ጌሻ ማጻፋ
ኢሳያሳ ቲንቢቴ 29
ዳዊቴ ካታማስ ኣዬ ኣና
ሃኔ ዳዊቲ ኔናን ዴኢዳ
ኣርኤሌ ካታማዬ!1
ኔና ኣዬ ኣና!
ላይ ቦላ ላይ ጉጃ፤
ባኣሌታካ ዛራ
ዛራዳ ቦንቻ።
ጊዶ ኣቲን ታኒ
ኣርኤሌ ካታማዮ ጊዶና፤
ኢዛ ዬካናኔ ዋሳና፤
ኢዛ ታስ ያርሾ
ያርሺዛሶ ጊዳና።
ታኒ ኔ ዩሾን ዱንካናና፤
ታ ኔ ዩሾን ጊምቤ
ዩሻ ኣና፤
ኔ ዩሾን ሻኮ ኦዳ
ታ ኔና ኡንኤና።
ኔኒ ዱጌ ዎና፤
ቢታ ጋርሳፌ ፑዴ ሃሳያና፤
ኔ ሃሳያይ ጉዱላ
ጊዶፌ ኬዛና፤
ኔ ጬንጉርሲ
ሞይቲሌ ጬንጉርሳ ማላ
ቢታ ጋርሳፌ ፑዴ ኬዛና፤
ኔ ሃሳያይካ
ጉዱላ ጊዶፌ ሳሱኬታና።
ጊዶ ኣቲን ዳሮ ኔ ሞርኬቲ
ጉዱላ ሱላ ማላ፥
ሜንጼ ኢታቲ ጫርኮን ቢዛ
ሃፓ ማላ ጊዳና፤
ቆፋይ ባይንዳ ዲሺን፥
ኡባፌ ዎልቃማ
ጎዳይ ዳዳን፥
ቢታ ቃን፥
ጊታ ጬንጉርሳን፥
ጎቴ ጫርኮኒኔ ዎልቃማ
ኣባ ዳምባላን
ኡባ ሚዛ ታማ ላጮን ያና።
ኣርኤሌ ኦሊዛ ካዎቴታ
ኡባ ዉዴይ
ኢዚ ቦላኔ ኢዚ ሻኮ ቦላ
ዳፋ ዬጊዛይቲኔ ዶዲዛይቲ፥
ኣጉሞ ማላኔ ኦማርስ ቤቲዛ
ኣጁታ ማላ ጊዳና።
ጋፊዳ ኣሲ ኣጉሞራ ሚሼ ኣቄስ፤
ጊዶ ኣቲን ኢዚ
ስኮፌ ዴንዲሺን
ጋፋይ ኣጎንታይሳ ማላ፥
ሳሜቲዳ ኣሲ
ኣጉሞራ ኡዪሼ ኣቄስ፤
ጊዶ ኣቲን ቤጊሺን
ዳቡራይኔ ሳሞይ
ኢዛ ኣጎንታይሳ ማላ
ጺዮኔ ዙማ ኦሊዛ
ካዎቴታ ኡባ ዉዴይ
ሄሳ ሃናና።
ጾሳ ኣዛዞ ኢጾይ ኤሂዛ ቂጻቴ
ዳማቲዲ ማላሌቲቴ፤
ኢንቴና ኢንቴርካ ቆቂሲዲ
ቆቄ ጊዲቴ።
ጊዶ ኣቲን ዎይኔ ኡሹ
ኡዮንታ ጮ ማቲቴ፤
ማሲዛ ኡሹ ኡዮንታ
ዲሼ ጋንዲጋርቴ።
ጎዳይ ኢንቴ ቦላ ዎልቃማ
ስኮ ዬጊዴስ፤
ኢንቴ ናቤታ ኣይፌ ጎዚዴስ፤
ኣጁታ ቤኢዛይታ
ሁኤ ጉሉንቲሲዴስ።2
ሃ ኣጁታይ ኢስታስ ጻ ማጻፋ ጊዶን ጎርዴቲ ዲዛ ቃላ ማላ ጊዲዴስ። ሃ ጻ ማጻፋ ናባባናስ ዳንዳይዛ ኣሲ፥ «ሾቤ ኑስ ናባባ» ጊዲ ኢንቴ ኢሚኮ፥ ኢዚ ኢንቴስ፥ «ጎርዴቲዳ ጊሻስ ታኒ ናባባናስ ዳንዳይኬ» ጋና። ቃሴ ጻ ማጻፋ ናባቦ ዳንዳዮንታ ኣሳስ፥ «ሾቤ ኑስ ናባባ» ጊዲ ኢንቴ ኢዛስ ኢሚኮ ኢዚ ኢንቴስ፥ «ታ ናባቦ ዳንዳይኬ» ጋና።
ጎዳይ፥
«ሃይሲ ዴሬይ ዶናን ጻላ
ታኮ ሺቄስ፤
ባ ሜቴርሻን ጻላ
ታና ቦንቼስ፤
ጊዶ ኣቲን ኢዛ ዎዚናይ
ታፔ ሃኮን ዴስ።
ኢስቲ ኣሲ ታማርሲዳኔ
ኣሲ ዎዳ ዎጋን
ታስ ጎይኔቴስ።3
ሄሳ ጊሻስ ታኒ ሃ ኣሳ ቦላ
ማላሊሲዛ ሚሻ ቦላ
ማላሊሲዛ ሚሽ ኦሼ
ዛራ ዛራ ኢስታ ማላሊሳና፤
ኣ ኤራንቻታ
ኤራቴ ያና፤
ኣኬካንቻታ ኣኬካይካ
ፔንቲ ባና» ጊዴስ።4
ሲንፌ ያና ሂዶታ
ባንታ ሃልቾ
ጎዳፔ ጌንናስ
ዱጌ ጪማ ኦላን
ዎዛይታስ
ባንታ ኦሶ ማን
ኦዛይታስ
«ኑና ኦኒ ቤኣኔ?
ኑና ኦኒ ኤራኔ?»
ጊዛይታስ ኣዬ ኣና!
ኢንቴ ዮኦታ ላሚ ዬጌታ፤
ማናታ ኡርቃ ማላ ጼሌታ!
ሜቲዳይሲ
ሜዳይሳ፥
«ኢዚ ታና ሜቤና» ጊዜ?
ማና ሚሺ ባና ሜዳይሳ፥
«ኢዚ ኣይኮካ ኤሬና» ጊዜ?5
ሊባኖሴይ ላሜቲዲ
ኣራዳ ጋዴ ጊዳናስ፥
ኣራዳ ቢታይ ላሜቲዲ
ዎራ ጊዳናስ
ጉ ዎዴይ
ኣቲዴስ ጊዴኔ?
ሄ ጋላስ ቱሌይ
ጻ ማጻፋ ቃላ ሲያና፤
ቆቄ ኣይፌቲካ ሻሩማፔኔ
ማፔ ሻኬቲዲ ጼላና።
ኣሽኬቲ ጎዳን፥
ሂዬሳቲ ኢስራኤሌ ጌሻን
ዛሪ ዛሪ ኡፋዬታና።
ሜንጼ ኢታቲ ኡባይ ዉራና፤
ቂልጪዛይቲ ቲምኢ ጋና፤
ኢታ ኦናስ
ዛማዲ ኡቲዳይቲ ያና።
ኣስ ዮኦን ሞራንቻ ኬሲዛይቲ፥
ሺሎታን ሞቴቲዛይሳ ቦላ
ዎጺማዴ ዋጺዛይቲ፥
ዎርዶ ማርካን ቱማቴ
ጺሎታፔ ቦንቂዛይቲ ያና።
ሄሳ ጊሻስ ኣብራሃሜ ዎዚዳ
ጎዳይ ያቆቤሶስ፥
«ያቆቤይ ሃይሳፌ
ጉዬ ዬላቴና፤
ኢዛ ሲንካ ላሜቴና።
ባንታ ጊዶን ታ ኩሼ ኦሶ ጊዲዳ
ባንታ ናይታ ቤኢሼ
ታ ሱን
ጌሻቴን ናጋና፤
ኢስቲ ያቆቤ ጌሻዛ
ጌሻቴ ኤራና፤
ኢስራኤሌ ጾሳ ሲንን
ያሻቴን ኤቃና።
ኣያናን ባሊዳይቲ
ሲሚዲ ኣኬካና፤
ዙዙሚዛይቲካ
ቲሚርቴ ኤካና» ጌስ።
Source notes (5)
- Footnote ኢብራዌታ ቃላራ ኣርኤሌ ጉሲ ጾሳ ያርሾሶሆ ጉሳ።
- Cross-reference ኦሮ 11፡8
- Cross-reference ማቶ 15፡8-9፤ ማር 7፡6-7
- Cross-reference 1ቆሮ 1፡19
- Cross-reference ኢሳ 45፡9
ጌሻ ማጻፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.