ጌሻ ማጻፋ
ኢሳያሳ ቲንቢቴ 17
ዳማስቆ ቦላኔ ኢስራኤሌ ቦላ ጾሳ ቂጻቴ
ዳማስቆ ጊሻስ፥
«ቤኢቴ፥ ሃይሳፌ ሲንን
ዳማስቆ ካታማቴ ኣታና፤
ላሌ ዶሬ ጊዳና።
ኣሮኤሬ ካታማቲ ካይስ ጊዳና፤
ሜሄ ሄንሶሆ ጊዳና፤
ኢስታ ባቢሲዛ ሚሺካ ዴና።
ጊምቤቲዳ ካታማይ ኤፍሬሜፔ፥
ካዎቴ ማታይ
ዳማስቆፌ ያና፤
ኣራሜፔ ጫሻ
ኣቲዳይታ ቦንቾይ
ኢስራኤሌታይሳ ማላ
ካዉያና» ጌስ
ኡባፌ ዎልቃማ ጎዳይ።1
«ሄ ዎዴ ያቆቤ
ቦንቾይ ሻሩማታና፤
ኢዛ ሞቴይካ
ሹማና።
ካ ማጺዛዴይ
ኤቂዳ ካ ሺሺዲ
ሞ ባ ኩሼን ማጺዛ ማላ
ኤራፋይሜ ሾባፌ ማጼቲዛ
ፑሹሎ ማላ ጊዳና።
ዎጋራ ሚ ሾጪን
ናምኡ ዎይኮ ሄ ኣይፌቲ
ሃጋ ጼራ ቦላ ኣቲዛ ማላ
ኦይዱ ዎይኮ ኢቻሽ ኣይፌቲ
ፒ ጊዳ ሃጋታ ቦላ
ኣቲዛ ማላ
ጉ ሃጋቲ ኣታና»
ጊ ጎዳ ኢስራኤሌ
ጾሳይ ሃሳይዴስ።
ሄ ዎዴ ኣሳይ
ባና ሜዳይሳኮ ጼላና፤
ኢስታ ኣይፌይ
ኢስራኤሌ ጌሻኮ ጼላና።
ኢስቲ ባንታ ኩሼን ኦዳ
ያርሾሶሆታ ጼሌቴና፤
ኢስቲ ባንታ ኤቃታስ
ኤጻኔ ጩኣሲዛሶሆታሲኔ
ኣሼሪስ ጎይናና ኤሲዳ
ቱሳታስ ቦንቾ ኢሜቴና።
ሄ ዎዴ ኢስራኤሌ ኣሳ ጋሶን
ቦሼቶንታ ኣቲዳ ሚኖ ካታማቲ
ዎራኔ ኣይኮይ ባይንዳሶ ጊዳና።
ኔና ኣሺዛ ጾሳ ባላዳሳ፤
ኔ ኢዛን ቆቴታ ኣቲዛ
ኔ ዛላካ ኣኬካቤካ፤
ሄሳ ኔኒ ዶሬቲዳ
ኣታኪልቴ ቶኪኮካ፥
ኦራ ዜሬ ኔ ዜሪኮካ፥
ኔ ቶኪዳ ጋላስ
ኢዚ ሞካና ማላ
ኔ ኦኮካ፥
ኔ ዜሪዳ ዎንቴ ጋላስ
ኢዚ ጪያና ማላ ኔ ኦኮካ
ሄ ካይ ሃርጌኒኔ
ፓጾንታ ሳኮን ሙሌራ ያና።
ሞርኬ ካዎቴታ ጾኔቴ
ቤኣ፥ ዳሮ ኣሳ ሃንቆ ጊሪሲ
ኣባ ዳምባላ ማላ ጊሬስ፤
ቤኣ፥ ኣሳ ዋሶ ዳሮይ
ዎልቃማ ሃ ማላ
ጉሜስ።
ኣሳይ ዎልቃማ
ሃ ማላ ጉሚኮካ፥
ኢዚ ኢስታ ሴሪኮ
ዙምቡላ ቦላራ ጫርኮን ቢዛ
ጉዱላ ማላ
ጎቴ ጫርኮይ ላሊዛ
ሃፓ ማላ ላሌታና።
ሄኮ ሳኣይ ቃሚሺን
ቆፋይ ባይንዳ
ሺሮ ጊዲዴስ፤
ሳኣይ ዎንታናፔ ካሴቲዲ
ኦኒካ ቤቲቤና።
ኑ ኣቆታ ቦንቂዳይታ፥
ኡባ ዎልቃን ኤኪዛይታ
ቃዳይ ሄሳ።
Source notes (1)
- Cross-reference ኤር 49፡23-27፤ ኣሞ 1፡3-5፤ ዛካ 9፡1
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.