይሳ ኤራይስ።
ታ ጺሎቴ ቆንጪሲዛዴይ
ታ ማታን ዴስ፤
ሂስቲን ታና ሞታና
ዳንዳይዛይ ኢዚ ኦኔ?
ኣኔ ኢሲፌ ቲራን ጋይቶስ!
ታ ባልጋራይ ኦኔ?
ኣኔ ሃዮ!
ቤኢቴ፥ ኡባ ሃሪዛ ጎዳይ
ታና ማዴስ፤
ሂስቲን ታ ቦላ ፒርዳናይ ኦኔ?
ቤኢቴ፥ ኢስቲ ኡባይካ
ማይኦ ማላ ጬጋና፤
ቢላይ ኢስታ ማና።2
ኢንቴ ጊዶፌ ጎዳስ ያዪዛይ፥
ኢዛ ኣይላ ቃላስ
ኣዛዜቲዛይ ኦኔ?
ሄሳዴይ ማን
ቢዛ ጊዲኮኔ
ፖኦይ ኢዛስ ባይንዳ ኣጊኮ
ኢዚ ጎዳ ሱንን
ኣማኔቶ፤
ባ ጾሳንካ ዜምፖ።
ሃኢ ጊዲኮ ኢንቴ ታማ ኤዲ፥
ላጪዛ ኢንቴ ጾምፔ ጾምፔ
ኦይኪዳ ኡባቲ
ኢንቴ ፖኦን ቢቴ፤
ኢንቴ ኦይዳ ጾምፔ
ፖኦን ሲሜሬቲቴ፤
ኢንቴ ታ ኩሼፔ
ኤካናይሲ ሃይሳ፤
ኢንቴ ኢታ ሜቶን ኩንዳና።
Source notes (2)
- Cross-reference ማቶ 26፡67፤ ማር 14፡65
- Cross-reference ኦሮ 8፡33-34
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.