ኢሳያሳ ቲንቢቴ 1

1ዩሁዳ ካዎታ ኦዚያ፥ ኢዮኣታሜ፥ ኣካዜኔ ሂዝቂያሳ ካዎቴ ዎዴ ኣሞጼ ና ኢሳያሲ ዩሁዳ ጊሻሲኔ ዬሩሳላሜ ጊሻስ ቤኢዳ ኣጁታ።1

ጾሳይ ባ ዴሬዛ ሴሪዳ ሴራ

2ጎዳይ፥ «ሳሎቶ ሲዪቴ!

ቢታዬ ኔካ ኤዝጋ ሲያ!

ታኒ ናይታ ዬላዳ

ዲቻ ጋን

ኢስቲ ታ ቦላ ማካሊዳ።

3ቦራይ ባ ጎዳ ኤሬስ፤

ሃሬይ ኢዛ ጎዳይ ኢዛስ ጊግሲዳ

ዜካ ኤሬስ፤

ኢስራኤሌይ ጊዲኮ

ታና ኤሬና፤

ታ ዴሬይካ ኣኬኬና» ጊዴስ።

4ኢንቴኖ ናጋራንቻ

ካዎቴቶ!

ቆሆን ኩሚዳይቶ!

ኢታ ኦዛ ዜሬቶ!

ኢንቴ ኣዋታ ቱናቴ

ካሊዛ ናይቶ!

ኢንቴና ኣዬ ኣና!

ጎዳ ኣጋጊዴታ፤

ኢስራኤሌ ጌሻዛ

ዬጊ ኣጊዴታ፤

ዞኮካ ኢዛስ ዛሪዴታ።

5ማካላ ቦላ ማካላ ጉጂዲ

ኢንቴ ኣይስ ዛሪ ዛሪ

ቃጻዬቴቲ?

ኢንቴ ሁኤይ ሙሌ ሳኬቲዴስ፤

ኢንቴ ዎዚናይካ ዳቡርዴስ።

6ሄሳ ጋሶን ሂርኪ

ቶሆ ጹጉንፌ ቢዲ

ሁኤ ኢስኬ ጋካናስ

ፓጻቴ ኢንቴስ ባዋ።

ማዱን፥ ኪጻኔ

ኡዛስ ጻላ ጊዲዴስ።

ሄ ማዱንይ ሜጬቲቤና፤

ቃሼቲቤና፤

ዛይቴንካ ሹጊቤና።

7ኢንቴ ዴሬይ ኣይኮይ ባይንዳ

ባዞ ጊዳና፤

ኢንቴ ካታማቲ ታማን ጹጌታና፤

ኢንቴ ኣይፌይ ጼሊሺን

ኢንቴ ቢታ ኣላጋይ

ቦንቂ ኤካና፤

ኢስቲ ኢንቴ ቢታ ቡላ ኬሳና።

8ጺዮኔ ናያ

ዎይኔ ሚ ጊዶን ዲዛ

ጋባ ማላ፥

ሌሌሄ ጊዶን ዲዛ

ቄሪ ኬ ማላኔ

ሞርኬይ ጊዶዳ

ካታማ ማላ ጊዳዱስ።

9ኡባፌ ዎልቃማ ጎዳይ

ኑስ ዜሬ ኣሾንታኮ፥

ኑኒ ሶዶሜ ማላኔ

ጋሞራ ማላ ጊዳናኮሺን።2

10ኢንቴኖ ሶዶሜ ኣይሲዛይቶ!

ጎዳ ቃላ ሲዪቴ፤

ኢንቴኖ ጋሞራ ዴሬቶ!

ኑ ጾሳ ቲሚርቴ ኤዝጊ ሲዪቴ።

11«ኢንቴ ያርሾ ዳሮይ

ታስ ኣይ ኦኔ?

ሃኖ ጋካናስ

ኢንቴ ታስ ሺሺዳ

ጹጌቲ ሺቂዛ

ርሾ ኣሾኔ

ሞ ሜሄታ ኣሾ ካላዲስ፤

ታኒ ቦራ ሱን፥

ዶርሳ ሱኒኔ

ዴይሻ ሱን ኡፋዬቲኬ።3

12ኢንቴ ታስ ጎይናናስ ዪዛ ዎዴ

ሄሳ ኡባ ኢንቴ

ኤኪ ያና ማላኔ

ታ ኬ ዛጎ

ኢንቴ ዬና ማላ

ኦኒ ኦይቺዴ?

13ሃይሳፌ ጉዬ ሃይሳ

ሚሳቲዛ ሃዳ ያርሾ

ናምኣን ሺሾፍቴ፤

ኢንቴ ጩዋሲዛ ኤጻኔይ

ታና ሻቴስ፤

ኣጊና ጼሮን፥

ሳምባታ ጋላሳታኒኔ

ኢንቴ ጎይኖስ ሺቂዛ ጋላሳታን

ኢንቴ ቦንቺዛ ባኣሌቲ

ኢታቴን ኩሚዳ ጊሻስ

ታኒ ሄይታ

ጌንጫ ኣናስ ዳንዳይኬ።

14ኣጊና ጼሮን

ኢንቴ ቦንቺዛ

ጋላሳታኔ

ካሴ ኢንቴ ዎዳ

ባኣሌ ጋላሳታ

ታ ሼምፖያ ሃራሴታዱስ፤

ሄይቲ ታስ ዳሮ ዴጾ

ቶሆ ጊዲዳ ጊሻስ

ታ ኢስታ ቶካናስ ዳንዳይኬ።

15ኢንቴ ኢንቴ ኩሼ

ዎሳስ ታኮ ሚጪኮ

ታኒ ታ ኣይፌ ኢንቴፌ

ሃራሶ ዛራና፤

ኢንቴ ኩሼን ሱ

ኩሚዳ ጊሻስ

ኢንቴ ኬሂ ዎሲኮካ

ታ ኢንቴ ዎሳ ሲዪኬ።

16ሜጬቲቴ፤ ኢንቴና ጌሺቴ፤

ኢንቴ ኢታ ኦሶዛ

ታ ሲንፌ ዲጊቴ፤

ኢታ ኦሶካ ኣጊቴ።

17ሎኦ ኦሶ ታማርቴ፤

ሱሬ ፒርዳ ኮዪቴ፤

ቆሄቲዳይታ ሚንቴ፤

ዪኦታስ ኤቂቴ፤

ኣምኤታስ ሞቴቲቴ» ጊዴስ።

18ቃሴካ ጎዳይ፥ «ሃ ዪቴ

ኢሶይ ኢሳራ ኣኔ ቡጼቶስ፤

ኢንቴ ናጋራይ

ጼቃ ዞኦ ጊዲኮካ

ሻቻ ማላ ቦታና፤

ሱ ማላ ዞኢኮካ

ፑቶ ማላ ፑቃ ቦ ጊዳና።

19ኢንቴ ታስ ኤኖ ጊ ኣዛዜቲኮ

ቢታ ኣንጆ ማና።

20ኢንቴ ታስ ኣካይ ጊ ማካሊኮ

ማሻይ ኢንቴና ማና፤

ሃይሳ ዮቲዳይ

ታና ጎዳ» ጊዴስ።

ናጋራይ ኩሚዳ ካታማዮ

21ካሴ ኣማኔቲዳ ካታማያ

ዋናዳ ላይማ ጊዳዴ?

ካሴ ኢዚን ሱሬ ፒርዳይ

ኩሚዳራኔ

ጺሎቴ ኢዚን ኩሚዳራ

ሃኢ ጊዲኮ

ሼምፖ ዎዛይታስ

ዱሳሶ ጊዳዱስ።

22ሃኔ ኔ ቢራይ ሺይዴስ፤

ኔ ዎይኔ ኡሻይ

ሃን ዬሌቲዴስ።

23ኔና ካሌዛይቲ

ማካላንቻታራኔ

ካይሶታራ ላጌቲዳ፤

ኢስቲ ኡባይካ ማጋንጾ ዶሴቴስ።

ማታኤካ ኬሂ ኮዬቴስ፤

ዪኦታስ ኣ ኤቄቴና፤

ኣምኤታ ማጋና ሲዬቴና።

24ሄሳ ጊሻስ ጎዳይ፥

ኡባፌ ዎልቃማ ጎዳ

ኢስራኤሌ ጾሳይ፥

«ታኒ ታ ሞርኬታ ቦላ

ታ ሃንቆ ጉሳና፤

ታና ኮሚዛይታ ቦላካ

ታኒ ሃሎ ኬሳና።

25ታኒ ታ ኩሼ

ኔ ቦላ ዴንና፤

ኔ ቦላ ዲዛ ኪንካ

ታ ጌሻና፤

ኔ ቂታካ ኔ ቦላፌ ዲጋና።

26ካሴ ኔና ኣይሲዛይታ ማላ

ሃራ ኔና ኣይሳናይታኔ

ዞራናይታ ታኒ ኔስ ዴንና፤

ሄሳፌ ጉዬ ኔኒ፥

‹ጺሎቴ ዲዛ ኣማኔቲዳ

ካታማዮ› ጌቴታና።

27ጺዮና ሱሬ ፒርዳን፥

ማሮቴን ሲሚዛይቲ

ጺሎቴን ዎዜታና።

28ጊዶ ኣቲን ማካላንቻቲኔ

ናጋራንቻቲ ኢሲ ቦላ ሊቃና፤

ጾሳ ኣጊዛይቲ ዉሪካ ያና።

29ካሴ ኢንቴ ዶሲዛ ካሻታን

ኢንቴ ዬላታና፤

ካሴ ኢንቴ ዶሪዳ ኣታኪልቴሶሆታን

ኢንቴ ካዉያና።

30ዉርሴን ኢንቴ ቦንጮይ

ቆኪዳ ዎላ ማላ፥

ሃ ባይንዳ ኣታኪልቴሶሆታ

ማላ ጊዳና።

31ሚኖ ኣሲ ሃፓ ማላ፤

ኢዛ ኦሶይካ ፒልኢ ጊዛ

ላጮ ማላ ጊዳና፤

ናምኣይካ ኢሲ ቦላ ጹጌታና፤

ሄ ታማ ቶይሳና

ኣሲካ ዴና» ጊዴስ።